Марк 15 - Хальмг келнд орчулсн Әрүн Бичлһс

Исус Пилатин өмн

¹ Өрүн өрлә ах гелңгүд, еврейин толһачнр, ном цәәлһәчнр болн талдан Деед хургин гешүд селвг авлцад, Исусиг күләд, Пилатур авч одв.

² – Чи Йудья улсин хан болҗахмч? – гиҗ Пилат Исусас сурв. – Та тиигҗ келҗәнмт, – гиҗ Исус хәрү өгв.

³ Ах гелңгүд Исусиг икәр бурушаҗ гемшәв.

⁴ – Хәрү юңгад эс өгнәч? Чамаг икәр гемшәҗәнәлм, үзҗ эс бәнчи? – гиҗ Пилат сурв.

⁵ Болв Исус хәрү өгсн уга, Пилат Терүнд дегд икәр алң болв.

Исусиг цааҗлх йоста

⁶ Байрин өдр бәәҗ. Тегәд түүрмд суусн әмтнәс негинь Пилат сулдхдг йоста бәәсмн. Кениг сулдххинь – олн әмтн шүүҗ авдг йоста бәәҗ.

⁷ Тиигхд Бар-Аба гидг нертә күн түүрмд сууҗ. Барб буцлт өргсн улсла хамдан әмт алсн төләдән гемшәгдҗ.

⁸ Пилатас әмтн байрин өдрин өмн нег кү сулдхтха гиҗ некҗ.

⁹ – Йудья улсин хааг тадна төлә сулдххмн болвза? – гиҗ Пилат сурҗ.

¹⁰ Ах гелңгүд Исуст үлү үздг төләдән зарһла харһулҗахинь Пилат медчкҗ.

¹¹ Ах гелңгүд әмт түкрәд, Пилатас Бар-Аба сулдхтха гиҗ сурулҗ.

¹² – Йудья улсин хан гиҗ нерәдсн күүһитн яахмб? – гиҗ Пилат теднәс сурҗ.

¹³ – Терүг кирст хадчк! – гиҗ әмтн хәәкрв.

¹⁴ – Яһснднь тиигхмб? Ямаран хаҗһр һарһсмб? – гиҗ Пилат сурв. – Кирст хадчк Терүг! – гиһәд әмтн улм чаңһар хәәкрцхәв.

¹⁵ Тегәд әмтнә бахинь хаңһахин төлә Пилат Бар-Абаг сулдхаһад, Исусиг цокад, цааҗла харһултха гив.

¹⁶ Цергчнр Исусиг өмнк хотн дотр (Римин һардачин зарһ кедг орм) авч одад, үлдсн цергүдән дуудҗ авцхав.

¹⁷ Тедн дөөгләд, Исусин толһа деернь хатханчгар гүрсн титм күчәр өмскәд, улан хувц көдргәд:

¹⁸ – Йудья улсин хан менд болтха! – гиҗ хәәкрәд,

¹⁹ Исусин толһаһарнь модар цокад, деернь нульмад,

²⁰ дөөглҗ сөгдәд, улан хувцинь тәәлҗ авад, Бийиннь хувцинь хәрү өмскәд, цааҗлһна һазрур көтләд һарцхав.

Исусиг цааҗллһн

²¹ Оңдан һазрас йовҗ йовсн Шимон гидг нертә Күрәнә балһсна күн зуурнь харһҗ. Тер Александр Руп хойрин эцк сәнҗ. Цергчнр терүг кирс авч йовтха гиҗ закв.

²² Тегәд Исусиг Голготур авч ирҗ (Голгот – һавл гиҗ орчулгдна).

²³ Цергчнр Исуст миррин уснла хольсн чаһр уутха гиһәд өгхлә, Исус ууҗ уга.

²⁴ Исусиг кирст хадчкв. Хувцинь болхла җирв хаяд, цергүд хоорндан хуваҗ авцхав.

²⁵ Эн цааҗлһн өрүн йисн часин алднд болҗ.

²⁶ Толһа деернь гем-буруһинь бичдг ормд: «Йудья улсин хан» – гиҗ бичәтә харһа өлгҗ.

^27-28 Исусин барун бий, зүн бий тал хойр деермч кү бас кирст хадҗ.

²⁹ Хаҗуһарнь йовҗ йовсн улс, Исусар зог кеһәд, инәлдәд, өргән заңһад: – Нә, яһвч! Һурвн өдрин туршт сүм хамхлад, хәрү тосхх болҗ бәлчи?

³⁰ Тиигхин ормд кирсәсн бууһад, әмән харсҗ авхнчн! – гицхәв.

³¹ Ах гелңгүд болн ном цәәлһәчнр бас Терүг дөөглв: – Әмт аврад йовдг билчи, бийән аврҗ эс чаддмч! Эн Бурхна илгәсн Аврач болн Израилин Хан кирсәсн буухла, бидн Терүнд иткхвидн, – гицхәв.

³² Хамдан кирст хадгдсн деермчнрин бийнь Исусиг му келцхәв.

Исусин үкл

³³ Арвн хойр часин алднд һазр деерк генткн харңһурад, һурвн час күртл бәәв.

³⁴ Һурвн часин алднд Исус: – Элои, Элои, лема сабахтани! – гиһәд чаңһар хәәкрв. (Тернь – «Бурхн минь, Бурхн минь, Намаг юңгад үлдәсмч?» – гисн үг сәнҗ.)

³⁵ Өөрнь зогсҗасн улс келсн үгинь соңсчкад: – Эн Эльяг дуудҗах кевтә? – гицхәв.

³⁶ Теднә негнь модна үзүрт кенчр ораһад, ишклң чаһрт норһад, амнднь күргәд: – Кирсәс Энүг Элья яһҗ буулһҗ авхинь хәләхмн, – гив.

³⁷ Исус чаңһар хәәкрв, дарунь әмнь һарв.

³⁸ Тер саамла һол сүмин көшг деерәс дорагшан хойр әңгрәд шуурв.

³⁹ Рим әңгин цергин ахлач Исусин әмнь һарсинь үзәд: – Эн үнәртән Бурхна Көвүн бәәҗлм! – гив.

⁴⁰ Хол биш зогсҗасн күүкд улс энүг цугинь үзҗ. Тедн дунд: Магдален хотна Марий, баһ наста Яковин болн Йосьян эк Марий болн Салома бәәцхәҗ.

⁴¹ Эн күүкд улс Исусла хамдан Һалильяд йовад, нөкд болсн улс бәәҗ. Исусиг дахад, Ерусалимд ирсн нань чигн дала күүкд улс терүнд бәәсмн.

Исусиг оршалһн

^42-43 Асхар болсн йовдл бәәҗ. Деед хургт орлцдг, бийнь Бурхна Йос күләдг Ариматья хотнас ирсн Йосип гидг нертә күн зөрмгләд Пилатур одад, Исусин цогцинь сурҗ. Яһад гихлә, бемб өдрин өмн, байрт белддг өдр бәәҗ.

⁴⁴ Тиим шулун Исусин әмнь һарч одснд Пилат алң болҗ. Цергә әңгин ахлачиг дуудад, лавта Исусин әмнь һарсн угаһинь сурв.

⁴⁵ Исусин әмнь һарсинь медҗ авад, цогцинь Йосипд өгв.

⁴⁶ Йосип Исусин цогцинь буулһад, үнтә һара цаһан кенчр хулдҗ авад ораһад, хад чолунд шин кесн үкәрт авч одҗ тәвәд, ордг орминь ик чолуһар дарчкҗ.

⁴⁷ Исусин цогцинь альд тәвсинь Магдален хотна Марий болн Йосьян эк Марий хойр үзҗ.