Лука 7 - Хальмг келнд орчулсн Әрүн Бичлһс

Римин нег цергин ахлачин зарциг эдгәлһн

¹ Терүг соңссн әмтнд келсн үгән төгсәһәд, Исус Капернам балһснур йовв.

² Римин цергин ахлачин нег зарц ик күнд гемтә болад, өңгрхиннь өмн өргнд бәәсмн. Цергин ахлач зарцдан йир хару бәәсмн,

³ тегәд Исусин тускар соңсад, тер Йудьян толһачнриг Терүнүр илгәв. Исус нааран ирәд, зарцм эдгәтхә гиҗ суртн гив.

⁴ Толһачнр Исус тал ирәд: – Эн күүнд нөкд кеҗ болҗана.

⁵ Тер мана келн-әмтнд дурта, маднд хурл тосхҗ өгв, – гиҗ тедн икәр шунҗ сурв.

⁶ Исус толһачнриг дахад йовв. Заасн герүр өөрдҗ йовхла, цергин ахлач үүрмүдән өмнәснь илгәһәд, теднәр дамҗулҗ келүлв: – Деед Эзн, бичә зовтн, Таниг гертән орулх чигн нанд зөв уга.

⁷ Тегәд чигн би эврән өмнәсчн һарсн угав. Би тиим зөв угав гиҗ санҗанав. Негхн үг келтн, мини зарц дарунь эдгх.

⁸ Би эврән күүнә медәнд бәәнәв, мини медәнд бас цергчнр бәәнә. Негнднь би «Йов» гинәв, тер йовна, дарукднь: «Нааран йов» гинәв, тер ирнә. Зарцдан би: «Энүг ке» гинәв, тер мини келсәр кенә.

⁹ Исус келсн үгинь соңсад, дегд икәр өврв, дәкәд ардаснь дахҗ йовсн олн әмтн тал эргәд хәләчкәд: – Израиль нутгт чигн тиим ик сүзг Би үзәд угав, – гив.

¹⁰ Илгәсн элчнрнь хәрҗ ирхләрн, зарц эрүл-менд бәәсинь үзцхәв.

Наин гидг хотнд белвсн күүкд күүнә көвүһинь әмдрүллһн

¹¹ Энүнә хөөн Исус Наин гидг хотнур йовв. Терүнә өөр сурһульчнр болн нань чигн әмтн бәәцхәв.

¹² Исус хотна үүднүр өөрдҗ йовсн цагт әмтн өңгрсн кү оршахар авч йовсн бәәҗ. Нег белвсн күүкд күүнә ор һанцхн көвүнь өңгрҗ. Тер күүкд күүнлә хамдан кесг хотна әмтн йовцхаҗ.

¹³ Деед Эзн экинь үзәд, терүнд сана зовад: – Бичә ууль, – гиҗ Тер келв.

¹⁴ Исус өңгрсн күүнүр өөрдәд, оршалһна яршгт һаран күргв. Терүг авч йовсн әмтн ормдан зогсв. – Көвүн минь! Би чамд «Бос!» гиҗәнәв, – гив.

¹⁵ Өңгрсн көвүн толһаһан өндәлһҗ сууһад экләд үг келв, Исус терүг экднь даалһв.

¹⁶ Әмтн йир икәр сүрдцхәв. Тедн Бурхиг магтад: – Мадн дунд алдр әәлдәч бәәнә! Эврәннь келн-әмтндән нөкд болхин төлә Бурхн бууҗ ирв! – гиҗ келцхәв.

¹⁷ Исусин тускар зәңг Йудья нутгар болн өөрк һазрар делгүдән тархагдв.

Уснд кирслдг Йоханас ирсн элчнр

¹⁸ Йохана сурһульчнр терүнд Исусин кесн йовдлмудын тускар келхлә, Йохан сурһульчнр дундас хойринь дуудҗ авад,

¹⁹ Деед Эзнүр одад иигҗ суртн гиҗ илгәв: – Бурхнас ирх зөвтә күн Та мөнвт? Аль бидн талдан кү күләхмб?

²⁰ Элчнр Исус тал ирәд: – Уснд кирслдг Йохан мадниг иим юм суртн гиҗ Танур илгәв: «Та Бурхнас ирх зөвтә күн мөнвт? Аль бидн талдан кү күләхмб?» – гиҗ сурцхав.

²¹ Исус тер цагт кесг өвчтә, гемтә, хар сәкүстә әмтиг эдгәдг бәәсмн. Кесг сохр әмтнә нүдинь секәд, хара орулдг бәәсмн.

²² Тер элчнрт иим хәрү өгв: – Йоханд хәрү ирәд үзсән, соңссан цугтаһинь келҗ өгтн: сохр әмтн үздг болна, доһлңгнь йовна, арсна өвчтәнь гемәсн цеврднә, дүлә күн соңсдг болна, өңгрснь әмдрнә, угатя әмтнд Сән Зәңг цәәлһҗ тархана.

²³ Нанд итксн әмтн итклән эс геехлә, буйн-кишгтә болхмн, – гив.

²⁴ Йохана элчнриг йовсна хөөн Исус әмтнд Йохана тускар иигҗ келв: – Эҗго көдә һазрур ю хәләхәр тадн йовсмт? Салькнд нәәхлсн хулсигий?

²⁵ Ю хәләхәр тадн йовсмт? Байн, үнтә хувц өмссн кү хәләхәрий? Уга. Тер юңгад гихлә, байн үнтә хувц өмсдг әмтн хаана бәәшңд бәәдмн.

²⁶ Ю үзхәр тадн одсмт? Әәлдәчиг? Э, э. Йохан әәлдәчәс деер күн, гиҗ Би таднд келҗәнәв.

²⁷ Энүнә тускар Бурхна Бичгт иигҗ бичәтә бәәнә: «Би зәңгчән урдасчн илгәнәв. Тер урдасчн Чини хаалһичинь белдх».

²⁸ Эн орчлң деер төрсн әмтн дунд Йоханас ик алдр күн уга билә гиҗ би таднд келҗәнәв. Зуг Бурхна орн-нутгт бәәсн хамгин бичкнь терүнәс ик алдр.

²⁹ Кесг әмтн болн алв цуглулдг улс Йоханыг соңсад, Бурхиг магтад, Йоханар уснд кирслгдв.

³⁰ Паршмуд болн закана багшнр уснд эс кирслгдсәрн Бурхна таалыг эвдв.

³¹ – Эн мана цагин әмтиг юунла дүңцүлҗ болхмб? Эдн кениг дурасмб?

³² Тедн базрт суусн бичкн күүкдлә әдл. Эн әмтн нег-негндән иигҗ хәәкрҗәсн бичкдүд мет: «Бидн таднд бүрә бүшкүрәр айс татдг биләвидн, тадн биилдго биләт, бидн таднд һашута дуд дуулдг биләвидн, зуг тадн уульдго биләт».

³³ Уснд кирслдг Йохан ирнә. Тер өдмг иддго, чаһр уудго күн. Терүнә тускар хар сәкүстә күн гиҗ тадн келнәт.

³⁴ Би, Күмни Көвүн, ирв. Би чаһр уунав, хот иднәв. «Хотд дурта чаһр уудг күн, алв цуглулгчин болн килнцтә әмтнә үр» гиҗ тадн келнәт.

³⁵ Бурхна цецн ухаг седклдән орулсн күн болһн энүг үнн болдгиг лавлна, – гиҗ Исус келв.

Шимона герт Исусин көлд тос түрксн күүкд күн

³⁶ Нег парш Исусиг тоохар герүрн дуудв. Исус паршин гер тал ирәд, ширән өөр суув.

³⁷ Тер хотнд бәәдг килнцтә нег күүкд күн Исусиг паршин герт хот ууҗахинь медчкәд, гипс шаврар кеен буһшт каңкнсн сәәхн үнртә тос авч ирәд,

³⁸ Исусин ард зогсад уульв. Һарсн нульмснь Исусин көл деер дусад һооҗад бәәв. Тиигхлә тер күүкд күн Исусин көлинь эврәннь үсәрн арчад, үмсәд, каңкнсн үнртә тос деерәснь кеҗ түркв.

³⁹ Исусиг дуудсн парш цуг энүг үзәд дотран санв: «Кемр эн күн әәлдәч болсн болхла, Бийинь көндәҗәсн күүкд күүг кен гидг күүһинь медх билә. Эн күүкд күн килнцтәлм».

⁴⁰ Тиигхлә Исус паршд: – Шимон, Би чамд нег юм келхәр седҗәнәв, – гив. – Келтн, Багш, – гиҗ тер хәрү өгв.

⁴¹ – Хойр күн нег эзнд өртә бәәҗ, – гиҗ Исус эклв, – Негнь тавн зун мөңг өгх зөвтә бәәҗ, наадкнь – тәвн.

⁴² Зуг теднд мөңгн уга болад, тегәд эзнь теднә өринь хәрүлв. Эн хойр күүнәс кень эзндән икәр дурта болхмб?

⁴³ – Мини санаһар, кенә өрнь ик, тернь эзндән икәр дурта болх, – гиҗ Шимон хәрүднь келв. – Чикәр санҗанач, – гиҗ Исус келв.

⁴⁴ Дәкәд Тер күүкд күүнүр зааһад, Шимонд иигҗ келв: – Чи эн күүкд күүг үзҗәнч? Би чини герт ирв, чи нанд көлән уһах ус чигн кеҗ өгсн угач, эн болхла мини көлм нульмсарн уһаһад, үсәрн арчҗ хагсав!

⁴⁵ Чи мендлхләрн Намаг үмссн угач, эн күүкд күн болхла Намаг герт орҗ ирснәс авн Мини көлм зогслго үмсәд бәәнә.

⁴⁶ Чи мини толһадм олив тосар түрксн угач, эн болхла үнтә каңкнсн үнртә тосиг Мини көлдм асхад бәәнә.

⁴⁷ Яһад эн тиим ик дурта болдгинь Би чамд келсв. Энүнә дала килнцнь тәвгдв, тегәд чигн эн икәр дурлна. Баһ килнцтә күүнә килнцнь тәвгдхлә, тер баһар дурлна.

⁴⁸ Дәкәд Исус күүкд күүнд келв: – Чини килнцчн тәвгдв.

⁴⁹ Наадк гиичнр: – Әмтнә килнц чигн тәвдг эн кен болҗахмб? – гиҗ санцхав.

⁵⁰ Исус болхла, күүкд күүнд: – Чини иткл чамаг аврв. Менд йов! – гиҗ келв.