Лука 21 - Хальмг келнд орчулсн Әрүн Бичлһс

Белвсн күүкд күүнә өгсн бәрц

¹ Байн әмтн сүмин зөөрин саңгд бәрц белгүдән яһҗ тәвдгинь Исус хәләв.

² Тедн заагт угатя белвсн күүкд күн хойрхн улан мөңгнә шаальг тәвв. Исус түңгинь үзчкәд келв:

³ – Эн угатя белвсн күүкд күн цуг наадк әмтнәс ик бәрц өгв гиҗ Би таднд үнәр келҗәнәв.

⁴ Цуһар әмтн байн зөөрәсн үлү бәәсн нег хүвинь өгв, эн болхла угатя болв чигн үлдсн мөңгән тәвв. Тер мөңгнь күүкд күүнә эдлврт күрх мөңгн бәәҗ.

Сүм хольврлһна туск әәлдхл

⁵ Зәрм улс сәәхн үнтә чолуһар тосхгдсн Бурхна сүмин тускар болн әмтнә авч ирсн бәрц белгүд терүг яһҗ сәәхрүлсин тускар келхлә, Исус теднд келв:

⁶ – Цагнь ирхлә, цуг эн тана үзҗәсн юмн цугтан хольврад унх, чолун деер нег чигн чолун үлдшго.

Өвәрцс болн көөлһн

⁷ Сурһульчнр сурцхав: – Багш! Кезә цуг эн учрх? Тер цаг өөрдлһнә ямаран темдг үзгдх? – гив.

⁸ Тер келв: – Тадниг күн меклвзә, болһатн. Юңгад гихлә, кесг әмтн Мини нер зүүҗ ирәд келх: «Би Христосв» эс гиҗ «Цагнь ирв», гих. Бичә тедниг дахҗ йовтн.

⁹ Дәәнә тускар, әмтнә буцлтын тускар соңсад бичә сүрдтн. Түрүләд цуг эн учрх зөвтә, зуг тертн чилгч биш, – гив.

¹⁰ Цааранднь Исус келв: – Нег келн-әмтн талдан келн-әмтнүр дәврх. Нег орн-нутг талдан орн-нутгла дәәллдх.

¹¹ Зәрм нутгар икәр һазр чичрлһн, харһнлһн болх, ик әәмшгтә хальдврта гемәр әмтн гемтх. Берк аюлта йовдлмуд болх, болв теңгрәс ик әәмшгтә өвәрцс һарх.

¹² Зуг цуг эн берк йовдлмуд учрхин өмн тадниг олн дундас көөх. Нанас көлтә тадниг хурлд зарһла харһулх, бәрҗ авад түүрмд хайх, һардачнрин, хаадудын һарт бәрүлх.

¹³ Тер цагт таднд Мини тускар герчлх арһ һарх.

¹⁴ Зуг бийән харсхин төлә ю келхм гиҗ зовад урдаснь бичә ухалтн.

¹⁵ Би таднд тиим цецн үгмүд болн уха зааҗ өгхв, тадна хортнас нег чигн күн тана өмнәс сөрүд үг келҗ чадшго, зөрлцҗ чадшго.

¹⁶ Тадниг һарһсн эк-эцктн, ахнр, элгн-садн, үүрмүд урвх, тадна зәрмнь әмнәсн хаһцх.

¹⁷ Нанас көлтә таднд цуһар дурго болх,

¹⁸ зуг нег чигн үсн тана толһаһас уншго.

¹⁹ Кемр тадн цуг энүг тесҗ дааҗ чадхла, бийән аврҗ чадхит, – гив.

Ерусалимин хольврлһна туск әәлдхл

²⁰ – Ерусалим балһсиг кесг цергәр бүсләтә үзхләрн: терүнә хольврлһна цагнь өөрдв гиҗ медтн.

²¹ Тер цагт Йудьяд бәәсн әмтн уул тал зулҗ гүүтхә, балһснд бәәсн әмтн балһснас һарад цааран әрлҗ йовтха, балһснд эс бәәсн әмтн бичә хәрү иртхә.

²² Юңгад гихлә, цуг эн өшә авх өдрмүд болх. Цуг бичсн үгмүднь бүттхә!

²³ Көкүл күүкдтә болн саата күүкд улст йир берк күнд болх! Эн орн-нутг ик аюлла харһх. Эн келн-әмтн Бурхна зарһла харһх.

²⁴ Зәрмнь үлдин үзүрлә харһад үкцхәх, зәрмнь нутгин бәрәнд бәргдх. Буру номта әмтнә цаг эс чилтл Ерусалимиг буру номта әмтн эзлх, – гив.

Күмни Көвүнә ирлһн

²⁵ – Нарн деер, сар деер болн одн деер кесг өвәрц темдг үзгдх. Орчлң деер бәәсн орн-нутгуд теңгсин шууганас болн көдлҗәсн ик дольганас сүрдцхәх.

²⁶ Нарт делкәд өөрдҗ йовх юмна өмн әмтн сүмсән алдад, харһцад унх, теңгрин күчн ормасн көндрҗ чичрх.

²⁷ Тер цагт тедн үүлн деер Күмни Көвүг сүртә күчтәһәр болн мөңк туурмҗтаһар ирҗ йовхинь үзх.

²⁸ Эн экләд учрхла, нурһан тинилһҗ, толһаһан өргтн, тана аврлт өөрдҗ йовхнь тер мөн, – гив.

Инҗр модна тускар

²⁹ Исус теднд үлгүрләд иигҗ келв: – Инҗр модыг болн наадк моддыг хәләтн.

³⁰ Ац деернь хамтхасн һархла, тадн зуна цаг өөрдҗ йовхинь меднәт.

³¹ Тегәд чигн тер йовдлмуд учрҗахинь үзхлә, Бурхна йосн өөрдҗ йовхинь медтн.

³² Би таднд үнәр келҗәнәв, эн улсин уңг-тохм чилтл цуг эн учрх.

³³ Теңгр һазр хойр уга болҗ одх, зуг Мини келсн үгмүд сольгдшго, – гиҗ келв.

Белн болтн

^34-35 – Тер өдр ирхлә, тана зүркитн согту бәәдл, әрк, җирһлин үүмллһн бичә диилтхә гиҗ саглтн, хавхгт бәргдвзәт. Бийән хәләтн, юңгад гихлә, тер өдр цуг нарт делкәд бәәсн әмтнд генткн учрх.

³⁶ Цуг тер аюлта йовдлла эс харһхин төләд, Күмни Көвүнә өмн зогсхин төләд, оньдин зальврад сергг бәәтн, – гив.

³⁷ Исус тедниг сүмд өдр болһн сурһдг бәәҗ, асхн болхла Тер Олив гидг уулур йовад, сөөһән давулдг бәәсмн.

³⁸ Өрүн эртәр әмтн саак кевәрн Терүг соңсхин төлә сүмд ирдг бәәсмн.