Марк 14 - Хальмг келнд орчулсн Әрүн Бичлһс

Исусиг алх зура

¹ Хойр өдр давад, Песах гидг нертә байр болн эс искәсн һуйрин байр болх зөвтә сәнҗ. Еврейин ах гелңгүд болн ном цәәлһәчнр Исусиг нууцар бәрҗ авад, алх арһинь хәәҗ.

² – Эн ик байрин өдр иим йовдл һарһҗ болшго, эс гиҗ олн әмтн үүмә босхах, – гиҗ тедн хоорндан күүндҗ.

Күүкд күн Исусин толһад каңкнсн үнртә тос кеҗәнә

³ Исус болхла Бетәнья гидг хотнд бәәсмн. Арсна гемтә Шимона герт хот уудг ширән өөр Исусиг суутлнь, нег күүкд күн орад, сәәхн каңкнсн үнртә һара нард модна үнтә тос авч ирәд, савин амнь хуһлад Исусин толһа деернь кев.

^4-5 – Юңгад тиим дала мөңгнә юм эн үрәҗәхмб? Тер тосиг хулдад, мөңгинь угатя улст түгәҗ болхмн билә, – гиҗ уурлад, әмтнә зәрмнь нег-негн талан хәләцхәв (Тернь – нег күн җилин дуусн эдлх зөвтә мөңгнә тосн сәнҗ).

⁶ – Энүг бичә көндәтн! Эн Нанд цаһан седклтә юм кеҗәнә.

⁷ Таднла оньдин угатя улс үлдх. Теднд кезә чигн дөң болҗ чадҗанат. Би болхла таднла оньдин бәәшгов.

⁸ Эн күүкд күн чадсан кев: Мини цогциг оршалһнд белдв.

⁹ Үнәр таднд келҗәнәв: Альд Сән Зәңг цәәлһгднә, тенд эн күүкд күүнә кесн йовдлын тускар тодлҗ келгдх, – гиҗ Исус теднд келв.

Йудан урвлһн

¹⁰ Йуда Искериот (арвн хойр сурһульчнрин негнь). Исусиг бәрҗ өгхәр седәд, ах гелңгүд тал одв.

¹¹ Ах гелңгүд үгинь соңсчкад, икәр байрлад, түүнд мөңг өгх болв. Терүнәс авн Йуда Исусиг бәрҗ өгх арһинь хәәв.

Исус Песахин хот эдлҗәнә

¹² Эс искәсн һуйрин байр болх түрүңк өдртнь сетрә хурһ алх кемлә Исусин сурһульчнрнь: – Альд байрин хот уухар седҗ бәәнәт? Келтн, бидн белднәвидн, – гиҗ сурв.

¹³ Тиигхләнь Исус сурһульчнрасн хойринь йовулад иигҗ закв: – Балһснд орхлатн, буһшта ус авч йовсн күн таднла зөрлцх, терүнә ардас йовтн.

¹⁴ Тер күүнә орсн герүр орад, герин эзнднь иигҗ келтн: «Сурһульчнртаһан альд байрин хот ууҗ болхинь Багш танас сурҗана» – гитн.

¹⁵ Тер күн таднд деер бәәсн у-өргн, сәәхн ясата хора үзүлх. Тенд хот белдтн, – гив.

¹⁶ Сурһульчнрнь балһс орв. Тедн Исусин келсәр цугинь олҗ авад, байрин хотан белдцхәв.

¹⁷ Асхнднь Исус арвн хойр сурһульчнртаһан ирв.

¹⁸ – Үнәр келҗәнәв, Нанла хамдан хот ууҗасн тадна негнтн Намаг бәрүлҗ өгх, – гиҗ хотан ууҗасн цагт Исус келв.

¹⁹ – Деед Эзн, би биш эсий? – гиҗ сурһульчнрнь Исусин келсн үгднь уйдад сурв.

^20-21 – Арвн хойрас негнь, – гиҗ Исус келв, – Нанла хамдан ааһд өдмг шүүслҗ идҗәснь. Би, Күмни Көвүн, әәлдәчнрин әәлдсн хаалһар йовхв, Намаг бәрүлҗ өгсн күн зовлңган эдлх! Тер күүнд, төрүц эс төрсн болхла, деер болх билә.

Деед Эзнә асхни хот

²² Исус хотан ууҗаһад, өдмг авад, Бурхнд ханлтан өргәд, хуһлад, сурһульчнртан өгв: – Идтн, энтн Мини бий цогцм, – гив.

²³ Дарунь ааһд бәәсн улан чаһр авад, Бурхнд ханлт өргәд, бас сурһульчнртан өгв. Цугтан ааһас ууцхав.

²⁴ – Энтн олн әмтнә төлә асхрх болн Мини Бооца эклх Мини цусн.

²⁵ Үнәр келҗәнәв: Бурхна Йоснд шин чаһр уутлан дәкҗ Би эн насндан чаһр уушгов, – гив.

²⁶ Тедн Бурхнд магталын ду дуулад, Олив уул тал темцәд һарцхав.

Нанас гөрдхич гиҗ Исус Пётрт әәлдҗәнә

^27-28 – Тадн цугтан Намаг үлдәхт. «Би хөөчинь уга кехв, хөөднь тарх», – гиҗ Бурхна Бичгт бичәтә бәәнәлм. Болв әмдрчкәд, Би тадниг Һалилья гидг һазрт күләхв, – гиҗ Исус келв.

²⁹ – Цугтан үлдәвв чигн, би Таниг төрүц хайшгов, – гиҗ Пётр келв.

³⁰ – Үнәр келҗәнәв, эндр сө эр така хойр дәкҗ хәәкртл чи һурв дәкч Намаг медхшв гиҗ келхич, – гисн хәрү Пётр соңсв.

³¹ – Танла хамдан үкдг болв чигн, би Таниг үлдәшгов! – гиҗ Пётр үгән давтҗ келв. Сурһульчнрнь цугтан тиигҗ келцхәв.

Исусин мөрглһн

³² Эдн цугтан Гетсемән гидг модта һазр орв. – Намаг одад зальврад иртл, энүнд күләҗ бәәтн, – гиҗ Исус сурһульчнртан келв.

³³ Исус бийләһән Пётр, Яков болн Йоханыг дахулв. Исус ик зовлңшв, седклнь үүмсн бәәв.

³⁴ – Мини седклм уудьврта бәәнә, Би үктлән зовҗанав, саг-серглң энүнд бәәҗәтн, – гиҗ Исус келв.

³⁵ Тер зовлң хаҗуһарнь һарх болвза гиһәд Исус хооран һарад, һазр элкдҗ унад зальврв.

³⁶ – Аав, Эцкм! Та цугинь чаднат! Эн Мини үзх зовлңгиг хаҗуһар һарһхнтн! Болв Мини таалар биш, Тана таалар болтха! – гив.

^37-38 Дарунь сурһульчнр талан хәрү ирәд, тедниг унтҗ одсинь үзв. – Шимон, – гиҗ Пётриг дуудв, – Чи унтҗ одвчи? Нег часин болзгт унтл уга бәәҗ болсн угай? Сөрлһнлә харһшгон төлә зальвртн, серглң бәәтн. Күүнә сүмснь чидлтә, зуг күүнә цогц чинән-чидл уга болдмн.

³⁹ Исус сурһульчнрасн хооран һарад, үгмүдән давтад мөргв.

⁴⁰ Терүг хәрү ирхләнь, сурһульчнрнь цугтан унтад кевтцхәҗ. Тедн нөөртән даргдад, нүдән секҗ чадл уга, Исуст ю келхән медҗ уга.

^41-42 Һурвдад ирхләрн Исус келв: – Тадн ода күртл унтад, цогцан амраһад бәәхмт? Болх! Цагнь ирв, Күмни Көвүн килнцтә улсин һарт бәргдҗәнә. Бостн, йовий! Намаг бәрҗ өгх күн аашна, – гив.

Исусиг бәрҗ авлһн

⁴³ Исусиг үгән келҗәсн цагт сурһульч болҗ йовсн Йуда өөрдҗ ирв. Терүнә ардаснь һартан мод болн үлд бәрсн улс аашҗ. Тедниг ах гелңгүд, ном цәәлһәчнр болн толһачнр йовулҗ.

⁴⁴ – Мини өөрдәд үмссн күн Исус болх, – гисн темдг урвач тер әмтнд медүлх зөвтә бәәҗ. Тадн Түүг бәрҗ авад, харулд бәрүләд йовтн, – гив.

⁴⁵ Йуда өөрдҗ ирн Исусиг: – Багш! – гиҗ келәд теврәд үмсв.

⁴⁶ Тер дарунь Исусиг бәрҗ авцхав.

⁴⁷ Хаҗуд зогсҗасн сурһульчнрин негнь үлдән һарһҗ авад, ах гелңгин зарцин чикинь тәәрчкв.

^48-49 – Мод үлд хойр атхад, деермч кү бәрҗәх кевәр яһад ирсмт? Өдр болһн Би тадниг һол сүм дотр сурһсн бәәнәлм, тадн Намаг бәрҗ авсн угалмт? Болв Бурхна Бичгт бичәтә юмн күцгдх зөвтә, – гив.

⁵⁰ Сурһульчнрнь Исусиг үлдәчкәд, цугтан гүүлдәд йовҗ одв.

⁵¹ Зуг нег баһ наста күн Исусин ардаснь йовсмн. Тер бий деерән хөңглдңгәр хуча көдрчксн йовҗ.

⁵² Бийинь бас бәрҗ авхар седхләнь, хучаһан цергүдин һарт үлдәчкәд, дотрк хувцтаһан гүүһәд йовҗ одҗ.

Исус Деед хургин өмн

⁵³ Ах гелңгин герт Исусиг көтлҗ авч ирхлә, терүнд цуг ах гелңгүд, толһачнр болн ном цәәлһәчнр цуглрад Деед хург кеҗ.

⁵⁴ Пётр бас эс медгчәр ардаснь йовад, ах гелңгин хотн дотрнь орад, харулчнрла хамдан дендрин өөр сууһад дуладв.

⁵⁵ Еврейин ах гелңгүд Деед хургт орлцдг улстаһан Исусиг яһҗ гемшәҗ, засгла харһулхан медҗ чадлго бәәв.

⁵⁶ Худлахар герчлх улс олддг болв чигн, теднә келсн үгмүднь нег-негнләһән ирлцҗ уга.

^57-58 – Энүг иигҗ келҗәсинь бидн соңславидн: «Би эн әмтнә бәрсн сүмиг хамхлад, һурвн өдрин туршт әмтнә эс тосхдг сүм тосххв гидг билә», – гиҗ худл герчнр келцхәв.

⁵⁹ Болв терүг чигн хаҗһр келәд, күн болһна үгнь ирлцҗ уга.

⁶⁰ Дарунь еврейин ах гелң босад: – Юңгад хәрү эс өгч бәәхмбч? Әмтнә гемшәлһнә өмнәс ямаран хәрү өгхмч? – гиҗ Исусас сурв.

⁶¹ Болв Исус нег чигн үг келсн уга. – Чи үнәртән Бурхна илгәсн Аврач, үнәртән әдстә Бурхна Көвүн болҗахмч? – гиҗ ах гелң сурв.

⁶² – Э-э, тиим, Күмни Көвүн Бурхна барун бий талнь суусинь, үүлн заагт теңгрәс аашсинь тадн үзхит, – гиҗ Исус хәрү өгв.

^63-64 Ах гелң өмсҗәсн хувцан татҗ шуулад: – Түүнәс үлү ямаран герч таднд кергтәв? Бурхиг му келҗ бәәхинь тадн эс соңсвт? Энүнә тускар ю келцхәнәт? – гив. Исус үкх зөвтә гиҗ цугтан тоолв.

⁶⁵ Тегәд зәрмнь Исус деер нульмад, нүдинь бооһад, толһаһарнь цокад: – Мә чамд, кен цокҗахинь әәлдҗ кел! – гицхәв. Дарунь Исусиг харулчнр авч һарад, бас цокв.

Пётрин Исусас зәәлҗ гөрдлһн

⁶⁶ Пётриг хотн дотр бәәтл ах гелңгин зарц күүкд күн хаҗуһарнь йовв.

⁶⁷ Һалын өөр дуладҗасн Пётрт оньган өгәд хәләчкәд: – Чи бас Назаретин Исусла биләлмч? – гиҗ сурв.

⁶⁸ – Юуна тускар келҗәхичн би төрүц медҗ бәәхшв, – гиҗ Пётр гөрдәд өмнк хотн тал һарв. Тер кемлә эр така хәәкрв.

⁶⁹ Зарц күүкд күн дәкн терүг үзчкәд, хаҗуд зогсҗасн әмтнд: – Эн бас Терүнә үүрнь, – гиҗ келв.

⁷⁰ Пётр дәкн гөрдв. Невчкн цаг давсна хөөн зогсҗасн әмтн: – Терүнә үүрнь мен бәәләлмч, Һалильян күн эсий чи? – гиҗ сурцхав.

⁷¹ – Кенә тускар келҗәхитн би төрүц медҗәхшв, – гиҗ Пётр андһар тәвв, – Худл келҗәхлә, намаг Бурхн цааҗлтха!

⁷² Дарунь хойрдад эр така хәәкрв. «Эр така хойр дәкҗ хәәкртл, чи һурв дәкҗ Намаг медхшв гиҗ келхич», – гисн Исусин үгинь тодлад, Пётр һашудад уульв.