Лука 8 - Хальмг келнд орчулсн Әрүн Бичлһс

Исусиг дахҗ йовсн күүкд улс

¹ Энүнә хөөн Исус балһсд-селәдәр эргәд йовад, Бурхна йосна туск Сән Зәңг цәәлһҗ тархав.

² Терүнлә хамдан арвн хойр сурһульчнр болн нег цөөкн күүкд улс йовсмн. Тедн дунд зәрмнь хар сәкүснәс сулдсн, зәрмнь гемәс эдгсн бәәҗ. Долан хар сәкүснәс сулдсн Магдален хотна Марий,

³ Херодын герин Хуза гидг һардачин аваль Йохана, Сусанна болн нань чигн күүкд улс теднд мөңгәр дөң болҗ йовсмн.

Тәрә тәрсн күүнә тускар

⁴ Олн зүсн хотнас ирсн кесг әмтн Исусин өөр ирҗ хурв, болв Тер әмтнд үлгүрләд иигҗ келв:

⁵ – Нег күн тәрә тәрхәр йовҗ. Буудяг цацҗ хайхла, зәрмнь хаалһ деер тусҗ унв, тедниг әмтн көләрн ишкәд уга кев, шовуд чоңкад идчкв.

⁶ Зәрмнь чолута һазрт унв, урһхларн усн баһ болад тедн хагсҗ одв.

⁷ Зәрм буудя урһсн хатханчг заагт унв, хатханчг улм нигтәр урһад, тер буудя бүтәд хатҗ одв.

⁸ Зәрмнь болхла сән урһцта һазрт тусв. Тедн урһад, буудя болһн зун холван ик урһц өгв, – гиһәд үгән төгсәһәд, Исус: – Соңсхар седснь, соңстн! – гиҗ чаңһур келв.

⁹ Терүнә сурһульчнр: – Эн үлгүрин учр-утхнь юундв? – гиҗ сурцхав.

¹⁰ Исус теднд: – Бурхна йосна туск нууц медрл таднд өгсн билә. Талдан әмтн хәләһәд бичә үзтхә гиһәд, соңсад бичә медтхә гиһәд, Би теднд үлгүр олзлад келҗәнәв.

¹¹ Эн үлгүрин чинрнь эн: буудя гисн – Бурхна үг.

¹² Хаалһ деер унсн буудя гисн – иим әмтн, тедн Бурхна үг соңсна, зуг тедниг иткҗ әмән бичә авртха гиһәд эрлг ирәд, теднә зүркнәс Бурхна үгмүдиг булаҗ авад йовҗ одна.

¹³ Чолута һазрт унсн буудя гисн иим әмтн: тедн ик байртаһар үг соңсад, седклдән авна. Зуг тер үгмүд уңг-көрң уга экнлә әдл болна. Әмтн тер үгд бичкн зуур иткнә, зуг ик зовлң сөрлһн ирхлә, тесҗ чадхш.

¹⁴ Зәрм әмтн Бурхна үг соңсна, зуг җирһлин килмҗд, зөөрт, байрт даргдад Бурхна йоснд олзта биш болна. Тедн хатханчг заагт унсн буудя мет.

¹⁵ Сән урһцта һазрт унсн буудя гиснь – Бурхна үг соңсад, седклдән хадһлад, бийән батар тесвртәһәр бәрдг, дала урһц өгдг улс, – гив.

Тәвц деер бәәсн шам

¹⁶ – Кен чигн шаман шатаһад, сав дотр эс гиҗ орн дор тәвхш, зуг герт орҗ ирсн әмтн үзтхә гиҗ терүг тәвц деер тәвнә.

¹⁷ Нег чигн эс илдкгдсн нууц юмн уга, әмтнәс бултулҗ эс медүлсн нег чигн юмн уга.

¹⁸ Мини келсн үгиг оньган өгәд соңстн, юңгад гихлә, бәәснднь улм немгдх; болв угаһаснь бәәнә гиҗ сансин чигн авгдх, – гиҗ Исус келв.

Исусин эк болн дүүнр

¹⁹ Исус тал экнь болн дүүнрнь ирсмн, зуг әмтн дала болад, тедн Исусур орҗ чадсн уга.

²⁰ Нег күн Исуст: – Тана эк болн дүүнр һаза зогсҗана, тедн Таниг үзхәр седҗәнә, – гиҗ келнә.

²¹ Исус теднд: – Бурхна үг күцәһәд соңсҗасн әмтн мини экм болн дүүнрм, – гиҗ келв.

Исус һалв салькиг зогсав

²² Тер өдрмүдин негнднь Исус сурһульчнртан иигҗ келв: – Эн нууриг һатлад, телтр көвәд күрхмн. Тедн оңһц дотр орҗ сууһад йовв.

²³ Нууриг һатлҗ йовхларн Исус унтҗ одв. Тер дарунь һалв салькн көдләд, оңһц усар дүүрв, теднд чивх аюл учрв.

²⁴ Сурһульчнр Исус тал өөрдәд: – Багш! Багш! Бидн уснд чивн гиҗәнәвидн, – гиҗ Терүг серүлв. Исус серәд, салькиг болн дольгаг хөрв. Салькн көдлхән уурв, эргндк бәәдл тогтнв.

²⁵ – Тана иткл альдв? – гиҗ Исус сурһульчнрасн сурв. Тедн әәһәд өврәд, нег-негнәсн сурцхав: – Салькнд чигн, уснд чигн эн зәрлг болна, тедн үгинь соңсна. Кен гидг күмб эн?

Хар сәкүсәнд эзлгдсн күүг эдгәлһн

²⁶ Тедн Һалильяс туслцад бәәх нуурин көвәд бәәсн Геразин гидг һазрур оңһцар күрәд ирв.

²⁷ Исус оңһцас һарад һазр ишкхлә, дала хар сәкүсәр эзлгдсн өөрк хотна нег күн Терүнд харһв. Кесгәс авн тер хувцн уга, чирм нүцкн бәәһәд, әмтн бәәдг герт биш кү оршадг хадын көндәд бәәршдг бәәсмн.

²⁸ Тер күн Исусиг үзәд һазр элкдҗ унад, му ду һарад хәәкрв: – Деед Бурхна Көвүн Исус, нанас юн чамд кергтәв? Буйн болтха, бичә намаг зова!

²⁹ Исус хар сәкүснд: эн күүнәс һар гиҗ заксн учрас хар сәкүсн Исуст тиигҗ келҗ. Кесг дәкҗ хар сәкүсн тер күүг эзлдг бәәсмн, тегәд чигн энүнә һар-көлинь цевәр күләд, бәрәнд суулһв чигн тер күн цевән хамхлад, хар сәкүснд көөгдәд, эҗго һазрт зулад йовҗ оддг бәәсмн.

³⁰ Исус терүнәс: – Чини нерн кемб? – гиҗ сурв. – Түмн, – гиҗ тер хәрү өгв, юңгад гихлә, терүнә дотр дала хар сәкүсн орсн бәәҗ,

³¹ болв тедн Исусиг йорал уга гүн һазрур мадниг бичә йовул гиҗ эрв.

³² Тенд уулын ташуд ик дала һахас идшлҗ йовҗ, болв хар сәкүсд һахас дотр орх зөв сурв. Исус теднд зөв өгв.

³³ Хар сәкүсд тер күүг үлдәһәд, һахас дотр орхла, һахас генткн чагчм эрг деерәс гүүһәд, нуурин уснд унад чивҗ одцхав.

³⁴ Һаха хәрүлсн улс учрсн йовдлыг үзәд, балһсна әмтнд болн эргндк хотн болһнд бәәсн улст энүнә тускар келҗ өгв.

³⁵ Әмтн юн учрсинь хәләхәр ирцхәв. Тедн Исус тал ирәд, хар сәкүсдәс сулдсн күүг Исусин көлднь хувц-хунртаһан эрүл ухата суусинь үзчкәд, дегд икәр сүрдв.

³⁶ Тер күн яһҗ эдгсинь үзсн әмтн наадк әмтнд келҗ өгв.

³⁷ Геразин гидг һазрин цуг әмтн икәр әәһәд, Исусиг мана һазрас цааран йов гиҗ сурцхав. Исус оңһц дотр орад, хәрү усчв.

^38-39 Хар сәкүсдәс сулдсн күн Терүнлә хамдан йовхар сурв. – Герүрн хәр, Бурхн чамд ю кесинь әмтнд келҗ өг, – гиҗ Исус хәрү өгәд, тер күүг герүрнь йовулв. Тер күн йовад, эврәннь хотна әмтнд Исус терүнд ю кесинь келв.

Яирин күүкиг әмдрүллһн. Гемтә күүкд күүг эдгәлһн

⁴⁰ Исус хәрү ирхлә, Терүг олн әмтн тосв. Яһад гихлә, тедн Исусиг күләв.

⁴¹ Хурлын толһач Яир гидг нег күн ирәд, Исусин көлднь унад, герүрм ирит гиһәд сурв.

⁴² Тер юңгад гихлә, терүнә ор һанцхн арвн хойрта күүкн өңгрхин өмн өргнд бәәҗ. Исусиг тиигәрән йовсн цагт кесг әмтн өөрнь нирглдв.

⁴³ Нег күүкд күн арвн хойр җилдән цусн һардг гемәр гемтдг бәәсмн. Тер эмчнрт цуг мөңгән өгсмн, зуг нег чигн эмч терүг эдгәҗ чадсн уга.

⁴⁴ Күүкд күн Исусур ардаснь өөрдәд, Терүнә хувцнд һарарн күрв. Тер дарунь цуснь һардган уурв.

⁴⁵ – Кен Намаг һарарн көндәв? – гиҗ Исус сурв. Цуһар: «Би көндәсн угав» гицхәв. Тиигхлә Пётр келв: – Багш! Тана эргнд дала әмтн бәәнә. Цуһар энд-тендәснь шахҗ дәврҗәнә.

⁴⁶ – Нег күн Нанур һарарн күрв, тегәд Нанас күчн һарсинь Би меддв, – гиҗ Исус хәрүднь келв.

⁴⁷ Тиигхлә күүкд күн әмтнд бийән медүллго бәәҗ чадшгоһан үзәд, Исус тал өөрдәд, көлднь чичрәд унв. Олн әмтнә өмн тер яһҗ Исуст һарарн күрәд, тер дарунь эдгсән келҗ өгв.

⁴⁸ Тиигхлә Исус терүнд келв: – Күүкн минь! Чини иткл чамаг эдгәв. Амулң менд йов!

⁴⁹ Исус үгән төгсәһәд уга бәәтл Яир гидг хурлын толһачур гертәснь элч ирәд: – Чини күүкнчн өңгрҗ одв, Багшиг бичә үүмүл, – гиҗ келв.

⁵⁰ Исус энүг соңсад, Яирд: – Бичә ә, итк, болв күүкнчн эдгх, – гиҗ келв.

⁵¹ Яирин герүр ирчкәд, Исус кү тәвсн уга, зуг Пётрлә, Йоханла, Яковла болн күүкнә эк-эцклә гер дотр орв.

⁵² Әмтн күүкн өңгрҗ одв гиһәд оркрад ууляд бәәцхәв. – Бичә уультн, эн күүкн өңгрсн уга, зуг унтҗ кевтнә, – гиҗ Исус келв.

⁵³ Цуһар Терүнә үгд инәлдцхәв, юңгад гихлә, тедн күүкиг өңгрсинь медсн бәәҗ.

⁵⁴ Исус күүкиг һараснь авад: – Күүкн, бос! – гив.

⁵⁵ Күүкнә цогцднь сүмсн орад, тер дарунь босв. Исус: – Күүкнд хот өгтн, – гив.

⁵⁶ Эк-эцкнь йир икәр өврв, зуг Исус: – Цуг энүнә тускар күүнд бичә келтн, – гиҗ закв.