Нүүдл 1 - Хальмг келнд орчулсн Әрүн Бичлһс

Египетд Израилин келн-улсиг даҗрлһн

¹ Яковла Египетд ирсн Израилин көвүдин нерд эн (күн болһн эврә өрк-бүлтәһән орҗ ирсн болдг):

² Рубен, Шимон, Леви, Йуда,

³ Исахар, Завулун, Бенямин,

⁴ Дан, Наптали, Гәд болн Ашер.

⁵ Яковин үрд тер цагт Египетд бәәсн Йосипла ут тоодан далн күн бәәсмн.

⁶ Йосип чигн өңгрв, энүнә ахнр-дүүнр цугтан, эднә үй бас цугтан өңгрв.

⁷ Израилин улс болхла олн үртә бәәсмн, эдн тооһарн олн болад, күчнь икдәд, цуг эн орн-нутгиг дүүргв.

⁸ Цаг давад Египетин хаана ширәд Йосипиг меддго шин хан ирв.

⁹ Эн эврә әмтндән келнә: – Хәләтн, Израилин улс олн болв. Эдн күчн-чидләрн маднас даву.

¹⁰ Эдн тооһарн өсшгон төләд нег юм ухалх кергтә, эс гихлә дән учрхла эдн мана хортнла негдәд, буцад мадна нутгас йовҗ одх.

¹¹ Израилин улсиг күнд көдлмшәр муурхднь күргхәр седәд, египетихн эднә өөр хармҗлгчнриг зогсана. Тегәд хаана төлә буудя хадһлдг хораста Питом болн Раамсес хойр балһсиг күчәр тосхулв.

¹² Болв Израилин улсиг икәр даҗрсн бийнь эднә тонь өсәд болн өргҗәд йовв. Египетихн эднәс икәр әәһәд,

¹³ Израилин улсар хәәрлт угаһар күнд көдлмш келгүләд бәәв.

¹⁴ Эднә нилчәр Израилин улсин җирһлнь күнд-күчр көдлмшт хүврв: эдн шавр элдәд тоосх кеҗ һарһв, тәрәнд көдлв – хәәрлт угаһар эн көдлмшт эдн заргдв.

¹⁵ Египетин хан дораһур еврей гергчүдин нилхдт эк болдг эмгдт (негнь Шифра, наадкнь Пуа нертә бәәсмн) заквр өгв:

¹⁶ – Еврей гергчүд цаһан төр болсн цагт кен төрсинь хәләтн. Көвүн болхла – алтн, күүкн болхла – әмд бәәтхә.

¹⁷ Болв дораһур нилхдт эк болдг күүкд улс Бурхнас әәһәд, хаана заквриг соңслго, көвүдиг әмд үлдәһәд бәәв.

¹⁸ Хан эдниг бийүрн дуудҗ авад сурдг болна: – Юңгад тадн тиигҗ кенәт? Яһад көвүдиг әмдәр үлдәһәд бәәнәт?

¹⁹ – Еврей гергчүд Египетин күүкд улсла әдл биш, – гиҗ хаанд дораһур нилхдт эк болдг күүкд улс хәрү өгнә, – эдн чаңһ-чиирг. Дораһур нилхдт эк болдг күүкд күн ирәд уга бәәтл, еврей гергчүд цаһан төр болчкна.

²⁰ Энүнә төлә Бурхн дораһур нилхдт эк болдг күүкд улсиг хәәрлв. Израилин әмтн тооһарн өсәд, күчәрн чаңһрад бәәв.

²¹ (Дораһур нилхдт эк болдг күүкд улс Бурхнас әәҗәхәс иштә Бурхн эднә өрк-бүлмүдиг хәәрлсн болдг.)

²² Тиигхлә Египетин хан эврә улстан иим заквр өгдг болна: – Нилх көвүдиг цугтаһинь Нил һолд хайтн. Күүкдиг әмд үлдәтн.