Нүүдл 16 - Хальмг келнд орчулсн Әрүн Бичлһс

Манна болн бөдн шовуд

¹ Элимәс һарад, Израилин улсин хамцан Элимин болн Синайин хоорнд бәәршлҗәдг Син гидг көдә һазрт ирв. Эннь Египетәс һарч йовлһна хойрдгч сард, сарин арвн тавдгч өдрт болв.

² Тенд, көдә һазрт, Израилин улсин хамцас Мошед болн Ахаронд һундлан келәд бәәв.

³ – Мадниг Египетд Деед Эзн алснь деер болх билә, – гиҗ Израилин улс келв. – Тенд бидн махта хәәс төгәлҗ суулавидн, мадн цадтлан иддг өдмгтә биләвидн. Тадн болхла цуг улсиг харһнулхин төлә мадниг эн көдә һазрур көтлҗ авч ирвит!

⁴ Деед Эзн Мошед келв: – Би таднд хур мет теңгрәс өдмг асхҗ өгнәв. Өдр болһн әмтн һарад, өдртән идх хотан цуглулх. Би болхла эдн яһҗ Мини Зака күцәҗәхинь сөрнәв.

⁵ Долан хонгин зурһадгч өдр ирхлә, эдн эн өдрт цуглулсан белдхлә, эннь эдн йиринәс хойр холванд икәр цуглулснь медгдх.

⁶ Моше Ахарон хойр Израилин улст келҗәнә: – Асхн ирхлә, тадн медхит: эннь Деед Эзн тадниг Египетәс көтлҗ һарһв.

⁷ Өрүнднь тадн Деед Эзнә туурмҗиг үзхит. Юңгад гихлә Деед Эзнд һундлан медүлҗәхитн Эн соңсв. Зуг бидн кен болҗахмб? Мадниг яһад гемшәҗәхмб?

⁸ Моше келҗәнә: – Асхар Деед Эзн таднд мах, өрүһәр болхла дала өдмг өгх. Эн тадн Терүнд һундлан медүлсинь соңсв. Бидн кен болҗахмб? Тадн маднд биш, зуг Деед Эзнд һундлан медүлҗәнәт!

⁹ Моше Ахаронд келҗәнә: – Израилин улсин хамцанд Деед Эзнә өмн һарх заквр өг, юңгад гихлә Деед Эзн теднә һундлынь соңсв.

¹⁰ Ахарон эн үгмүдиг Израилин улсин хамцанд келхләнь, эдн көдә һазр тал хаҗив – тенд, үүлнд, эдн Деед Эзнә туурмҗиг үзв.

¹¹ Деед Эзн Мошед келв:

¹² – Би Израилин улсин һундлыг соңсув. Эднд иигҗ кел: асхарнь мах идхит, өрүнднь болхла тадн дала өдмгтә болхит. Тиигхлә тадн Би, Деед Эзн, – тана Бурхн болҗахинь медхит.

¹³ Тиигәд асхарнь бөдн шовуд нисҗ ирәд теднә бәәриг дүүргв. Өрүһәр болхла энд эргмдән чиг буув.

¹⁴ Чиг ширгҗ одхла, көдә һазр кевтән нимгн шухтнсн коруһин бәәдлтә юмар бүркгдснь үзгдв.

¹⁵ Израилин улс үзчкәд, эннь юн болҗахинь медлго нег-негнәсн сурад бәәв: – Эннь юмб? Моше эднд келв: – Энтн таднд Деед Эзнә өгүлҗәх өдмг болҗана.

¹⁶ Деед Эзн таднд иим заквр өгв: «Күн болһн кедү энүнә бүлднь кергтәһинь цуглултха – сег дотр күн болһна төлә неҗәһәд омер бәәхмн».

¹⁷ Израилин улс минь тиигҗ кев. Негнь икәр цуглулхла, талдань – баһар.

¹⁸ Зуг цуглулгдсиг омерәр чиңнүрдхлә, икәрнь цуглулгдснд үлү юмн уга болв, баһар цуглулгдснд болхла дуту юмн уга болв. Күн болһн кедү юм идҗ чадхан цуглулҗ авв.

¹⁹ – Энүнәс маңһдурк өдрт юм бичә үлдәтн, – гиҗ Моше заквр өгв.

²⁰ Болв энүг зәрм әмтн соңссн уга: цуглулгдсна зәрм хүвинь өрүн күртл үлдәв, үлдәснь үрҗ одв. Терүнднь өтн һарв. Моше эн улст уурлв.

²¹ Өрүнднь күн болһн кедү өрк-бүлднь кергтәһинь цуглулв. Өдртнь болхла цуг эс цуглулгдснь нарнд хәәләд бәәв.

²² Долан хонгин зурһадгч өдрт эдн хойр холван икәр цуглулв – күн болһнд хошаһад омер. Хамцана һардачнрнь ирәд, энүнә тускар Мошед келхлә,

²³ эн хәрү өгнә: – Деед Эзн энүнә тускар келлә. Маңһдур төвкнүн бәәлһнә өдр, Деед Эзнә әрүн бемб өдр. Болһхар седҗәхән болһтн, чанхар седҗәхән чантн, эс идсән маңһдур күртл үлдәтн.

²⁴ Әмтн Мошен закврар эс идсән дарук өдр күртл үлдәв. Эн саамд үлдәснь үрсн уга, энүнд өтн чигн уга болв.

²⁵ Моше келв: – Эндр энүг идтн. Эндр Деед Эзнә бемб өдр, тегәд һазрт тадн юм олҗ чадшгот.

²⁶ Зурһан өдртән цуглултн, доладгч өдрнь болхла – бемб өдр. Эн өдр тадн юм олшгот.

²⁷ Зәрмнь долан хонгин доладгч өдртнь чигн юм цуглулхар йовв, болв олҗ чадсн уга.

²⁸ Деед Эзн Мошед келв: – Кедү күртлән тадн Мини өгсн закврмудыг болн закадыг эвдхмбт?

²⁹ Хәләтн: Деед Эзн таднд бемб өдриг өгв, тегәд чигн долан хонгин зурһадгч өдрт таднд хойр өдрә хотыг Тер өгүлнә. Доладгч өдрт күн болһн гертән үлдәд, альдаран чигн һарх зөв уга.

³⁰ Долан хонгин доладгч өдрт әмтн амрв.

³¹ Израилин улс эн хотыг «манна» гиҗ нерәдв. Манна цаһан болчкад кориандрин экин бәәдлтә, амтнь болхла бал тәвәд болһсн һуйрла әдлхн.

³² Моше келв: – Деед Эзн иигҗ медүлв: «Египетәс көтлҗ һарһсн саамд Би тадниг көдә һазрт хотлсн өдмгиг күн болһн үзтхә гиһәд маннан нег омер үйәс үйд хадһлгдад бәәтхә».

³³ – Буһш ав, – гиҗ Моше Ахаронд келв, – энүн дотр маннан дүүрң омериг тәвәд, таднд үйәс үйд хадһлгдхин төләд Деед Эзнә өмн оркчк.

³⁴ Хөөннь Ахарон Деед Эзн Мошед заасар буһшиг хадһлхар Бооцана хавтха чолудын хаҗуд тәвв.

³⁵ Әмтн бәәдг һазрур иртлән, Израилин улс 40 җилдән маннар хот кеһәд бәәв. Канана һазрин меҗәд күртлән эдн маннар теҗәл кеһәд бәәв.

³⁶ (Омер – эннь ефән арвдгч хүвнь мөн.)