Марк 12 - Хальмг келнд орчулсн Әрүн Бичлһс

Му көдләчнрин туск үлгүр

¹ Исус дәкн үлгүр орулҗ әмтиг сурһв: – Нег күн уста үзм тәрәд, хашалад, үзм шахдг нүк малтад, харулын цамхаг бәрҗ. Дарунь көдләчнр нәәмәдлҗ авад, уста үзм тәрсн һазран даалһад, бийнь йовҗ одҗ.

² Урһц ахулх кемлә эзн эврәннь хүвән авулхар, зарцан йовулҗ.

³ Нәәмәдлҗ авсн көдләчнрнь зарцинь бәрҗ авад цокад, юм өгл уга көөчкҗ.

⁴ Эзн дарук зарцан йовулҗ. Көдләчнр түүнә толһаһинь цоолад, неринь һутаһад тәвҗ.

⁵ Эзн һурвдгч зарцан йовулҗ – терүгинь алчкҗ. Кедү дәкҗ кү йовулсн бийнь – зәрминь алад, зәрминь цокад йовулҗ.

⁶ Аш сүүлднь, эзн эврәннь һанцхн эңкр көвүһән илгәҗ. «Көвүһим тедн тевчх зөвтә», – гиҗ эзн санҗ.

⁷ Көдләчнр нег-негндән келҗ: Эн өнч эзлгч күн! Энүг алад, уста үзмин тәрәнә эздүд болхмн.

⁸ Көвүһинь бәрҗ авад алчкҗ. Цогцинь уста үзм тәрсн һазрас һарһад хайчкв.

⁹ Эзн ирәд, юн болсинь үзчкәд, яах гиҗ санҗанат? Тер көдләчнриг алад, тәрәһән талдан улст даалһх.

^10-11 «Тосхачнрин һолсн чолун герин өнцгин һол чолун болв. Бурхн эн керг күцәсмн. Бидн энүг үзәд өврләвидн», – гиҗ Бурхна Бичгт бичәтә бәәсиг тадн умшсн уга болвзат? – гиҗ Исус үгән төгсәҗ сурв.

¹² Ах гелңгүд бийсән келҗәхинь медәд, Исусиг тер дарунь бәрҗ авхар седцхәв. Зуг хаҗуднь дегд олн күн бәәснд әәһәд, көндәсн уга.

Паршмуд Исусиг меклхәр седҗ бәәцхәнә

¹³ Хөөннь тедн Исус тал паршмуд болн Херодын улсиг илгәһәд, үг деернь бәрҗ авх арһ хәәв.

¹⁴ – Багш! Чамаг үн келҗәхинь бидн меднәвидн. Чи Бурхна заасар дасхнач. Тер учрар әмтн ю санҗахинь чи оньгтан авхшич, күүнә чирә чи хәләхшич. Келҗ өгич: Римин хаанд алв өгх зөвтәй аль угай? – гисн сурвр теднь ирәд өгцхәҗ.

¹⁵ Исус тедниг хойр чирәтәһинь медәд: – Тадн Намаг үг деер бәрҗ авхар седҗ бәәнә эсийт? Шаальг авад иртн, – гиҗ.

¹⁶ Шаальг авч ирхләнь: – Кенә нер, кенә зүс энүнд үзҗәнәт? – гиҗ Исус сурҗ. – Римин хаана, – гицхәҗ.

¹⁷ – Тиим болхла, хаана юмиг хаанд өгтн, Бурхна юмиг Бурхнд өгтн! – гисн хәрү Исус теднд өгч. Тедн өврәд йовҗ одцхаҗ.

Цадукмуд болн Исус

¹⁸ Дарунь Исус тал цадукмуд ирцхәв. Цадукмуд үксн әмтн әмдршго гиҗ иткдг бәәҗ.

¹⁹ – Багш! Залу күн тохм үлдәл уга өңгрхлә, тохман геешгон төлә түүнә авалинь дүнь авад, үр һарһх зөвтә гисн Мошен заасн заавр бәәнәлм.

²⁰ Манахна нег гер-бүлд иим юмн учрсмн. Тедн ах-дүүнрәрн долан күн бәәсмн. Ик ахнь гер авад, үрн уга бәәҗәһәд өңгрҗ одсмн.

²¹ Ах бергән дүнь хааҗ. Дүнь бас үрн уга бәәҗәһәд өңгрҗ. Дарук дүнь бас тиигҗ.

²² Тегәд тер долан ах-дүүнр цугтан үр һарһл уга өңгрсмн. Аш сүүлднь, күүкд күн бас хорҗ одсмн.

²³ Әмдрхләрн тер күүкд күн кенә гергн болх зөвтәв? Ах-дүүнр цугтан терүнә залу биләлм, – гиҗ тедн ирәд сурцхав.

²⁴ – Бурхна Бичгиг медл уга, Бурхна күчиг медл уга, хаҗһр уха ухалҗахан тадн медҗ бәәхшийт?

²⁵ Үксн улс әмдрхләрн гер чигн авшго, күүнд чигн одшго, тедн Бурхна Элчнрлә әдл бәәх.

²⁶ Әмдрлһнә тускар болхла, иим: Бурхн Мошед шачасн бут дотрас: «Би Абрахамин, Ицхакин болн Яковин Бурхнв», – гиҗ келсиг тадн Мошен дегтрт умшсн уга болвзат?

²⁷ Бурхн үксн улсин Бурхн биш, әмд улсин Бурхн! Ухантн дегд икәр хаҗиҗ одҗ, – гиҗ Исус теднд хәрү өгв.

Һол зааврмудын тускар

²⁸ Ном цәәлһәчнрин негнь өөрдҗ ирәд, теднә зүтклдә соңсад: – Бурхна зааврин алькнь эрк биш һол зааврв? – гиҗ сурв.

²⁹ – Эрк биш һол зааврнь эн: «Соңс, Израиль! Деед Эзн мана Бурхн – һанцхн Деед Эзн!

³⁰ Эврәннь Деед Эзн Бурхндан халун зүркәрн, үнн седкләрн, бәәсн уха-санаһарн, бәәсн күчәрн дуран тәв».

³¹ Хойрдгч зааврнь иим: «Өөрк күүндән бийдән дурта кевәр дурл». Эн хойр зааврас чинртәнь уга, – гиҗ хәрү өгв.

^32-33 – Йир сәәнәр келвт, – гиҗ ном цәәлһәч таасв, – Бурхн һанцхн, Терүнәс талдан Бурхн уга. Эврәннь Бурхндан халун зүркәрн, бәәсн күчәрн, бәәсн уха-санаһарн дуран тәвсн, өөрк күүһән бийләһән әдл дурлсн, тәкл тәкснәс болн Бурхнд нерәдҗ сетрә мал шатаснас үлү ик чинртә йовдл.

³⁴ Исус терүг чик хәрү өгсинь соңсчкад: – Чи Бурхна Йоснас хол бәәхшич, – гиҗ келв. Терүнә хөөн әмтн Исуст сурвр өгдгән уурв.

Исусин сурвр

³⁵ – Ном цәәлһәчнр Христосиг Давид хаана үлдл гиҗ юңгад келцхәдв? – гиһәд һол сүм дотр әмтиг сурһхларн Исус сурҗ.

³⁶ – Әрүн Сәкүсәр дүүрхләрн Давид иигҗ келсн бәәнәлм: «Деед Эзн мини Деед Эзнд келсмн: Чини өшәтниг диилҗ көлдчнь эс хайтл, Мини барун бий тал сууҗ бә».

³⁷ Давид бийнь Христосиг Деед Эзн гиҗ нерәдҗәхлә, юңгад Тер Давидин тохмин үлдл болхмб? – гив. Әмтн Энүг байртаһар соңсв.

³⁸ Исус цааранднь сурһв: – Ном цәәлһәчнрәс бийән саглтн. Тедн ут хувц өмсәд йовна. Әмтн талвң болһнд теднлә мендлхлә, теднд икәр таасгдна.

³⁹ Тер улс хурлд эс гиҗ нәәрт деегшән һарад суухдан дурта.

⁴⁰ Тедн белвсн күүкд улсин хаҗудинь меклҗ авад, әмтнә нүднд үзүләд Бурхнд уданар мөргцхәнә. Тер улс ик догшар цааҗлгдх, – гив.

Белвсн күүкд күүнә тәвсн мөңгн

⁴¹ Исус һол сүм дотр, бәрц бәрдг хәәрцгин өөр суусмн. Әмтн Бурхнд бәрц яһҗ бәрсинь үзв. Баячуднь икәр бәрцхәҗ.

⁴² Нег белвсн күүкд күн өөрдҗ ирәд, хойрхн улан мөңгнә шаальг тәвв.

^43-44 Исус сурһульчнран дуудҗ авад: – Үнәр келҗәнәв, эн угатя күүкд күн цугтаһаснь икәр бәрц бәрв. Байн улс зөөсн зөөриннь үлүһинь бәрхлә, эн бәәсн эдлврән цугинь бәрв, – гиҗ цәәлһв.