Нүүдл 15 - Хальмг келнд орчулсн Әрүн БичлһсДеед Эзнд магталын дун 1 Тиигхлә Моше болн Израилин улс Деед Эзнд эн ду дуулад иигҗ келцхәв: Деед Эзиг магтнав: Эн алдр! Эн мөрдиг болн мөр унсн әмтиг теңгст орулв! 2 Деед Эзн – мини чидл, Эн – мини дун! Эн – мини Аврач болв! Эн – мини Бурхн, Энүг би магтҗанав! Мини өвкнрин Бурхн – Энүг деегшән өргнәв! 3 Деед Эзн – дәәч! Энүнә нерн – Яхве! 4 Эн хаана мөртә тергд, терүнә цергүд теңгст орулв, Терүнә сән гисн дәәчнриг Улан теңгст булхулв. 5 Тедниг усн татад авчкв: Тедн чолун мет йоралд булхв! 6 Деед Эзн! Тана барун һар чидләрн алдр. Деед Эзн! Тана барун һар хортыг күүчв! 7 Та олн алдр туурмҗарн өмнәсн буцсн әмтиг уга кеввт! Та ууран һарһад, Тедниг хагсу өвсн мет һалар шатаввт! 8 Та үләхлә – усн деегшлв, Ик дольган эрс мет босв, Усна күчн хату таг болв! 9 «Көөһәд күцнәв, – гиҗ өшәтн ухалв, – Олврасн хувалцнав, цадтлан эдлнәв терүнәсн! Үлдән илдкәд – цугтаһинь уга кенәв!» 10 Зуг Та үләхлә – теңгс эдниг бүркв: Хорһлҗн мет эдн күчтә уснд чивҗ орв. 11 Бурхд дунд Та эс болхлаг, Деед Эзн, кен болхмб? Әрүн кевәрн Та эс болхлаг кен болхмб? Туурмҗдан әәмшгтә! Өвәрц йовдлмудын Бүрдәһәч! 12 Барун һарарн дайлв – Һазр өшәтиг татад авчкв! 13 Танар авргдсн улсиг, Та Эврәннь хәәрлтәрн дахулвт, Эврәннь чидләрн Эврәннь әрүн бәәрн талан тедниг дахулвт. 14 Өөр-шидр бәәсн келн-улс болхла соңсад чичрлдв! Пилистин улс му бәәдлд тусв, 15 Эдомин һардачнр икәр әәв, Моавин толһачнр чичрлдәд одв, Канана әмтн әәһәд сүрдв. 16 Эдн икәр әәһәд гүүтхә! Эднә өөгүр Тана келн-улс эс давтл, Тана шүүҗ авсн улс эс давтл, Тана күчтә һарас чолун болад тедн менртхә! 17 Та тедниг Эврә уул деер бәәлһхит, Тенд, Деед Эзн, Та Бийдән тосхсн бәәрндән, Тенд, Деед Эзн, Эврәннь һарарн бәрсн әрүн бәәрндән! 18 Деед Эзн мөңкинд эзркх! 19 Египетин хаана мөртә тергд болн мөр унсн улс теңгсин гүүнднь орхла, Деед Эзн теднә өмнәс теңгсин ус эргүлв. Израилин улс болхла теңгс дундаһар хүүрә һазрар мет давҗ йовв! 20 Ахарона эгчнь – Мирьям-әәлдәч – кеңкрг авхлань күүкд улс цугтан кеңкргән цокад, дуулад, бииләд энүнә ардас йовв. 21 Тиигхләнь Мирьям дахад дуулв: Деед Эзнд дуултн: Эн деегшән өөдлв! Эн мөриг болн мөр унсн күүг теңгст орулв! Маран һашун усн 22 Улан теңгсәс Моше Израилин улсиг Шур нертә көдә һазрур дахулв. Һурвн өдртән эдн көдә һазрар йовад, альднь чигн ус олҗ чадсн уга. 23 Болв Мара тал ирхләрн, тенд ус ууҗ чадсн уга – усн һашун бәәҗ. (Тегәд чигн эн һазр Мара гиҗ нерәдгднә.) 24 Әмтн Мошед эврә һундлан келәд бәәв. – Бидн ю уухмб? – гиҗ эдн сурв. 25 Моше Деед Эзн тал дуудвр кенә. Деед Эзн терүнд нег мод заана. Моше эн модна тасрхаг уснд хайхла, усн әмтәхн болв. Тенд Деед Эзн Эврәннь әмтнд закад болн зокалмуд өгв, тенд Деед Эзн эдниг сөрҗ хәләв. 26 Эн келҗәнә: – Кемр тадн Деед Эзиг, эврә Бурхан, йосндан соңсад, Энүнә өмн чикәр кехләг, Энүнә заавринь оньгтан авхла болн Энүнә зокалмудыг күцәхлә, тиигхлә Би тадниг Египетин әмтнд хальдасн тер гемәс гетлгхв. Би Деед Эзн – тадниг эдгәхүв! 27 Израилин улс Элимд ирв. Тенд арвн хойр булг болн 70 пальм модн бәәҗ. Тенд, булгудын өөр-шидр, эдн бәәрләд зогсв. |
© Институт перевода Библии, 2002-2023
Institute for Bible Translation, Russia