Нүүдл 13 - Хальмг келнд орчулсн Әрүн Бичлһс

Израилин улсин түрүн үрдиг Бурхнд нерәдлһн

¹ Деед Эзн Мошед келҗәнә:

² – Израилин улст һарсн түрүн үрдиг – экин геснд бәәдг үрн – әмтнә түрүн үрдиг болн малын түрүн төлиг – цугтаһинь Нанд нерәдтн. Эдн Мини медлд бәәхмн.

³ Моше әмтнд келв: – Египетәс, бәрәнә һазрас тадна һарсн өдриг тодлтн. Яһад гихлә тадниг Деед Эзнә күчтә һар тендәс һарһв. Эн өдр исксн өдмг бичә идтн.

⁴ Авив сард, эндр тадн йовхит.

⁵ Деед Эзн чамаг кананахна, хетмүдин, амореймүдин, хивеймүдин болн евүсмүдин һазрт көтлҗ ирхлә, юңгад гихлә үс болн бал һарһҗах эн һазриг чамд өгхәр Эн чини эцкнрт андһар өгсн билә. Тиигхлә эн сард чи иим авъяс күцәх зөвтәч:

⁶ долан өдртән зуг экн уга өдмг идх, доладгч өдрт Деед Эзнә байр темдглх.

⁷ Долан өдртән экн уга өдмг идтн: тана һазрт искәсн һуйрар болһсн өдмг болн һуйрин экн уга болх зөвтә.

⁸ Эн өдр чи эврәннь көвүндән келхич: «Эннь би Египетәс йовҗах кемд Деед Эзн мини төлә күцәснә туск санл мөн».

⁹ Эннь чини төлә һарт, маңнад тәвх санлын темдг кевтә бәәдг темдг мөн. Тегәд Деед Эзнә Закаг даңгин келх зөвтәч. Юңгад гихлә Деед Эзн чамаг Эврә күчтә һарарн Египетәс һарһх болҗана.

¹⁰ Эн зокалыг җил болһн темдглсн цагла күцәтн.

¹¹ Бурхн чамаг кананахна һазрт көтлҗ ирхлә – юңгад гихлә эн һазриг чамд өгхәр чамд болн чини өвкнрт андһар өгсн билә, –

¹² тиигхлә чи Энүнд эврә түрүн үрдән нерәдх зөвтәч. Малын түрүн эр хурһд Деед Эзнә медлд бәәх зөвтә.

¹³ Элҗгнә түрүн туһлыг хулдҗ авх зөвтәч, кемр эс хулдҗ авхла – энүнә күзүһинь нуһл. Күүнә ууһн үрдиг, эврә көвүдән хулдҗ авх зөвтәч.

¹⁴ Иргчдән көвүнчн чамас: «Эннь юн болҗахмб?» гиҗ сурхла, иим хәрү өг: «Деед Эзн күчтә һарарн мадниг Египетәс, бәрәнә һазрас сулдхв.

¹⁵ Хан һацад, мадниг тәвлго бәәхлә, Деед Эзн Египетд әмтнә чигн, малын чигн түрүн үрдинь алсн билә. Эн учрар чигн би түрүн төлин эр хурһдар Деед Эзнд тәкл тәкәд, эврә ууһн үрдән хулдҗ авув.

¹⁶ Эннь чини төлә һарт бәәх темдг мет, маңнад бәәх боодһа мет болх зөвтә, юңгад гихлә Деед Эзн Эврә күчтә һарарн мадниг Египетәс һарһсн болҗана».

Деед Эзн әмтнә өмн үүлн мет, һал мет йовна

¹⁷ Хан Израилин улсиг сулдхсн кемд Бурхн эдниг пилистмүдин һазрар көтлҗ йовсн уга – эннь хамгин ахрхн хаалһ. Бурхн санв: «Израилин әмтн дән болхинь медчкәд, ухаһан соляд Египет тал хәрҗ чадхмн».

¹⁸ Бурхн тегәд эдниг төгәлңдән көдә һазрар, Улан теңгсин өөгүр көтлҗ йовв. Египетәс һарад, Израилин улс дәәлдәнә зергләнд йовв.

¹⁹ Моше Египетәс Йосипин цогциг авч һарв, юңгад гихлә Израилин улсас Йосип андһар авсн бәәҗ. Теднд иигҗ келҗ: «Бурхн таднд дөңгән күргхәр ирх, тегәд мини цогциг бийләһән авад йовтн».

²⁰ Сукотас һарад, Израилин улс көдә һазрин захд бәәдг Этамд цугтан бәәрләд зогсв.

²¹ Деед Эзн Эврән теднә өмн йовв: тедн өдр-сө уга йовхин төлә өдртнь хаалһинь зааҗах үүлн кевтә, сөөһәрнь хаалһинь зааҗах һал мет йовв.

²² Өдрәрнь үүлн, сөөһәрнь һал Израилин улсин өөр үзгдәд бәәв.