Марк 2 - Хальмг келнд орчулсн Әрүн Бичлһс

Исус көл-һарнь тәкрсн кү эдгәв

¹ Цөөкн өдрин хөөн Исусиг хәрү Капернам балһснд ирхлә, агчмин зуур зәңг тарҗ.

² Әмтн дегд олар цуглрад, Исусин бәәсн герин үүднднь шинәс ирсн әмтнд күрдг арһ уга болҗ. Исусиг Сән Зәңг әмтнд келҗ өгч бәәтл,

³ дөрвн залу һар-көлнь тәкрсн кү авч ирв.

⁴ Исусин герт орҗ болшгоһинь үзәд, тедн герин ораһинь цумлад, гемтә үүрән кевтсн девскртәһинь буулһв.

⁵ Исус теднә итклинь үзәд, һар-көлнь тәкрсн күүнд: – Көвүн Минь, чини килнцчн тәвгдҗәнә! – гив.

^6-7 Тенд суусн ном цәәлһәчнрин зәрмнь дотран иигҗ ухалв: – Юн гидг юмн болҗахмб? Бурхнас талдан кен күүнә килнц тәвҗ чаддв? Эн Бурхна тускар му келҗәнә.

⁸ Тер дарунь теднә дотран ухалҗасиг Исус медәд: – Тадн тиим уха юңгад ухалҗахмт? – гиҗ сурв.

⁹ – Эн тәкрсн күүнд яһҗ келсн амр болх: «Килнцчн тәвгдҗәнә» гисн эс гиҗ: «Бос, кевтсн девскрән эвкҗ авад йов!» гисн амр болхий?

¹⁰ Болв Би, Күмни Көвүн, һазр деер килнц тәвх йостав гиҗ таднд медүлхин төлә келҗәнәв, – гиһәд, һар-көлнь тәкрсн күүнд:

¹¹ – Бос, кевтсн девскрән авад хәр! – гив.

¹² Тернь әмтнә өмн босад, девскрән эвкҗ авад, һарад йовҗ одв. Энүг үзсн улс дегд икәр өврәд, Бурхнд ханлт өргәд: – Иим өвәрц юм бидн төрүц үзәд уга биләвидн! – гицхәв.

Исус Левиг дуудҗана

^13-14 Исус дәкн нур тал йовв. Дәкн олн күн өөрнь цуглрв. Исус тедниг эврәннь номар сурһв. Нуурин көвәһәр йовҗ йовад, Исус тамһин герт көдлҗәсн кү үзв. Тер Леви гидг нертә Алпана көвүн бәәҗ. – Намаг дахад йов, – гиҗ Исус келв. Тернь босад дахв.

¹⁵ Исус сурһульчнртаһан Левин герт хот ууһад сууҗ. Алв цуглулдг кесг әмтн болн талдан чигн килнцтә улс теднлә сууцхаҗ. Исусиг йирдән олн зүсн әмтн дахдг бәәсмн.

¹⁶ Алв цуглулдг болн килнцтә әмтнлә хамдан хот ууҗасинь үзәд, парш багин ном цәәлһәчнр Исусин сурһульчнрт келцхәв: – Яһад алв цуглулдг килнцтә улсла багштн хот ууҗахмб?

¹⁷ Терүгинь Исус соңсчкад: – Эрүл күүнд биш – гемтә күүнд эмч кергтә. Чик седклтәһинь биш, килнцтәһинь дуудхар Би ирләв, – гив.

Мацг бәрлһнә туск зүтквр

¹⁸ Уснд кирслдг Йохана болн паршмудын сурһульчнрнь мацг бәрҗ. – Йохана болн паршмудын сурһульчнрнь мацг бәрнә, Тана сурһульчнртн бәрхшлм? – гиҗ әмтн Исусас сурцхаҗ.

¹⁹ – Хүрмд ирсн гиичнр хот ул уга бәәхий? Хүрмин хотыг күргнлә хамдан тедн ул уга бәәшго.

²⁰ Зуг цагнь ирәд гиичнрәс күргн салһҗ авгдхла, гиичнрнь мацг бәрх.

²¹ Хуучрад салврҗ одсн хувцнд шин халас тәвдмн биш, эс гиҗ шин халасн хуучн хувциг цааранднь теслх. Хаһрхань улм икдх.

²² Күчән авчах чаһриг хуучн бөрвд кедмн биш. Кемр күчән авчах чаһриг хуучн бөрвд кехлә, бөрв шуурх. Тиигхлә бөрв чигн, үрх чаһр чигн асхрх. Тер төләд күчән авчах чаһриг шин бөрвд күн кенә, – гиҗ хәрү өгв.

Бемб өдрин тускар

²³ Нег дәкҗ, бемб өдр, Исус тәрә тәрсн һазрар йовҗ. Терүнә сурһульчнрнь гесндән өлг авхин төлә буудян толһа таслҗ идҗ.

²⁴ Паршмуд терүгинь үзәд Исусас сурҗ: – Бемб өдрлә кех зөв уга юм тедн яһад кеҗ бәәхмб?

²⁵ Исус өмнәснь иигҗ келҗ: – Тадн Давидин тускар умшсн угавт? Үүрмүдтән өлсҗ йовад, тер юуһар гесндән өлг авсмб? Ах гелң Абьятарин цагт Давидин геснь өлсҗ йовҗ.

²⁶ Бурхна герт орад, гелңгәс талдан күн авч идх зөв уга, Бурхна өмн тәвсн өдмгиг авч идәд, хамдан йовсн әмтндән чигн өгләлм.

²⁷ Бурхн күүг бемб өдрин төлә үүдәсмн биш, бемб өдр күүнә төлә тогтсмн.

²⁸ Тер учрар Күмни Көвүн бемб өдрин чигн Эзнь мөн, – гив.