Нүүдл 11 - Хальмг келнд орчулсн Әрүн Бичлһс

Арвдгч зовлңгин тускар урдаснь медүллһн

¹ Деед Эзн Мошед келҗәнә: – Би хаанд болн Египетд дәкн нег зовлң учранав. Минь тиигхлә хан тадниг сулдхх, сулдхх бәәтхә, нам көөһәд һарһх.

² Чи болхла Израилин улст болн күүкдт хам-хоша бәәдг улсас цаһан мөңг болн алт суртха гиҗ заквр өг.

³ Египет Израилин улсин туст цаһан санаһан медүлхинь Деед Эзн цугинь кев. Тиигчкәд цуг Египетин улс – хаана мухлас болну, эгл улс болну – Мошег алдр күүнд тоолдг билә.

⁴ Моше хаанд келҗәнә: – Сөөни өрәллә Би Египетәр йовнав,

⁵ эн орн-нутгт бәәх ууһн үрд – ширә деер суудг хаана үрн, термин чолуһар һуйр теермдҗәх мухла күүкд күүнә ууһн үрн болн малын ууһн, цугтан үкхмн гиҗ Деед Эзн келҗәнә.

⁶ Цуг Египетәр урднь соңсгдад уга, хөөннь чигн соңсгдшго күчтә түңшлһн болхмн.

⁷ Болв Израилин улсур болн эднә малур чигн нам ноха хуцҗ чадшго! Тадн тегәд Деед Эзн Египет Израиль хойрин хоорнд ямаран йилһвр кеҗәхинь үзхит.

⁸ – Тана мухлас, – Моше хаанд келҗәнә, – нанур ирәд, һазр элкдәд унад, намаг эврә улсла хамдан таднас йовҗ одхинь эрәд сурхмн. Тиигхлә би таднас йовхв. Моше уурта бәәдлтәһәр хаана бәәрнәс һарв.

⁹ Деед Эзн Мошед келҗәнә: – Хан тадниг соңсҗахш. Эннь Египетд энүнәс икәр Мини өвәрц йовдлмуд учрхин төлә кегдх зөвтә.

¹⁰ Моше болн Ахарон хаанд олн өвәрц йовдл үзүлв! Болв Деед Эзн иигҗ кев: хан һацад, Египетәс Израилин улсиг тәвлго бәәв.