Марк 3 - Хальмг келнд орчулсн Әрүн Бичлһс

Исус әмн уга һарта кү эдгәҗ бәәнә

¹ Исус дәкн хурлд орҗ ирв. Тенд әмн уга һарта күн бәәҗ.

² Бемб өдр кү эмнх угаһинь гетәд, бурушахар седҗ бәәсн улс чигн тенд сууҗ.

³ Исус тер әмн уга һарта күүнд: – Босад, уралан һар! – гиҗ келәд,

⁴ суусн әмтнәс сурв: – Бемб өдрлә сә кех зөвтәй, эс гиҗ му кех зөвтәй? Күүг үкләснь харсҗ авхмб эс гиҗ алхмб? Теднь тагчг бәәв.

⁵ Исус тедн тал ууртаһар эргҗ хәләһәд, теднә хату зүркнд һашудҗ. Әмн уга һарта күүнд: – Һаран суңһ! – гиҗ. Гемтә күн һаран суңһхлань, һарнь эдгҗ одв.

⁶ Паршмуд эн тоотыг үзәд хурлас һарн, Херодын улсла зөвчләд, Исусин үклинь хәәх болцхав.

Сурһульчнрнь Исусин өөр цуглрҗ бәәнә

^7-8 Исус эврәннь сурһульчнртаһан нуурин көвә тал һарад йовв. Ардаснь Һалильяс, Йудьяс, Ерусалимас, Идүмьяс болн Йордана телтр көвәһәс олн әмтн йовв. Тир болн Сидон балһсдын эргнд бәәдг әмтн Исусин күцәсн йовдлмудын тускар соңсчкад, бас ирцхәв.

⁹ Нуурин көвәһүр дегд олн күн ирәд, Исуст күрхәр седәд дарцсн учрар, оңһц белдтн гиҗ сурһульчнртан Исус даалһв.

¹⁰ Урднь кесг әмт эдгәсинь соңссн гемтә улс цугтан Исуст һаран күргхәр седв.

¹¹ Хар сәкүснд эзлгдсн улс Исусиг үзчкәд, Терүнә өмн сөгдҗ унад: – Та Бурхна Көвүнт! – гиһәд хәәкрлдцхәв.

¹² – Бичә Намаг Бурхна Көвүн гиҗ әмтнд келтн, – гисн догшн зака теднд Исус өгв.

Арвн хойр апостолмуд йилһҗ авлһн

¹³ Исус уул давшад, Бий талан санан-седкл туссн улсан дуудв. Теднь Терүн тал ирв.

¹⁴ Исус арвн хойр кү йилһҗ авв. Тедн апостолмуд гиҗ нерәдгдҗ. Тедн Терүнлә хамдан бәәһәд, Сән Зәңг тархахин төлә йовулгдх зөвтә бәәҗ.

¹⁵ Исус теднд хар сәкүсдиг көөҗ һарһх йос өгв.

¹⁶ Шимониг Пётр гиҗ нерәдәд,

¹⁷ Зебедана Яков болн Йохан гидг ах дү хойриг оһтрһун көвүд гиҗ Исус нерәдв (теднә заңгнь оһтрһун бәәдлтә сәнҗ),

¹⁸ Андрейиг, Пилипиг, Бар-Толмаг, Матайиг, Томасиг, Алпана көвүн Яковиг, Таддаг, зилот багин гешүн Шимониг

¹⁹ болн хөөннь Бийинь өшәтнрт бәрүлҗ өгсн Йуда Искериотиг йилһҗ авв.

Евреймүдин көгшәс Исусиг гемшәҗәнә

²⁰ Тедниг герүр орҗ ирхләнь, дәкн олн күн цуглрад, хот чигн уулһсн уга.

²¹ Энүнә тускар соңссн Исусин төрл-саднь, Терүнә ухань көндрҗ одҗ гиҗ соңсад, күчәр авч хәрхәр седцхәв.

²² Ерусалимас ирсн ном цәәлһәчнр, Исусиг Баал-Зебүльд эзлгдәд, терүнә күчәр хар сәкүсдиг көөҗ һарһҗана гисн зәңг һарһцхаҗ.

²³ Исус тедниг дуудҗ авад, үлгүр орулад иигҗ келҗ өгв: – Эрлг яһҗ эврән бийән көөҗ һарһхмб?

²⁴ Нег орн-нутгин улс хоорндан өшәркәд әңгрхлә, тер орн-нутг хольврҗ одна.

²⁵ Нег гер-бүлин улс ни-негн бәл уга, нег-негән даҗрхар седхлә, тер гер-бүл буурч одна.

²⁶ Эрлг эврән бийләһән дәәлдхлә, терүнә йосн бас хольврҗ одх зөвтә.

²⁷ Чидлтә күүнә геринь тонхин өмн эзинь бәрҗ авч күлх кергтә.

²⁸ Тодлҗ автн: әмтнә килнцнь чигн тәвгдх, Бурхна тускар му келснь чигн тәвгдх.

²⁹ Зуг Әрүн Сәкүснә тускар му келсн күүнә килнцнь төрүц тәвгдшго. Тер күн мөңкинд килнцән эдлх.

³⁰ Ном цәәлһәчнр Исусиг хар сәкүснд эзлгдв гисн зәңг һарһсн учрас Исус тиигҗ келсмн.

Исусин гер-бүлнь – сурһульчнрнь

³¹ Исусин экнь болн дүүнрнь ирҗ. Күн дүүрң герт орҗ эс чадхларн, тедн Исусиг дуудулҗ.

³² – Исус, эктн болн дүүнртн ирәд Таниг дуудҗана, – гихлә, Исус:

³³ – Мини ээҗм, Мини дүүнрм кемб?

³⁴ Бийиннь өөр суусн әмтиг эргҗ хәләһәд: – Үзҗ автн, Мини ээҗм, дүүнрм эн бәәнә.

³⁵ Бурхна заасиг күцәдг әмтн – Мини ээҗнр, ахнр болн эгчнр-дүүнр.