Марк 6 - Хальмг келнд орчулсн Әрүн Бичлһс

Исус төрскн балһс орҗана

¹ Тендәс цааранднь йовад, Исус сурһульчнртаһан төрскн балһсурн ирв.

^2-3 Бемб өдр Исус хурлд ном сурһв. Терүг соңссн әмтн икәр өврцхәв: – Альдас иим цецн уха Эн авсн болхв? Эн юн болхв? Яһҗ Эн өвәрц юм кедг болхв? Эн эгл модч күн эсий? Эн Марийин көвүн, Яков, Йосип, Йуда болн Шимона ахнь бәәнәлм. Мана өөр Энүнә дү күүкднь чигн сууналм. Тегәд Исусиг һәәләд, Назаретин улс Терүнд итксн уга.

⁴ – Әәлдәчиг күндлдго һазр уга. Зуг төрскн һазртнь, гертнь болн өрк-бүлднь әәлдәчиг әәлдәчд тоолдмн биш, – гиҗ Исус теднд келв.

⁵ Тенд Исус өвәрц юм һарһҗ чадсмн биш. Зуг цөөкн күн деер һаран тәвәд, тедниг эдгәҗ.

^6а Назаретин әмтн иткл уга бәәснднь, Исус алң болв.

Исус арвн хойр сурһульчнр илгәнә

^6б Тегәд Исус Назаретин эргн шидр бәәсн хотдудар йовад, Сән Зәңг цәәлһв.

⁷ Арвн хойр сурһульчнран чигн дуудҗ авад, хошадар илгәв. Тедндән хар сәкүсдиг көөҗ һарһдг йос өгв.

^8-9 Исус теднд иигҗ закв: – Бийләһән түшх тайгас талдан юм бичә автн. Идх хот-хол, сольҗ өмсх хувц-хунр, түңгрцг чигн, мөңг чигн бичә автн, зуг көлдән буршмг өмстн.

¹⁰ Нег хотнас һарч йовтлан түрүн олҗ авсн бәәрән бичә сольтн.

¹¹ Кемр күн тадниг герүрн орулҗ эс авхла, тадна келсиг эс соңсхла, тер ормас һарч йовад, хормаһиннь тоорминь саҗчктн. Тер темдг теднә гемин герч болҗ һарх.

¹² Тегәд сурһульчнрнь, килнцтә җирһлән үлдәтн гиҗ әмтнд келхин төлә һарад йовцхав.

¹³ Тедн кесг улсас хар сәкүсдиг көөҗ һарһад, гемтә әмтиг оливин тосар түркәд эдгәв.

Уснд кирслдг Йохан яһҗ алгдсна тускар

¹⁴ Исусин туск зәңг олн әмтн дунд тарҗ соңсгдв. Тер учрар Херод хан Терүнә тускар соңсҗ. Зәрмнь Энүг уснд кирслдг Йохан әмдрҗ ирәд, өвәрц йовдлмуд һарһҗ бәәнә гиҗ тоолҗ.

¹⁵ Зәрмнь Исусиг Элья гиҗ сансмн. Зәрмнь болхла Энүг кезәңк әәлдәчнрлә әдл әәлдәч гисмн.

¹⁶ Херод хан терүг соңсад: – Нанар толһаһан тәәрүлсн Йохан әмдрәд ирсн билтәл, – гиһәд ухаһан туңһаҗ.

^17-18 Херод хан эврәннь Пилип дүүһиннь авалиг, Херодидаг, авсмн. Йохан тер йовдлынь бурушаһад: – Дүүһиннь гергнлә бәәх чамд зөв уга, – гиҗ оньдин келдг бәәсмн. Херод хан, терүг түүрмд суулһсмн.

¹⁹ Терүнәс авн Херодида Йоханд дурго болад, терүг алх ирлцәтә учр хәәһәд, олҗ чадсмн биш.

²⁰ Херод хан Йоханыг чик седклтә, Бурхна күүһинь медәд терүнәс әәв. Тер учрар Херод Йоханыг алҗ уга. Йохана келсн үгинь таасад, Херод соңсдмн. Зуг, тер үгмүдин утхнь, терүнд амр өгдмн биш.

²¹ Аш сүүлднь, Йоханыг алх арһ учрҗ. Херод хаана һарсн өдрнь болҗ. Хан нәр кеһәд, нойдуд, цергин ахлачнр болн Һалильян байн улсиг дуудҗ.

²² Тер нәәрт Херодидин күүкн йир сәәнәр биилҗ. Херод хаанд болн гиичнрт күүкнә би дегд икәр таасгдҗ.

²³ Хан икәр таасад, күүкнд: – Ю сурнач, сурсичн күцәнәв! Орн-нутгин өрәлинь чигн өгнәв, – гиҗ андһарлсмн.

²⁴ Күүкн гүүҗ одад, экәсн селвг сурҗ. – Уснд кирслдг Йохана толһаһинь сур, – гиҗ экнь закҗ.

²⁵ Түдл уга күүкн хаанур одад: – Эрк биш уснд кирслдг Йохана толһаһинь тәвүр деер авхулҗ ас, – гиҗ сурв.

²⁶ Хан дегд икәр гейүрв. Зуг күүкнә сурсиг бурушал уга, гиичнрин өөр өгсн үгән күцәх күн болад

²⁷ ялчан илгәһәд, Йохана толһа тәәрҗ авч иртхә гив.

²⁸ Түүрмд суусн Йохана толһаһинь тәәрәд, тәвүр деер ялчнь күүкнд авч ирҗ өгв. Күүкн терүгинь экдән өгчкв.

²⁹ Йохана сурһульчнрнь энүнә тускар соңсад, цогцинь авад оршав.

Исус тавн миңһн кү цадхсна тускар

³⁰ Исусин апостолмуд хәрү ирәд, ямаран керг күцәсән болн ямаран ном әмтнд сурһсан Терүнд келҗ өгцхәв.

³¹ – Нег аглһ һазр олҗ авхмн, тенд тадн невчк амрхт, – гиҗ Исус теднд келв. Өөрнь дегд олн күн цуглрад, хот чигн уудг арһ уга болхлань, Исус тиигҗ келсмн.

³² Оңһцдан сууһад, аглһ һазр орад тедн йовцхав.

³³ Болв оңһцд сууһад йовсинь үзәд, әмтн ардаснь усна көвәһәр гүүлдәд, теднәс түрүлҗ ирҗ.

³⁴ Исус оңһцасн бууһад, олн әмтн эрг деер Бийинь күләҗәсинь үзҗ. Олн әмтн хөөч уга хөд мет бәәхинь Исус үзәд, теднд санань зовад, дала юм сурһв.

³⁵ Асхн, нарн сууҗ йовтл, Исусин сурһульчнрнь өөрдҗ ирәд: – Ора болҗ одв, энтн эҗго һазр.

³⁶ Әмтиг йовулх кергтә. Эргндк хотдуд орад, идх хотан хулдҗ автха, – гицхәв.

³⁷ – Тадн асртн, – гиҗ Исус келв. – Цуг әмтнд күрх өдмг бидн хулдҗ авх зөвтәви? Тедү мөңг олхин төлә маднд долан сар шаху көдлх кергтәлм, – гиҗ сурһульчнр келцхәв.

³⁸ – Кедү кемҗән өдмг үлдсинь медәд иртн, – гиҗ Исус закв. – Тавн бүкл өдмг болн хойр заһсн, – гиҗ тедн хәрү өгцхәв.

³⁹ Исус әмтиг баг-багмудар ноһан деер суулһтха гив.

⁴⁰ Цугтан тәвәһәд, зууһад күн болад зергләд сууцхав.

⁴¹ Исус өдмг заһс хойриг авад, теңгр тал хәләһәд, Бурхнд ханлт өргв. Тиигчкәд өдмгиг зүсм-зүсмәр хуһлад, сурһульчнртан өгв, теднь әмтнд түгәв. Хойр заһсиг бас тиигв.

⁴² Цугтан идәд цадв.

⁴³ Хотын үлдл цуглулхла, арвн хойр савар дүүрң хот үлдҗ.

⁴⁴ Хот идсн әмтиг тоолхла, зуг залу улсин тонь тавн миңһн күн болв.

Исус усн деегүр йовҗ йовна

^45-46 Дарунь Исус сурһульчнртан, оңһцар нур һатлад, Бетсәд гидг һазр ортха гив. Бийнь әмтән йовулхар үлдв. Әмтиг йовсна хөөн өөдм һазрт һарад, Бурхнд мөргв.

⁴⁷ Харңһу сө сурһульчнрнь оңһцарн нуурин тал дунд күрв. Исус һанцарн нуурин көвәд үлдв.

⁴⁸ Сурһульчнран салькна өмнәс хәәвдәд көшҗәхинь үзәд, Исус өр цәәхин өмн усн деегүр тедн тал йовв.

⁴⁹ Оңһциг күцәд давҗ йовтлнь сурһульчнрнь үзәд, ки үзгдл гиҗ медәд, йир икәр сүрдәд, хәәкрцхәв.

⁵⁰ – Бичә әәтн! Зөргтә болтн! Энтн Бив! – гиҗ Исус теднд дууһан өгв.

⁵¹ Исусиг оңһцд орад суусна дарунь салькн тогтнҗ одв. Сурһульчнрнь икәр алң болцхав.

⁵² Тедн хату зүрктә бәәсн төләдән уханасн ода күртл өдмгин туск өвәрц йовдлыг медҗ чадл уга бәәцхәҗ.

⁵³ Нур һатлад, эдн Генесәрет гидг һазрт ирәд бууһад, оңһцан бооцхав.

⁵⁴ Эдниг оңһцасн буухлань, тер һазрин әмтн Исусиг үзн таньв.

⁵⁵ Зәрмнь гүүлдәд, Исус ирв гисн зәңг тарав. Эргндк хотдудас цуг әмтн күнд гемтә улсиг кевтсн девскртәһинь авч ирв.

⁵⁶ Альд, ямаран балһсд, хотдар Исус эс йовв чигн – делгүдән күнд гемтә улсиг әмтн хурдг ормд авч ирцхәдмн. Тедн Исусин хувцна хормаднь болв чигн һаран күргх зөв эрәд сурдмн, Һаран күргснь – эдгҗ оддмн.