Нүүдл 10 - Хальмг келнд орчулсн Әрүн Бичлһс

Нәәмдгч зовлң: царцаха

¹ Деед Эзн Мошед закчана: – Хан тал йов. Хан болн энүнә мухлас урдк кевәрн догшн болдгар кенәв. Би эдн дунд Эврә өвәрц йовдлмудан үзүлхәр кеҗәх юмн болҗана.

² Яһҗ Би Египетин улст догшн йовдл үзүлснә болн Би Эврә өвәрц йовдлмудан һарһсна тускар тадн көвүдтән болн ачнртан келҗ өгхит. Болв энтн кен Деед Эзн болҗахинь тадн медтхә гиһәд кегдҗәнә!

³ Моше болн Ахарон хан тал ирәд энүнд келҗәнә: – Деед Эзн, евреймүдин Бурхн, чи ямр уданд Нанла хәрүцәд бәәхмбч гиҗәнә. Нанд мөргхин төлә Мини улсиг тәв!

⁴ Кемрҗән эс тәвхләчн, Би маңһдур чини орн-нутгт царцаха орулнав!

⁵ Тедн эн һазр үзгддгоһар цугинь бүркх, мөндрин хөөн үлдсн цуг өвсиг идх, кеер цуг моддыг идх!

⁶ Чини гериг, чини мухласин гермүдиг болн Египетин гермүдиг цугтаһинь царцаха дүүргх. Эн һазр деер тадн бәәх цагас авн тана эцкнр, тана аавнр иим юмиг үзәд уга! Моше эргәд хаана бәәрнәс һарв.

⁷ Тиигхлә мухлас хаанд келҗәнә: – Эн күүнәс көлтә бидн ямр уданд зовх зөвтәвидн? Эдниг тәвчктн, эврә Деед Эзн Бурхндан мөргтхә. Египет тарҗахинь Та үзҗәхшийт?

⁸ Мошед болн Ахаронд хәрү ирхинь закв. Хан эднд келҗәнә: – Йовад, эврәннь Деед Эзн Бурхндан мөргтн. Таднас кень йовхмб?

⁹ Тиигхлә Моше келҗәнә: – Бидн цугтан йовхвидн, баһчуд болн көгшд, көвүдтәһән болн күүкдтәһән, бод болн үүрмг малтаһан – энтн манад Деед Эзнә байр болх!

¹⁰ Зуг хан инәв: – Сән, тадниг кемр би күүкдтәһитн сулдххла, Деед Эзн тегәд Эврән харстха! Болһатн, тадн му юм һарһхар седҗәнәт!

¹¹ Тиигҗ болшго! Тана дуудсар һанцхн залус йовад Деед Эзнд мөргтхә! Тегәд Моше Ахарон хойриг көөчкв.

¹² Деед Эзн Мошед закчана: – Египетин һазр деегүр һаран өрг – царцаха нисч ирәд мөндрин хөөн үлдсн цуг урһмлыг идчкг.

¹³ Моше Египетин һазр деегүр тайган дайлв. Деед Эзн Египетүр дорд үзгин сальк йовулв. Салькн өдрин болн сөөни дуусн үләһәд, маңһдуртнь дорд үзгәс царцаха авч ирв.

¹⁴ Царцаха Египетин һазрур ирәд, цуг орн-нутгиг дүүргв. Урднь кезә чигн уга бәәсн, даруһас чигн уга болх царцахан тонь икдәд одв.

¹⁵ Цуг һазриг эн бүркв, һазр харлҗ одв! Мөндрин хөөн үлдсн цуг өвсиг болн моддын темсиг царцаха идчкв. Египетин цуг һазрт көк өвсн чигн, моддын хамтхасд чигн үлдсн уга.

¹⁶ Хан Мошег болн Ахарониг адһҗ дуудад, эднд келҗәнә: – Тадна Бурхн Деед Эзнә өмн болн тадна өмн би килнц һарһсн болҗанав.

¹⁷ Зуг ода килнцим тәвтн: нанас эн зовлңгиг уга кехин төлә эврәннь Деед Эзн Бурхнд мөргтн.

¹⁸ Моше хаана бәәрнәс һарад, Деед Эзнд мөргв.

¹⁹ Деед Эзн барун үзгәс ик сальк көдлгүләд, царцахаг көөһәд, энүг Улан теңгст хайв. Египетин һазрт нег чигн царцаха үлдсн уга.

²⁰ Болв Деед Эзн цаарандан хан һацад бәәхиг цугинь кев: эн Израилин улсиг тәвсн уга.

Йисдгч зовлң: таш харңһу

²¹ Деед Эзн Мошед закчана: – Һаран теңгрүр өрг – Египетин һазрт таш харңһу болх, әмтн харңһуд юм үзлго темтрәд йовтха!

²² Моше һаран теңгрт сарвахла, Египетин һазрт һурвн өдртән таш харңһу болв.

²³ Әмтн нег-негән үзсн уга, һурвн өдртән ормасн көндрҗ чадсн уга. Зуг Израилин улсин бәәсн бәәрнд герлтә болв.

²⁴ Хан Мошег дуудад келҗәнә: – Йовтн, Деед Эзндән мөргтн. Болв тадна бод болн үүрмг мал үлдтхә. Бичкдүдтн таднла йовтха.

²⁵ Моше хәрү өгнә: – Бидн эврәннь Деед Эзндән шаталһ кех болн тәкл тәкх юмсиг цугинь мадна һарт бәрүләд өг.

²⁶ Цуг мана мал, негн чигн туру үлддгоһар, маднла йовх зөвтә. Тенд, бәәрндән, мана Деед Эзнд юуһар тәкл тәкхиг шүүҗ авхвидн! Юңгад гихлә тиигән эс иртл, Деед Эзнд ямр малар тәкл тәкхинь бидн медшговидн.

²⁷ Болв хан урдк кевәрн һацхиг Деед Эзн кев: эн тедниг тәвшгоһар седв.

²⁸ – Йов бийәсм цааран! – гиҗ хан Мошед келв. – Тегәд хәлә, дәкҗ нанур бичә ир. Ирхләрн – үкхич.

²⁹ – Тана келсәр болтха, би Таниг дәкҗ үзшгов, – гиҗ Моше хәрү өгв.