Нүүдл 14 - Хальмг келнд орчулсн Әрүн Бичлһс

Улан теңгс һатллһн

¹ Деед Эзн Мошед закчана:

² – Хәрү хәрәд Баал-Цефона өөр, Мигдолин болн теңгсин хоорнд Пи-Хахиротын өөр зогстха гиҗ Израилин улст кел. Тенд, Улан теңгсин көвәд, зогсад амртн.

³ Израилин улс төөрәд, эднд көдә һазр хаалһднь харшлҗана гиҗ хан ухалтха.

⁴ Эн һацад, тадна ардас көөлдхинь Би некнәв. Минь тер саамд Би хаанд болн энүнә цергт деерлкнәв! Деед Эзн кен болҗахинь Египетин улс медх! Израилин улс Деед Эзнә келсәр кев.

⁵ Израилин улс йовҗ одв гиҗ Египетин хаанд зәңглв. Тиигхлә хан болн энүнә мухлас генткн ухаһан сольна. – Ямаран юм һарһчквидн? Израилин улсиг, мана көдлмшчнриг, тәвчквидн!

⁶ Тергнд мөр зүүһәд хан, эврәннь әмтән бийләһән авв.

⁷ Эн бийләһән хамгин сән гисн зурһан зун тергиг, Египетин тергн цергиг бийләһән авв. Мөрн тергн деер дамшлтта дәәчнр зогсв.

⁸ Болв Деед Эзн Египетин хаана зүркиг һацав, тегәд тер Израилин улсин ардас әәлго көөлдв. Израилин улс юмнас әәлго йовҗ йовла.

⁹ Египетин әмтн эднә ардас көөлдв – хаана цуг мөрн тергд, мөр унсн цуг улс, цуг цергүд, Пи-Хахиротын өөр-шидр, Баал-Цефона өмн бәәдг теңгсин өөрк зогсалд, эдниг көөҗ күцв.

¹⁰ Хан өөрдҗ йовла. Израилин улс хәләһәд үзнә: Египетин әмтн теднә ардас көөлдҗ йовна! Тедн дегд әәһәд Деед Эзнәс эрәд сурв.

¹¹ – Египетд мадниг оршадг һазр угавий? – гиҗ эдн Мошед хәәкрв. – Чи мадниг нааран, көдә һазрур, үкхин төлә көтлҗ ирсмбч? Чи ю кеввч, Египетәс мадниг яһад һарһвч?

¹² Бидн чамд Египетд келләвидн: «Мадниг үлдә, бидн Египетин улсин мухла болнавидн!» Көдә һазрт үкхин ормд теднә мухла болнавидн!

¹³ – Бичә әәтн! – гиҗ Моше әмтнд хәрү өгв. – Зогстн, Деед Эзн яһҗ тадниг аврхинь хәләтн. Юңгад гихлә ода тадна үзҗәх Египетиг, дәкҗ мел үзшгот!

¹⁴ Тадна төлә Деед Эзн Эврән дәәлдх! Тадн болхла, төвкнтн!

¹⁵ Деед Эзн Мошед келҗәнә: – Яһад чи Нанас эрәд сурҗахмбч? Израилин улст өмәрән йовхд заквр өг!

¹⁶ Эврән болхла тайган өргәд, теңгс деер дайл – тиигхлә теңгс зә һарһхла, Израилин улс теңгс дундаһар хүүрә һазрар мет йовх.

¹⁷ Египетин әмтн һацад, тадна ардас йовхинь некнәв. Минь тер саамд Би хаана болн энүнә цергүд, энүнә мөрн тергд болн мөр унсн улсиг дииләд туурхув!

¹⁸ Хааг терүнә мөрн тергтәһинь болн мөр унсн улстаһинь диилхлә, тегәд Би Деед Эзн болҗахинь теднә әмтн медх!

¹⁹ Израилин улсин зергләнә өмн йовсн Бурхна элч зергләнә ард зогсв. Эднә өмн бәәсн үүлн бас ард зогсв.

²⁰ Эн Египетин болн Израилин улсин зергләниг хував. Эн хар үүлн кевтә бәәв, сөөднь болхла герлтәд бәәв. Тер сөөни дуусн хойр зерглән нег-негнләрн негдсн уга.

²¹ Моше теңгс деер һаран дайлв, сөөни дуусн Деед Эзн шүрүтә дорд үзгин салькар теңгсин ус көөһәд бәәв. Теңгсиг Эн хагсав, усн ширгв.

²² Тиигхлә Израилин улс хүүрә һазрар мет теңгсин дундаһар йовв. Эднә барун һар таласнь эрс мет усн, зүн һар таласнь бас эрс мет усн зогсв.

²³ Тиигхлә Египетин әмтн – хаана мөртә цуг цергүд, мөр унсн энүнә цуг улс, – Израилин улсин ардас теңгсин дундаһар көөлдв.

²⁴ Өр цәәхин өмн Деед Эзн һал болн үүлн һатцас Египетин цергиг хәләһәд, эднә бәәдлиг эвдв.

²⁵ Эднә тергдин төгәсинь Эн суһлхла, Египетин әмтн әрә гиҗ эдниг дааҗ йовв. «Маднд Израилин әмтнәс холд гүүх кергтә! – гиҗ тедн келв. – Эднә төлә Деед Эзн Египетин әмтнлә дәәлдҗәнә».

²⁶ Деед Эзн Мошед келв: – Һаран теңгс деер дайл – усн хәрү ирәд, тедниг, мөртә тергдин болн мөрд унсн улсин өмнәс дәврх!

²⁷ Моше һаран теңгс деер өргхләнь – өрүнднь теңгс хәрү урдк бәәдлтә болв. Египетин әмтн усна өмнәс гүүв – Деед Эзн тедниг теңгсин тал дунд хамад күргв!

²⁸ Усн хәрү ирәд, теңгст көөлдҗ йовсн мөртә тергдиг, мөрд унсн улсиг болн хаана цуг цергүдиг кевтнь бүркчкв. Египетин әмтнәс нег чигн күн әмд үлдсн уга!

²⁹ Израилин улс болхла, теңгсин дундаһар хүүрә һазрар мет йовв: барун һар талнь эрс мет ик усн болн зүн һар талнь бас эрс мет ик усн зогсв.

³⁰ Тер өдр Деед Эзн Израилин улсиг Египетин әмтнәс аврв. Израилин улс теңгсин көвәд Египетин чивсн әмтнә цогцинь үзв.

³¹ Деед Эзнә күчтә һар теднлә ю кесинь медәд, Израилин улс Терүнәс әәв. Эдн Деед Эзнд болн Терүнә мухла Мошед иткв.