Нүүдл 17 - Хальмг келнд орчулсн Әрүн Бичлһс

Уулын хадас һарчах усн

¹ Син гидг көдә һазрас һарад, Израилин улсин хамцан Деед Эзнә зааврла ирлцҗ бүүрән соляд йовв. Эдн Рефидим гидг нертә һазрт зогсв. Тенд олн-әмтнд уух усн уга билә.

² Әмтн Мошег гемшәһәд бәәв. – Маднд ус өгтн! – гиҗ эдн некв. – Бидн уухар седҗәнәвидн. – Тадн юңгад намаг гемшәҗәхмбт? – гиҗ Моше сурв. – Юңгад тадн Деед Эзиг сөрҗәхмбт?

³ Болв олн-әмтн ундасад Мошег керлдв: – Ю хәәҗ чи мадниг Египетәс авч һарвч? Мадниг күүкдтәһимвидн болн малтаһимвидн ундасулад муурулхарий?

⁴ Моше Деед Эзиг дуудҗана: – Эн әмтнлә би ю кехмб? Эдн ода намаг чолуһар цокн гиҗәнә.

⁵ Деед Эзн Мошед закчана: – Өмәрән һарад, улсин өмн зогс, Израилин көгшдәс зәрминь бийләһән ав. Нил һолын усар цоксн тайган авад йов.

⁶ Тенд, Хорив уулын хад деер, чини өмн Би зогснав. Чи хадыг цокхла, энүнәс усн гүүх, әмтн энүг уутха. Израилин көгшдин нүднд Моше мел тиигҗ кев.

⁷ Эн бәәрн Масса болн Мериба гиҗ нерәдгдв, юңгад гихлә тенд Израилин улс: «Деед Эзн маднла аль угай?» – гиҗ келәд Деед Эзиг шоодад сөрв.

Амалекин улсиг дииллһн

⁸ Амалекин улс Рефидимд ирәд, Израилин улс тал дәврв.

⁹ Моше Ешуад келв: – Амалекмүд тал одх әмтиг шүүҗ ав. Би болхла маңһдур һартан Бурхна өгсн мотрта уулын толһа деер һарнав.

¹⁰ Ешуа Мошен заквриг күцәһәд, амалекмүдлә дәәлдв. Моше болхла Ахаронла болн Орла хамдан уулын толһа деер һарв.

¹¹ Моше һаран өргхлә, Израиль диилнә, дорагшан буулһхла – амалекмүд.

¹² Зуг Мошен һарнь күндрв. Тиигхлә чолу авч ирхлә, Моше терүн деер суув. Ор болн Ахарон болхла, хойр таласнь энүнә һаринь дөңнв. Нарн суутл, Моше һаран деегшән өргәд бәәв.

¹³ Ешуа Амалекиг болн терүнә әмтиг селмәр цокад энүг диилв.

¹⁴ Деед Эзн Мошед келв: – Мартгдшгон төләд дегтрт бичәд, Ешуад медүлҗ кел: Би Амалекиг һазр деерәс уга кенәв – энүнә нернь чигн үлдшго!

¹⁵ Моше бәрц бәрлһнә орм босхад, терүнд Яхве-Нисси гидг нер өгәд

¹⁶ келв: – Эннь Деед Эзнә туг һарт бәрәтә гиҗәнә. Амалекин улсин өмнәс кеҗәх Деед Эзнә дән үйәс үйд гиҗ герчлҗәнә!