Лука 23 - Хальмг келнд орчулсн Әрүн Бичлһс

Исус Пилатын өмн

¹ Тиигхлә Деед хургт бәәсн әмтн босад, Исусиг Пилатур авч йовцхав.

² Тенд Исусиг экләд гемшәв: – Эн күүг мана келн-әмтиг хутхсинь үзвидн, Римин хаанд алв бичә өгтн, эврән бийән «Би ханв болн Христосв» гисинь соңсвидн.

³ – Чи Йудья улсин хан болҗахмчи? – гиҗ Пилат Исусас сурв. – Чи тиигҗ келҗәнәч, – гиҗ Исус хәрү өгв.

⁴ Тиигхлә Пилат ах гелңгүдт болн олн әмтнд: – Эн күүг гемшәх буру юм би үзҗәхшв, – гив.

⁵ Тедн болхла зүткҗ келцхәв: – Энтн Һалильяс экләд нааран ирв. Эврәннь номарн цуг Йудья һазрин әмтиг үүмүлҗәнә.

⁶ Энүг соңсад Пилат: – Эн Һалилья һазрин күний? – гиҗ сурв.

⁷ Дәкәд Исусиг Херод һардҗасн һазрин күүһинь Пилат медчкәд, Исусиг Херодур илгәв. Херод тер цагт бас Ерусалимд бәәҗ.

Исус Херодын өмн

⁸ Херод Исусиг үзәд икәр байрлв. Юңгад гихлә, кезәнәс авн тер Исусиг үзхәр седсн бәәҗ. Тер Исусин тускар дала юм соңсҗ, болв Терүнәс нег өвәрц юм үзхәр нәәлҗәсн бәәҗ.

⁹ Тер кесг сурврмуд Исуст өгв, зуг Исус хәрү өгсн уга.

¹⁰ Ах гелңгүд болн закана багшнр зогсад, Исусиг сүркә кевәр гемшәв.

¹¹ Херод цергүдтәһән Терүг һутаһад, наад бәрҗәһәд, деернь сәәхн хувц өмскәд, хәрү Пилатур илгәчкв.

¹² Херод Пилат хойр урднь хоорндан өшәтн бәәсн болвчн, тер өдр үүрмүд болв.

Исусиг цааҗла харһулх шиидвр

¹³ Пилат ах гелңгүдиг болн әмтнә толһачнриг дуудҗ авад келв:

¹⁴ – Олн әмтн дунд буцлт өргхәр седдг күүг тадн нанур авч ирвт. Би тана чирәд энүг мөшкләв. Зуг Эн күн тадна гемшәҗәсн нег чигн юмнд бурутаһинь би үзсн угав.

¹⁵ Херод бас эн күүнә һарһсн буру юм олҗ чадл уга хәрү Энүг йовулчкв. Тадн эврән хәләтн, Эн күн үкллә харһулгдх ик гем һарһсн уга.

¹⁶ Тер учрар би Энүг малядад сулдхнав.

^17-18 Зуг цуһар нег дууһар: – Эн үктхә! Маднд Бар-Абаг сулдх! – гиҗ хәәкрцхәв.

¹⁹ Бар-Аба гидг күн тер балһснд буцлт кеһәд, әмтиг алсн учрар түүрмд суусн бәәҗ.

²⁰ Зуг Пилат Исусиг сулдххар седв, тегәд чигн тер давтад әмтнәс сурв.

²¹ Тиигсн бийнь әмтн: – Кирст хадчк! Кирст хадчк! – гиҗ хәәкрцхәв.

²² Пилат һурвдад сурв: – Ямаран му йовдл эн күн һарһсмб? Үкллә харһулхин төлә кесн гем би олсн угав. Би энүг малядад сулдхнав! – гив.

²³ Зуг тедн: – Исусиг кирст хад! – гиһәд улм чаңһар хәәкрәд некәд бәәцхәв. Теднә хәәкрлдәнд Пилат диилгдв.

²⁴ Пилат теднә некврәр шиидвр авв.

²⁵ Тер буцлт босхсн, әмтиг алсн, түүрмд сууҗасн Бар-Абаг әмтнә сурсар сулдхад, Исусиг теднә һарт өгв.

Кирст хадҗ аллһн

²⁶ Исусиг цааҗла харһулхин төлә авч йовцхав. Зууран цергүд Күрәнә балһснас йовҗ йовсн Шимониг бәрҗ авад, ик гидг кирс нурһнднь үүрүлҗ ачад, Исусин ардаснь йовулв.

²⁷ Исусин ардас кесг әмтн дахла, тедн дунд һашута нульмсан асхрулҗ, уульҗ йовсн күүкд улс бас йовла.

²⁸ Исус теднүр хәләһәд: – Ерусалимин күүкд улс, Мини төлә бичә уультн, эврәннь үрнәннь, бийиннь төлә уультн!

²⁹ Юңгад гихлә, берк цаг ирх, күср болн үр эс һарһсн, үрдүд эс көкүлсн күүкд улс буйн кишгтә гиҗ әмтн тер цагт келх, – гив.

³⁰ Тер цагт әмтн уулмудыг: «Мадн деер унтн!», өөдм һазрмудыг: «Мадниг бүрктн» гиҗ эрҗ сурх.

³¹ Кемр көк ноһарҗах модыг тиигҗ кехлә, му хумха моднд ю кедг болхмб? – гив.

³² Йос эвдсн хойр күүг Исусла хамднь бас цааҗла харһулхин төлә авч йовла.

³³ Тедн Һавл гидг һазрур ирв. Тер һазрт Исусиг кирсд хадҗ цааҗлсмн, йос эвдсн хойр күүг бас Терүнлә хамднь кирсд хадҗ цааҗлсмн, негинь барун бийднь, наадкинь зүн бийднь.

³⁴ Исус: – Аав минь! Эднә килнцинь тәвит! Эдн ю кеҗәхән медҗәсн уга, – гиҗ сурв. Әмтн җирв хаяд, Исусин хувциг хувацхав.

³⁵ Олн әмтн зогсад хәләцхәв. Толһачнр бас Исусар наад бәрәд: – Талдан әмтиг харсҗ аврдг билә. Кемр тер Христос болхла, Бурхна шүүҗ авсн күн болхла, Бийән харсҗ әмән авртха! – гиҗ келцхәв.

³⁶ Цергүд бас Исусар наад бәрцхәв. Тедн Исуст өөрдәд, ишклң чаһр өгәд

³⁷ келцхәв: – Кемр Чи Йудья улсин хан болхла, әмән харсҗ авр, – гив.

³⁸ Исусин толһаднь кирс деер нег харһа мод хадулҗ, деернь «Энтн – Йудья улсин хан» гиҗ бичҗ.

³⁹ Хаҗудк кирс деер телгдсн йос эвдсн күүнә негнь Исусиг му келәд: – Кемр Чи Христос болхла, эврәннь әмән авр, мадниг бас харсҗ авр! – гиҗ хәәкрв.

⁴⁰ Наадкнь болхла өөркән хөрҗ: – Бурхнас әәхнч! Чи бас тиим цааҗ дааҗахан медҗәхшийчи?

⁴¹ Бидн чикәр цааҗлгдвидн, кесн килнцәрн үүлән дааҗанавидн, эн күн болхла му юм кесн уга, – гив.

⁴² Дәкәд: – Деед Эзн Эврәннь орн-нутгтан ирхләрн мини тускар бичә марттн, – гиҗ тер Исуст келв.

⁴³ Би чамд үнәр келҗәнәв, эндр өдр Нанла хамдан Бурхна садт тусхич! – гиҗ Исус хәрүднь келв.

Исусин үкл

⁴⁴ Үдин алднд генткн цуг һазрар харңһурад, һурвн цаг күртл тиим болв.

⁴⁵ Нарн харңһурад, һол сүмин көшг хойр әңгрәд шуурв.

⁴⁶ Исус: – Аав минь! Тана һарт сүмсән бәрүлҗ өгчәнәв! – гиҗ чаңһур хәәкрв. Эн үгмүдин хөөн Исусин әмн һарв.

⁴⁷ Энүг үзсн Римин әңгин цергин ахлач, Бурхиг магтад: – Эн күн йосн чик седклтә күн бәәсмн, – гиҗ келв.

⁴⁸ Ю болхиг хәләхәр цуглрсн олн әмтн учрсн йовдлыг үзәд, өрчән цокн бәәҗ хәрцхәв.

⁴⁹ Зуг Исусиг меддг әмтн, теднә тоод Һалильяс авн Терүг дахҗ йовсн күүкд улс, ик хол биш, тедүкнд хәләһәд зогсв.

Исусин цогциг оршалһн

⁵⁰ Йосип гидг нертә нег күн Деед Хургин гешүн бәәҗ. Әрүн цаһан седклтә үннч күн тер бәәҗ.

⁵¹ Йосип Деед Хургин шиидврлә болн кесн йовдлла зөвшәрсн уга бәәҗ. Тер Йудья һазрт бәәсн Ариматья хотна күн бәәҗ. Йосип Бурхна йосн ирхиг бас күләҗәҗ.

⁵² Тер Пилатур ирәд, Исусин цогцинь өгтн гиҗ сурв.

⁵³ Дәкәд тер цогцинь кирс деерәс буулһҗ авад, оршалһна кенчрт ораһад, хад чолунд шин кесн, урднь күн оршагдад уга үкәрт орулҗ тәвв.

⁵⁴ Басң өдрин асхн болҗ йовла. Бемб өдр өөрдҗ йовла.

⁵⁵ Исусла хамдан Һалильяс дахҗ ирсн күүкд улс Йосипиг дахад, Исусиг оршасн үкәриг хәләһәд, цогцинь тер ормд яһҗ орулҗ тәвсинь үзв.

⁵⁶ Тедн хәрҗ ирәд, каңкнсн үнртә тос, түркдг эм белдв. Бемб өдрлә тедн Бурхна зааврар амрцхав.