Нүүдл 12 - Хальмг келнд орчулсн Әрүн Бичлһс

Песах

¹ Тенд, Египетд, Деед Эзн Мошед болн Ахаронд келв:

² – Эн сар тадна төлә сармудын түрүңкнь – җилин түрүн сар болх зөвтә.

³ Эн сарин арвдгч өдрт өрк-бүл болһн сүрг малас неҗәһәд хурһ авх зөвтә гиҗ Израилин хамцанд келтн.

⁴ Кемр бүл бичкн болад, бүкл хурһиг идҗ чадшго болхла, тиигхлә әмтнә тооһар, кен кедү мах идхинь тоолад, өөрхн хам-хоша бәәх өрк-бүлтә хамдан нег хурһиг авч болҗана.

⁵ Хурһн һаң уга, эр, нег наста болх. Хурһиг хөөдәс эс гиҗ ямадас авч болҗана.

⁶ Эн сарин арвн дөрвдгч өдр күртл бәрәд, бүрүллә хурһан алтн: Израилин хамцанд орҗах улс цугтан иигҗ кех зөвтә.

⁷ Энүнә цус авад, мах идх гермүдт терүнә хойр тотхинь болн тотхин деерк көндлң модыг эн цусар лаштха.

⁸ Махиг тер сөөднь идх кергтә. Энүг һалд шарад экн уга өдмгтә болн һашун өвстә идх кергтә.

⁹ Эн махиг түүкәһәр эс гиҗ чанҗ бичә идтн: хурһн толһатаһан, көлтәһән, гесн-гүзәтәһән шаргдх йоста.

¹⁰ Маңһдурк өдр күртл бичә умш үлдәтн: өрүн күртл эс идсән шатачктн.

¹¹ Бүс бүсләд, буршмган өмсәд, һартан тайгудан бәрәд махиг идтн. Адһад терүг идтн: энтн Деед Эзнә Песах мөн.

¹² Эн сөөһәр Би Египетәр йовад, эн орн-нутгт әмтнә болн малын цуг ууһн үрдиг алхув. Эннь Египетин цуг бурхд деер Мини зарһ болхмн. Би – Деед Эзн!

¹³ Зуг тана гермүд цусар темдглгдх, Би цус үзчкәд давҗ һархув. Би Египетиг алнав, зуг тадниг үклин цоклһн давҗ һарх.

¹⁴ Эн өдр тадна төлә санлын өдр болх зөвтә: энүг Деед Эзнә байр гиҗ темдглтн. Үйәс-үйд энүг нәәрлтн – эннь мөңкинд күцәгдх зокал болҗана.

¹⁵ Долан хонгтан тадн экн уга өдмг идх зөвтәт. Түрүн өдртән эврәннь гермүдәс өдмг искәдг экиг уга кетн. Эн долан хонгт искәдг экәр болһсн өдмгиг идсн кен-негнь Израилин олн-әмтнәс уга кегдхмн.

¹⁶ Эн өдрмүдин түрүңк болн доладгч өдртнь әрүн хург болх йоста. Минь тер өдр хот кехәс талдан нань ямр чигн көдлмш күцәҗ болшго – зуг иим көдлмшиг эн өдрмүдт күцәҗ болхмн.

¹⁷ Эс искәсн һуйрин нәр темдглтн: эн өдр Би Египетәс тана цергиг һарһв. Үйәс-үйд эн өдриг темдглтн – эннь мөңкинд тана зокал.

¹⁸ Түрүн сард, арвн дөрвдгч өдрин асхнас авн хөрн негдгч өдрин асхн күртл тадн зуг экн уга өдмг идх зөвтәт.

¹⁹ Долан өдртән тана гермүдт өдмгин экн уга болх зөвтә. Эн өдрмүдт искәдг экәр болһсн өдмгиг идсн кен-негнь – нүүҗ ирсн эс гиҗ тана орн-нутгин бәәрн күн болну – тернь Израилин олн-әмтнә хамцанас уга кегдхмн.

²⁰ Альднь чигн бәәсн бийнь, эн өдрмүдт искәдг экәр болһсн өдмгиг бичә идтн, экн уга өдмг идтн.

²¹ Моше Израилин көгшдиг цуглулад, эднд келв: – Өрк-бүл болһн бийдән хурһ шүүҗ авад алад, Песах белдтхә.

²² Дарунь хуссоп гидг урһмлын багла авад, цус кесн хәәснд норһад, эн цусар тотхиг болн үүднә хойр мөриг лашхмн. Тиигчкәд гертәс өрүн күртл күн бичә һартха!

²³ Деед Эзн Египетин улсиг алхар йовхларн, тотх деер болн үүднә мөрнд цус үзәд, эн үүднә өөгүр давҗ һарад, тана герт үкл орҗ тадниг алх арһ өгшго.

²⁴ Эн заавриг тадн болн тадна хөөт үйнр мөңкинд күцәтн.

²⁵ Деед Эзнә келсәр таднд өгх һазрт ирхләрн эн авъясиг тенд күцәтн.

²⁶ «Тадн ямр авъяс күцәҗәнәт?» – гиҗ тана күүкд сурхла, –

²⁷ «Энтн Деед Эзнд Песахин тәкл тәклһн болҗана. Деед Эзн Египетин улсиг алсн цагт Эн Израилин улсин гермүдиг давҗ һарад, мана өрк-бүлмүдиг аврв», – гиҗ теднд хәрү өгтн. Цуг улс өкәһәд, Бурхна өмн һазр элкдәд унв.

²⁸ Дарунь Израилин улс йовад, Деед Эзн Мошед болн Ахаронд заквр өгснлә әдл кев.

Арвдгч зовлң: ууһн үрдин үкл

²⁹ Сөөни өрәллә Деед Эзн Египетд цуг ууһн үрдиг алв: ширә деер суусн хаана ууһн үрн, харңһу нүкнд суусн күүнә ууһн үрн болн малын түрүн төлнь үкв.

³⁰ Тер сөөһәр хан босад, энүнә мухлас болн цуг Египетин улс босад – цуг Египетәр ик түңшлһн соңсгдв: гер болһнд эс өңгрсн күн уга болв.

Израилин улс Египетәс һарч йовцхана

³¹ Тер сөөһәр хан Мошег болн Ахарониг дуудад, эднд келҗәнә: – Тадн болн Израилин цуг улс, бостн мини келн-улсас холд йовтн! Тадна сурсар Деед Эзнд мөргтн.

³² Тадна сурсар үүрмг болн бод малыг бийләһән автн. Йовтн, намаг йөрәтн!

³³ Израилин улс эднә орн-нутгас шулуһар һархинь египетнр адһулв. «Эс гихлә, – тедн келв, – бидн цугтан үкхвидн!»

³⁴ Тегәд Израилин улст исәд уга һуйриг тавгтаһинь авч йовх кергтә болв, күн болһн терүг деерк хувцндан ораһад, ээм деерән авад йовв.

³⁵ Израилин улс Мошен заавриг күцәв – цаһан мөңгиг болн алтыг, хувц-хунриг Египетин әмтнәс сурв.

³⁶ Тедн Израилин улст цаһан седклән медүләд, теднд сурсинь цугинь өгхинь Деед Эзн күцәв. Тиигәд Израилин улс Египетәс ик зөөртә һарв!

³⁷ Күүкд улсиг болн күүкдиг тооллго 600 000 шаху йовһн залу – Израилин улс Раамсесас Сукотур йовв.

³⁸ Эднлә хамдан һазадын орна улс йовв, хөөдин, ямадын болн үкрмүдин сүргүд йовв.

³⁹ Египетәс авч йовсн эс искәсн һуйрар Израилин улс экн уга һуйр болһв. Һуйр нам цагтан иссн уга: эдниг Египетәс көөв, эдн удан бәәҗ чадсн уга, тегәд хаалһд хот белдҗ чадсн уга.

⁴⁰ Израилин улс Египетд 430 җилдән бәәв.

⁴¹ Дөрвн зун һучн җил төгссн өдрт Деед Эзнә церг Египетәс һарв.

⁴² Тер сө Деед Эзнә саг-сергг бәәлһнә сө болв: Эн Египетәс Израилин улсиг көтлҗ һарв. Эннь Бурхна сө мөн! Үйәс үйд эннь Израилин улсин саг-сергг бәәлһнә сө болв.

Песахин хотын туск заквр

⁴³ Деед Эзн Мошед болн Ахаронд келҗәнә: – Энтн Песахин туск зокал мөн. Талын һазра күн Песахин хот идх зөв уга.

⁴⁴ Чини хулдҗ авсн мухла, зуг чи энүг керчүлснә хөөн Песахин хотыг идҗ чадх.

⁴⁵ Танад цаг зуур бәәх болн нәәмәдлҗ авсн күн Песахин хот идшго болҗана.

⁴⁶ Хурһиг гер дотран идх кергтә – гертәс энүнә махинь бичә һарһ. Энүнә ясинь бичә хамхлтн.

⁴⁷ Израилин цуг хамцан Песахиг күцәх йоста.

⁴⁸ Кемр танад бәәх нүүҗ ирсн күн Бурхна Песахиг күцәхәр седхлә, тиигхлә энүнә өрк-бүлд цуг залус керчүлгдх зөвтә, зуг энүнә хөөн ирәд Песахиг күцәтхә: эн тана орн-нутгин күүнлә әдл болх зөвтә. Зуг эс керчүлгдсн нег чигн күн Песахин хотыг идх зөв уга.

⁴⁹ Тана орн-нутгин бәәрн улсин болн танад бәәдг нүүҗ ирсн улсин төлә – нег закан мөн.

⁵⁰ Деед Эзн Мошед болн Ахаронд заквр өгсәр минь тиигҗ Израилин улс күцәв.

⁵¹ Минь тер өдр Деед Эзн Египетәс Израилин улсиг церг болһарнь һарһв.