Марк 4 - Хальмг келнд орчулсн Әрүн Бичлһс

Тәрә тәрәчин туск үлгүр

¹ Дәкн Һалилья нуурин көвәд ирәд Исус сурһв. Олн әмтн дегд икәр цуглрсн учрар оңһц дотр сууһад, көвәһәс тедүкнд усчад, Исус үг келв. Олн әмтн нуурин көвәд зогсад соңсв.

² Исус үлгүр орулҗ келәд сурһдг бәәсмн. Ода бас тиигв.

³ – Соңстн! Нег күн тәрәһән тәрхәр йовҗ.

⁴ Цацҗ йовсн тәрәнә экин зәрмнь хаалһ деер унҗ. Теднинь шовуд чоңкад идчкҗ.

⁵ Зәрмнь чолута һазрт унҗ. Тенд һазр баһ болад буудя дарунь урһҗ. Тедн һазрин гүүнд туссн уга.

⁶ Нарн һарад тедниг шатачкҗ. Урһмл хатҗ одҗ. Яһад гихлә, буудян уңгнь йосндан урһҗ чадсн уга.

⁷ Зәрмнь хатханчг заагт унҗ. Хатханчг урһад, буудяг бүтәҗ. Буудя урһц өгсн уга.

⁸ Зуг сән урһцта һазрт унсн тәрәнә экн – һучн, җирн, зун холван үлү урһц өгч.

⁹ Соңсхар седснь, соңстн! – гиҗ Исус аштнь келв.

Исус тәрәчин туск үлгүр цәәлһҗ бәәнә

¹⁰ Хөөннь, әмтн тарад йовҗ одсна ард, арвн хойр сурһульчнь Исусас сурҗ: – Келсн үгинтн утхнь юундньв?

^11-12 – Бурхна Йосна туск нууцин медрл таднд секгдлә. Талдан әмтнд болхла, Би үлгүр орулҗ келҗәнәв. Учрнь: тедн нүдтә бийнь – үзхш, чиктә бийнь – соңсхш. Кемр үздг, соңсдг бәәсн болхла, тедн уха-седклән Бурхнд өгх билә. Бурхн теднә килнцинь тәвх билә, – гиҗ Исус хәрү өгв.

Тәрәчин туск үлгүрин тәәлвр

¹³ Цааранднь Исус иигҗ келв: – Тадн бас Мини келсиг медсн угайт? Тиигхлә талдан үлгүрмүд яһҗ медҗ авхмт?

¹⁴ Тәрәч Бурхна үг келҗәх күн мет.

¹⁵ Зәрм әмтиг хату хаалһ деер унсн буудяла дүңцүлҗ болхмн. Тедн Бурхна Үгиг соңсҗ авв чигн, эрлг агчмин зуур тер Үгинь хулхалад авчкна.

¹⁶ Зәрм әмтн чолута һазр деер унсн буудя мет. Тедн Бурхна Үгиг байрлҗ соңсад тодлҗ авна.

¹⁷ Зуг уңг уга төләдән бат болхш. Тер Үгәс көлтә көөлһ үзхләрн иткдгән уурна.

^18-20 Зәрм әмтн хатханчгта һазр деер унсн буудяла әдл. Өдгә цагин арһ, ик дала зөөр зөөхин арһ хәәнәв гиһәд болн нань чигн седвәрәс көлтә Бурхна Үгинь тодлҗ авдг болв чигн мартчкна. Тер Үг олз өгхш. Болв сән һазр деер унсн буудя мет улс бәәнә. Тедн Бурхна Үгиг соңсад, тодлҗ авад, аш сүүлднь, һучн, җирн, зун холван ик олз авч ирнә, – гив.

Шатҗах шамин тускар

²¹ – Күн шам шатачкад орн дор бултулдг эс гиҗ деерәснь савар бүркдг болхий? Шатҗах шамиг күн деегшән өргҗ тәвнә эсий?

²² Нууц юмн аштнь тәәлгддмн. Бултулсн юмн аштнь илдкҗ һардмн.

²³ Соңсхар седснь, соңстн! – гиҗ Исус келв.

²⁴ – Мини келсн үгд ухаһан өгтн. Ямаран кемҗәһәр тадн кемҗәлнәт, тер кевәр таднд кемҗәлгдх. Терүнәс үлүһәр чигн өггдх.

²⁵ Бәәснднь Бурхн бас чигн өгх, угаһаснь бәәсинь булаһад авчкх, – гиҗ Исус цааранднь келв.

Урһҗах тәрәнәс авчах үлгүр

²⁶ – Бурхна Йосиг иим үлгүрлә дүңцүлҗ болхмн: күн тәрәһән тәрчкәд йовҗ одна.

^27-28 Түүг унтад серәд бәәтл экн экләд урһна. Тәрәнә экн һазрт яһҗ урһҗахинь тер медхш. Өдр ирвәс экн үндсләд, көк ишнь һазрас бултаһад урһна. Урһмл ноһарад, буудя толһална. Буудян толһа чидл авч урһна.

²⁹ Буудя болсн кемлә күн хадуран авч ирәд хадна, – гиҗ Исус немв.

Горчсин экнә туск үлгүр

³⁰ Исус цааранднь келҗ өгв: – Бурхна Йосиг бас юунла дүңцүлҗ болхмб? Ямаран үлгүр олҗ келхмб?

³¹ Бурхна Йосн горчсин экн мет. Горчсин экн цугтаһаснь бичкн эсий?

³² Болв түүнәс урһсн урһмлын ацмуднь шовуд үүрән ясҗ чадм дүңгә зәәтә болна.

³³ Тиигҗ әмтн ухандан тодлҗ авдгар Исус үлгүр орулҗ сурһдг бәәҗ.

³⁴ Үлгүр угаһар, Исус әмтиг сурһдмн биш. Сурһульчнртан болхла үлдәҗ авад, тер үлгүрмүдән цәәлһҗ өгдмн.

Исус шүрүн сальк номһрулҗ бәәнә

³⁵ Асхн харңһурҗ йовтл Исус сурһульчнртан: – Нур һатлад йовхмн, – гив.

^36-37 Соңсҗасн улсан үлдәчкәд, сурһульчнрнь Исусин суусн оңһцар көвәһәс усчад һарв. Теднлә хамдан талдан оңһцс усчв. Генткн шүрүн салькн көдлв, ик дольганд оңһц цокгдад, усар дүүрв.

³⁸ Исус болхла оңһцин сүл талнь дер дерләд кевтәд, унтҗ одҗ. Сурһульчнрнь Терүг серүләд: – Багш! Бидн чивҗәнәвидн! Танд йилһл уга болҗ бәәнү?! – гицхәв.

³⁹ Исус босад шүрүн салькиг уурулад, нуурин уснд: – Тагчг бол, тогтн! – гиҗ закв. Тер дарунь салькн номһрад, нур тогтнв.

⁴⁰ – Юунас әәсмт? Тадн ода күртл иткл уга бәнт? – гиҗ сурһульчнрасн сурв.

⁴¹ Теднь сүрдәд, нег-негн талан хәләцхәв: – Салькн усн хойрт Эн зәрлг болна, теднь үгинь соңсна. Кен гидг күнв эн? – гицхәв.