Марк 5 - Хальмг келнд орчулсн Әрүн Бичлһс

Исус хар сәкүсдт эзлгдсн кү эдгәҗ бәәнә

¹ Нур һатлад, тедн Геразин гидг нертә һазрур ирцхәв.

² Исусиг оңһцасн буухлань өмнәснь үксн кү оршадг хадын көндәһәс хар сәкүснд эзлгдсн нег күн гүүҗ һарч ирв.

³ Әмтн терүг цевлдгән уурсн учрар тер күн оршалһна һазрт бәәдг болсмн.

⁴ Кедү дәкҗ һар-көлинь цевлсн бийнь тер күн цевән таслад гүүдг сәнҗ. Нег чигн күн энүг тогтнулҗ чаддго бәәсмн.

⁵ Эн күн өдр-сө уга уул заагар йовад, үкәрин һазр эргәд, му дууһар хәәкрәд, махмудан чолуһар цокад йовдг сәнҗ.

^6-7 Исусиг үзн тер күн гүүҗ ирәд сөгдҗ: – Бурхна Көвүн, нанас Танд юн кергтә? Бурхна нерн деерәс сурҗанав, бичә намаг зоваһит! – гиһәд чаңһар хәәкрҗ.

⁸ – Хар сәкүсн, һар эн күүнәс! – гиҗ Исус заксн төләд тер күн тиигҗ келсмн.

⁹ – Нернчн кемб? – гиҗ Исус сурв. – Мини нерн Түмн, юңгад гихлә, мана то олн, – гиҗ тернь хәрү өгв.

¹⁰ – Мадниг эн ормас бичә көөхнтн! – гиһәд тедн ээрцхәв.

¹¹ Уулын өөр идшлҗ йовсн кесг эзнә һахас йовҗ.

¹² – Исус, маднд эн һахас дотр орх зөв өгит? – гиҗ хар сәкүсн сурҗ.

¹³ Исус зөв өгч. Хар сәкүсд тер гемтә күүнәс һарад, һахасиг эзлҗ. Тер дарунь хойр миңһн шаху һахас гүүлдәд, эрг деерәс уснд унад чивҗ одҗ.

¹⁴ Һаха хәрүлчнр гүүһәд, эргндк балһсн болн хошмудын әмтнд юн учрсинь келҗ. Олн әмтн юн болсинь хәләхәр ирҗ.

¹⁵ Тедн Исусин өөр цуглрад, түмн хар сәкүснд эзлгдсн күн хувц өмсчксн ухата-сегәтә суусинь үзәд, дегд икәр сүрдҗ.

¹⁶ Хар сәкүстә күүнлә болн һахасла учрсиг үзсн әмтн цугинь наадксдан келҗ өгч.

¹⁷ Тиигхлә тер һазрин әмтн Исусиг тендәс һарч йовтха гиҗ сурҗ.

¹⁸ Исусиг оңһцд орад суухлань, хар сәкүсдәс сулдсн күн: – Таниг дахч болхий? – гиһәд сурҗ.

¹⁹ Болв Исус зөв өгсмн биш: – Герүрн одад, Деед Эзн чамд ю кесинь, чамаг яһҗ хәәрлҗ авсинь төрл-садндан келҗ өг, – гисмн.

²⁰ Эдгсн күн Декапол һазр орад, әмтнд Исусин тускар келәд йовҗ. Терүнә келсн үгинь соңссн әмтн, икәр өврәд алң болҗ.

Яирин күүк әмдрүллһн болн гемтә күүкд кү эдгәлһн

²¹ Исусиг оңһцар нур һатлад хәрү ирхләнь, өөрнь нуурин көвәд дала улс цуглрад хурҗ.

^22-23 Тедн дунд бәәсн хурлын толһач, Яир, Исус тал өөрдәд, көлднь мөргҗ: – Мини күүкм әрә әмтә бәәнә. Күүкм әмд үлддгәр ирәд, деернь һаран тәвәд эдгәһит? – гиҗ ээрәд сурҗ.

²⁴ Исус терүнлә йовв. Ардаснь олн әмтн дахв. Әмтн дегд олн болад дарцв.

²⁵ Әмтн дунд арвн хойр җилин туршт цусн һардг гемтә күүкд күн йовҗ.

²⁶ Тер күүкд күн кесг олн эмчнрт бийән үзүләд, бәәсн мөңгән цугинь һарһҗ. Зуг гемнь эдгх биш улм икдҗ.

²⁷ Исусин тускар күүкд күн урднь соңсҗ йовҗ. Тегәд ардаснь өөрдҗ одад, хувцнднь һаран күргҗ.

²⁸ «Кемр хувцна хормаднь һаран күргхлә, дарунь эдгхв», – гиһәд тер дотран ухалҗ.

²⁹ Цусн һардг гемнь тер дарунь уурч. Күүкд күн эдгсән медҗ.

³⁰ Исус чигн Терүнәс күн күч авад эдгсинь дарунь медҗ. – Кен Мини хувцнд һаран күргв? – гиһәд ардан хәләҗ.

³¹ – Танд һаран кен күргв гиҗ юңгад сурҗ бәәхмт? Тана ардас олн күн дарцҗ йовналм! – гиҗ сурһульчнрнь сурцхав.

³² Исус цуг олн әмтиг эргҗ хәләһәд, кен һаран күргсинь медҗ авхар седв.

³³ Юн болсинь медсн күүкд күн әәһәд, чичрн йовҗ өөрдҗ ирәд, көлднь сөгдәд, цугинь келҗ өгв.

³⁴ – Күүкн минь, чини итклчн чамаг эдгәв! Энүнәс хооран төвкнүн, эрүл-менд йовҗ йов! – гиҗ Исус келв.

³⁵ Тер зуур цаг удҗ одв. Яирин герәс: – Күүкн өңгрҗ одв. Багшиг бичә үүмүл, – гисн зәңг ирв.

³⁶ Исус түүг төртән авл уга хурлын толһач Яирт: – Бичә ә, итк, – гив.

³⁷ Пётр болн Яков Йохан ах-дү хойрас талдан кү Бийләһән дахулл уга Исус йовв.

³⁸ Яирин герүр орхла, әмтн үүмәтә, зовлңта бәәцхәҗ, оркрад уульҗасн ә соңсгдҗ.

³⁹ Исус орҗ ирн: – Яһад үүмҗәхмт? Юңгад уульҗахмт? Күүкн өңгрсн уга, зуг унтҗ кевтнә, – гихләнь,

⁴⁰ әмтн Исусар наад бәрәд инәлдцхәв. Исус цугинь һазаран һартха гив. Бийнь күүкнә эк-эцктә болн эврәннь һурвн сурһульчнртаһан, күүкнә кевтсн хораһур орв.

⁴¹ Күүкнә һаринь авад Исус: – Талита кум! – гив. (Тернь күүкн бос гидг арамейин келнә үгмүд.)

⁴² Тернь босад йовв. (Күүкн арвн хойрта сәнҗ.) Цугтан икәр өврцхәв.

⁴³ Исус эн өврмҗтә йовдлын тускар, әмтнд бичә келтхә гиҗ закв. Күүкнд болхла хотынь уулһтха гив.