Лука 9 - Хальмг келнд орчулсн Әрүн Бичлһс

Арвн хойр апостолмуд

¹ Исус арвн хойр сурһульчнран цуглулад, теднд цуг хар сәкүсдиг һарһҗ көөх болн әмтнә гем эдгәх күч болн йос өгв.

² Дәкәд тедниг Бурхна йосна тускар ном умшҗ тархахин төлә болн гемтә әмтиг эдгәхин төлә илгәв.

³ – Хаалһд юм бичә автн: тайгчн, түңгрцгчн, өдмгчн, мөңгнчн, сольдг хувцчн бичә автн.

⁴ Ямаран герт орв чигн хотнас һартл тендән үлдтн.

⁵ Кемр әмтн тадниг эс орулхла, тадн тер хотнас һарч йовхларн, көлин тавгт наалдсн шораһинь саҗад һартн. Тер темдг теднә гемин герч болҗ һарх, – гиҗ Исус сурһульчнртан келв.

⁶ Тиигәд сурһульчнр хотн болһниг эргҗ йовад, Сән Зәңг тархаҗ, кесг әмтиг делгүдән эдгәҗ йовсмн.

Херодын үүмлһн

⁷ Эн йовдлмудын туск зәңг Һалильян Херод гидг һардачд чигн күрв. Херод Исусин тускар ю ухалхан медҗ чадлго бәәв, юңгад гихлә, Исусин тускар олн зүсн зәңг соңсгдв. Зәрмнь Терүг үксн Йохан әмдрв гиҗ,

⁸ зәрмнь – Элья ирҗ гив, зәрмнь болхла кезәңк әәлдәч әмдрҗ гиҗ келсмн.

⁹ Херод: – Йохана толһаһинь би хәәчлә харһуллав. Иим зәңг кенә тускар нанд соңсгдад бәәдг болхв? – гиһәд, Исусиг үзх арһ хәәв.

Тавн миңһн кү цадхлһн

¹⁰ Апостолмуд хәрҗ ирәд, цуг күцәсн кергән Исуст келҗ өгв. Тедниг дахулад, Исус Бетсәд гидг хотна өөр бәәсн нег эҗго һазрур күрәд ирв.

¹¹ Әмтн цуг энүг медәд, Терүг дахцхав, Исус теднлә мендләд, Бурхна йосна тускар келәд, эдгәх кергтә әмтиг эдгәв.

¹² Өдр чиләд ора болҗ йовла, арвн хойр сурһульчнр Терүнүр ирәд: – Эн әмтиг өөрк хотдар болн селәдәр йовултн. Тедн бийдән хонх һазр болн уух хот олҗ автха. Бидн эҗго һазрт бәәнәлм, – гив.

¹³ Исус теднд: – Тадн бийстн эднд хот өгтн, – гив. Хәрүднь сурһульчнр келв: – Манад тавхн өдмг болн хойрхн заһсн бәәнә. Йовад цуг эн әмтнд хот хулдҗ авхмн болвза? – гив.

¹⁴ Тенд тавн миңһн күн бәәсмн, зуг Исус сурһульчнртан: – Эн әмтиг йилһҗ авад, тәвәдәр һазрт суулһтн, – гив. Сурһульчнр Исусин келсәр кев. Цуһар тиигәд сууцхав.

^15-16 Исус тавн өдмг болн хойр заһс авад, теңгр хәләһәд, Бурхнд ханлт өргв. Тиигчкәд өдмгиг әңг-әңгәр хуһлв. Исус сурһульчнрт хот өгв, тедн әмтнд түгәв.

¹⁷ Цуһар хотынь идәд цадв. Сурһульчнр болхла үлдсн хотынь цуглулхла, арвн хойр сав дүүрң болв.

Пётрин илднь келснь

¹⁸ Нег дәкҗ Исус һанцарн зальврҗала. Сурһульчнр Терүнлә бәәлә. Тер сурһульчнрасн: – Әмтн Намаг кенд тоолҗана? – гиҗ сурв.

¹⁹ Тедн иим хәрү өгв: – Зәрмнь Таниг уснд кирслдг Йоханд тоолна, зәрмнь Таниг Элья гинә, зәрмнь болхла ик кезәнә бәәсн әәлдәч ода әмдрҗ гиҗ келнә.

²⁰ – Тадн Намаг кенд тоолҗант? – гиҗ Исус сурв. Пётр: – Та Бурхна Христос, – гив.

Исус эврәннь үклин тускар әәлдҗ келснь

²¹ Исус теднд Бийинм тускар күүнд төрүц бичә келтн гиҗ саглв,

²² дәкәд немҗ келв: – Би, Күмни Көвүн, кесг зовлң эдлхв. Намаг толһачнр, ах гелңгүд болн закана багшнр һәәлҗ көөх. Би әмнәсн хаһцх зөвтәв, зуг һурвдгч өдртнь әмдрхв.

²³ Цааранднь Исус цуг әмтнд: – Кен Намаг даххар седхлә, эврәннь хаалһан үлдәҗ, өдр болһн кирс авад, Бийм дахтн.

²⁴ Юңгад гихлә, кен эврәннь әмән харсхар седхлә, терүгән геех, болв Мини төлә әмән өгсн күн әмән харсҗ аврх.

²⁵ Кемр күн цуг нарт делкәг эзлҗ авхла, зуг седклән үрәхлә эс гиҗ әмән геехлә, ямаран олз тер күүнд бәәхмб?

²⁶ Кен Нанас болн Мини үгмүдәс ичхлә, терүнәс Эврәннь болн Эцкин туурмҗд, Бурхна элчнрин туурмҗд ирсн Күмни Көвүн чигн ичх.

²⁷ Би таднд үнәр келҗәнәв. Ода энд зогсҗасн тадн дундас зәрмнь Бурхна орн-нутгиг эс үзтл өңгршго, – гиҗ зәрлг болв.

Исусин хүврлһн

²⁸ Цуг энүг келсн хөөн нәәмн хонг үлү давв. Исус Пётриг, Йоханыг болн Яковиг дахулад, уулын ора деер зальврхар һарв.

²⁹ Зальврҗасн цагт Терүнә чирәнь генткн оңдарад, хувцнь цәәһәд, цәкллһнлә әдләр гилвкв.

^30-31 Терүнлә хойр күн күүндцхәв. Тедн – Моше Элья хойр бәәҗ. Тедн ик герләр асҗ гилвкәд бәәв. Моше Элья хойр Ерусалимд болх Исусин үклин тускар келв. Терүнә үкл Бурхна таал күцәх.

³² Пётр үүрмүдләһән үргләд, нөөртән диилгдәд унтҗ одв. Генткн серәд, Исусин туурмҗин герл-гегәниг болн Терүнлә зогсҗасн хойр залу күүг тедн үзцхәв.

³³ Тедн Исусиг үлдәһәд йовхар седхлә, Пётр: – Багш, энд йир сән! Һурвн сег тәвий: негнь Чамд, хойрдгчнь Мошед, һурвдгчинь Эльяд, – гив. Тер цагт Пётр эврән ю келҗәхән медсн уга бәәҗ.

³⁴ Пётр үгән чиләһәд уга бәәтл, генткн үүлн бууҗ ирәд тедниг бүркв. Пётр, Йохан, Яков һурвн үүлн дотр бәәсндән икәр сүрдцхәв.

³⁵ Үүлн заагас: «Эн Мини Көвүн, Би энүг онц йилһҗ авв. Энүнә үгинь соңстн» гисн дун соңсгдв.

³⁶ Тер дун тагчг болхла, Исус саак кевәрн һанцарн үлдв. Сурһульчнр энүг нууһад, үзсн юман тер цагт күүнд келсн уга.

Хар сәкүснд эзлгдсн көвүг эдгәлһн

³⁷ Маңһдуртнь тедн уул деерәс бууҗ ирхлә, Исусиг олн әмтн тосв.

³⁸ Генткн олна дунд бәәсн нег күн хәәкрв: – Багш! Буйн болтха, мини көвүһм хәләһит! Тер ор һанцхн көвүһм!

³⁹ Нег хар сәкүсн терүг эзлнә. Көвүм генткн му дууһар хәәкрнә. Шүрүснь татад, амнаснь көөсн һарна. Хар сәкүсн көвүһм зоваһад үлдәҗәхш.

⁴⁰ Би Чини сурһульчнриг тер хар сәкүснд зәрлг болҗ көөтн гиҗ эрәд сурлав, зуг тедн юм кеҗ чадсн уга.

⁴¹ – Яһсн иткл уга, килнцтә улсвт! Кедү күртл Би таднла бәәһәд тесхмб? Көвүһән нааран авч ир, – гиҗ Исус келв.

⁴² Көвүн өөрдҗ йовхла, хар сәкүсн тер көвүг һазр деер хаяд, көвүнә һар көлин шүрүсн татв. Зуг Исус тер хар сәкүсиг хөрҗ көөҗ һарад, көвүг эдгәҗ, эцкиннь һартнь өгв.

^43а Цуг әмтн Бурхна күчнд болн туурмҗд йир икәр өврцхәв.

Исус эврәннь үклин тускар давтад әәлдҗ келснь

^43б Цуһар Исусин кесн үүлд өврсн цагла Тер сурһульчнртан:

⁴⁴ – Оньган өгәд, Мини келсн үг соңстн: Намаг, Күмни Көвүг, әмтнә һарт өгх, – гив.

⁴⁵ Зуг тедн Исусиг ю келҗәхинь медсн уга. Яһад гихлә, тер үгмүдин чинрнь теднәс нуугдсн бәәҗ. Зуг ю келҗәхинь сурхас тедн әәцхәв.

Кен хамгин алдрв?

⁴⁶ Нег дәкҗ сурһульчнр дунд кень теднәс хамгин алдр болх? гих зүтклдән болв.

⁴⁷ Исус теднә ухаг медәд, бичкн үриг теврәд, өөрән зогсав.

⁴⁸ – Мини нернә төлә иим бичкн үриг орулҗ авснь Намаг орулҗ авх, Намаг орулҗ авдгинь Намаг илгәсн Бурхиг орулх. Тадн дундас хамгин бичкнь хамгин алдр болх, – гиҗ Исус келв.

Таднла сөрү эс бәәсн күн таднла ни-негн болх

⁴⁹ – Багш! Бидн Тана нерн деерәс хар сәкүсдиг көөҗәсн кү үзләвидн, бидн терүг хөрәд зогсалавидн, юңгад гихлә, тер маднла йовхш, – гиҗ Йохан келв.

⁵⁰ – Бичә хөртн. Таднла сөрү эс бәәснь таднла хамдан, – гиҗ Исус терүнд келв.

Шамарьян хотна әмтн Исусиг герүрн тәвсн уга

⁵¹ Исусиг хәрү теңгр тал өөдлҗ йовх цаг ирхлә, Тер Ерусалим тал одхар шиидв.

⁵² Исус түрүләд элчнрән илгәв, тедн Шамарьян һазрин нег хотнд орад, Терүг иртл цуг юминь экләд белдв.

⁵³ Зуг тер хотна әмтн Исусиг герүрн орулсн уга, яһад гихлә, Тер Ерусалим тал йовҗ йовхнь медгдв.

⁵⁴ Яков болн Йохан гидг сурһульчнр энүг үзснә хөөн хордад сурв: – Деед Эзн! Мана келсәр теңгрәс һал һарад эдниг уга кетхә гиҗ седҗәнт? – гив.

⁵⁵ Зуг Исус тедн тал эргҗ хәләһәд хөрв.

⁵⁶ Тегәд тедн талдан хотнур йовв.

Исусиг дахлһн

⁵⁷ Тедниг йовҗ йовхла зуурнь нег күн Исуст келв: – Таниг альд эс йоввчн би дахҗ йовхдан белмб, – гиҗ келв.

⁵⁸ Исус иим хәрү өгв: – Арат эврәннь нүктә, шовуд эврәннь үүртә, Нанд, Күмни Көвүнд, толһаһан тәвҗ амрх һазр уга.

⁵⁹ Талдан күүнднь Исус: – Намаг дах, – гив. Зуг тер күн иим хәрү өгв: – Деед Эзн, нанд герүрн хәрәд, өңгрсн эцкән оршах зөв өгит, – гив.

⁶⁰ Исус терүнд келв: – Үксн әмтн эврәннь үксн күүһән оршатха, чи болхла Нанла йовад Бурхна йосиг делгрүл, – гиҗ келв.

⁶¹ Дәкәд нег күн терүнд: – Би Таниг дахнав, Деед Эзн, зуг түрүләд нанд гер-бүлтәһән мендлҗ һарх цаг өгтн, – гив.

⁶² – Андсх бәрҗәһәд, ардаран оньдин хәләһәд бәәдг күн Бурхна орн-нутгт керг уга күн болҗана, – гиҗ Исус хәрүднь келв.