Лука 24 - Хальмг келнд орчулсн Әрүн Бичлһс

Әмдрлһн

¹ Өрүн өрлә долан хонгин түрүңк өдрт күүкд улс урднь белдсн каңкнсн үнртә тос, түркдг эм авад, Исусиг оршасн үкәрүр ирцхәв.

² Зуг Терүг оршасн үкәриг хааҗасн чолун хаҗуднь бәәсиг тедн үзцхәв.

³ Уулын көндә дотр орсн күүкд улс Деед Эзн Исусин цогц олҗ авсн уга.

⁴ Күүкд улс алмацҗ зогсцхав. Генткн гилвксн цаһан хувцта хойр күн теднд үзгдв.

⁵ Күүкд улс дегд сүрдәд, һазр элкҗ унцхав. Зуг хойр күн: – Үксн әмтн заагт әмд күүг юңгад хәәҗәхмт?

⁶ Тертн энд уга, Тертн әмдрв! Һалильяд Исус таднд ю келсинь мартчквт?

⁷ «Күмни Көвүн килнцтә әмтнә һарт бәрүлгдх, кирс деер цааҗлгдх, болв һурвдгч өдртнь Тер әмдрх», – гиҗ келцхәв.

⁸ Эн Исусин үгмүд генткн теднә уханд орҗ тодлгдв.

⁹ Күүкд улс Исусин үкәрәс хәрҗ ирәд, арвн негн сурһульчнрт болн наадк әмтнд цуг учрсн юмна тускар келҗ өгв.

¹⁰ Тер күүкд улсин дунд Магдален хотна Марий, Йохана, Яковин экнь Марий болн нань чигн күүкд улс бәәҗ. Тедн апостолмудт энүнә тускар келҗ өгцхәв.

¹¹ Зуг эн күүкд улсин үгмүд деми юмн гиҗ теднд сангдв. Тедн күүкд улст итксн уга.

¹² Пётр болхла босад, Исусин үкәр тал гүүв. Тер уулын көндә дотр шаһаҗ хәләһәд, Исусиг орасн һанцхн кенчр бәәсинь үзв. Пётр үзсн юмндан икәр өврәд хәрәд йовв.

Эмаус гидг хотнур ордг хаалһд

¹³ Тер өдр сурһульчнрас хойрнь Эмаус гидг хотнур йовҗ йовла. Тер хотн Ерусалимас арвн негн дуунад бәәсмн.

¹⁴ Цуг учрсн йовдлын тускар тедн күүндҗәлә.

¹⁵ Тедниг күүндәд йовҗ йовтлнь Исус Бийнь теднүр өөрдҗ ирәд, теднлә хамдан йовв.

¹⁶ Зуг сурһульчнр Исусиг үзвчн таньсн уга.

¹⁷ Исус теднәс: – Юуни тускар тадн күүндҗәхмт? – гиҗ сурв. Тедн гейүртә бәәдлтә зогсцхав.

¹⁸ Теднә негнь Клөп гидг нертә күн: – Шиңкән Ерусалимд ирсн төләдән эн өдрмүдт юн учрсинь һанцхн чи меддго болхич! – гиҗ келв.

¹⁹ – Юн учрсмб? – гиҗ Исус сурв. – Назаретин Исусла учрсн йовдлын тускар бидн келҗәнәвидн, – гиҗ тедн хәрүднь келв. – Тер үгдән болн үүлдән ик күчтә, Бурхна болн әмтнә өмн ик алдр әәлдәч билә.

²⁰ Ах гелңгүд болн мана һардачнр Терүг бәрҗ авад, алх зарһла харһулад, кирс деер цааҗлад әмнәснь хаһцулв.

²¹ Болв бидн болхла Израилиг Тер харсҗ аврх гиҗ нәәлҗәләвидн. Тер учрсн йовдлын хөөн һурвдгч өдр болҗана.

²² Цааранднь иим юмн болв: үкәр талнь йовсн зәрм күүкд улс мадниг икәр өврүлв. Тедн эндр өрүн өрлә тиигәрән одла,

²³ зуг тенд цогцнь уга бәәҗ. Күүкд улс хәрҗ ирәд маднд иим юм келҗ өгв. Тедн оршасн хадын көндә дотр орхла, Бурхна элчнр генткн теднә нүднд үзгдәд, «Исус әмд» гиҗ келҗ.

²⁴ Хөөннь мана үүрмүдәс зәрмнь үкәр талнь одад, күүкд улс келҗәснлә әдл цугинь үзҗ, зуг әмдрсн Исусиг тедн үзсн уга.

²⁵ Исус теднд: – Яһсн эргү улсвт? Әәлдәчнрин келсн үгмүдт ода күртл иткл уга бәнт?

²⁶ Христос ик зовлң эдлснәннь хөөн эврәннь туурмҗдан орхм бишви? – гиҗ сурв.

²⁷ Дәкәд Тер Мошеһәс болн әәлдәчнрәс экләд, Бурхна Бичгт Бийиннь тускар цуг бичәтә юмиг теднд цәәлһҗ келҗ өгв.

²⁸ Тедниг хотнур өөрдҗ йовхлань Исус цааранднь йовхар седсн бәәдл һарв.

²⁹ Зуг тедн Исусиг: – Маднла хамдан үлд, ора болҗана, өдр чилв, – гиҗ эрҗ сурв. Тер үлдв.

³⁰ Хот уух цагт Исус болһсн һуйр авад, Бурхнд ханлт өргәд, әңг-әңгәрнь һуйриг хуһлҗ хуваһад теднд өгв.

³¹ Тер кемлә хойр сурһульчин нүднь секгдәд, тедн Исусиг таньв. Зуг тер дарунь теднә нүднд Исус үзгддгән уурв.

³² Тедн нег-негнәсн: – Терүг хаалһдан маднд Бурхна Бичгин чинр-утх цәәлһҗ үг келсн цагт мана зүркн халад, шатсн болҗ эс медгдлү? – гиҗ сурцхав.

³³ Сурһульчнр ормасн босад, Ерусалим тал хәрү йовцхав. Тендән тедн арвн негн сурһульчиг болн кесг әмтиг олҗ авв.

³⁴ – Эн үнн! Деед Эзн әмдрв! Шимон Терүг үзв, – гиҗ сурһульчнр келцхәв.

³⁵ Тер хойр сурһульч хаалһд учрсн йовдлын тускар келәд, Исусиг һуйр хуваҗ өгсн цагт Терүг яһҗ таньсан келҗ өгв.

Әмдрсн Исус сурһульчнр тал ирснь

³⁶ Сурһульчнр күүндҗәсн цагт генткн Исус үзгдәд теднлә мендлв.

³⁷ Тедн сүмсн үзгдҗәнә гиҗ санад, әәһәд менрәд одцхав.

³⁸ Исус болхла: – Юңгад тадн тиигҗ икәр әәҗәхмт? Юңгад тадн маһдлҗахмт?

³⁹ Мини һарм, Мини көлм хәләтн! Эн Бив! Намаг көндәҗ үзтн, сүмсн махмуд уга, ясн уга болна. Намаг хәләтн, Би йосн махмудтав, ястав, – гиҗ келәд,

⁴⁰ Исус һар-көлән үзүлв.

⁴¹ Тедн икәр байрлад, иткҗ чадлго алң болад бәәцхәв. Тиигхлә Исус теднәс: – Танад идх-уух юмн бәәнү? – гиҗ сурв.

⁴² Сурһульчнр Исуст шарсн заһснас өгв.

⁴³ Тер заһсиг авад, теднә өмн идв.

⁴⁴ – Энүнә тускар Би таднла бәәсн цагтан келләлм, – гиҗ Исус келв. – Мини тускар Мошен заканд, әәлдәчнрин дегтрмүдт болн Псалмудын дегтрт бичгдсн тоот күцәгдх зөвтә.

⁴⁵ Исус теднд Бурхна Бичгин чинр-утх медхд нөкд болв.

⁴⁶ – Бурхна Бичгт: «Христос дегд икәр зовагдад үкәд, һурвдгч өдртнь әмдрх зөвтә» гиҗ бичәтә.

⁴⁷ Ерусалимас экләд әмтн болһнд килнцтә җирһл үлдәлһнә туск, килнц тәвүллһнә туск зәңг Терүнә нернә төлә тадн тархах зөвтәт.

⁴⁸ Тадн болхла цуг энүнә герчнр.

⁴⁹ Би таднд Мини Эцкм өгнәв гисн юмиг илгәнәв, зуг тадн ик Теңгрәс күч эс автл балһснд үлдцхәтн, – гив.

Исусиг теңгр деер һарсна тускар

⁵⁰ Тер сурһульчнран балһснас дахулҗ һарад, Бетәнья тал авч ирәд һаран өргәд, тедниг әдслв.

⁵¹ Әдслҗ бәәтлән теднәс салҗ, теңгрүр өөд һарв.

⁵² Сурһульчнр Терүнд сөгдәд, аһу ик байртаһар Ерусалим тал хәрҗ ирцхәв.

⁵³ Тер цагас авн тедн һол сүм дотр оньдин бәәһәд, Бурхнд магтал өргцхәв.