Лука 14 - Хальмг келнд орчулсн Әрүн Бичлһс

Паршин герт

¹ Бемб өдр Исус нег байн паршмудын ахлачин герт хот ууҗасмн. Паршмуд Исусиг шинҗлҗ суусмн.

² Терүнә өмн усн хавдр өвчтә күн сууҗ.

³ Исус паршмудас болн закана багшнрас: – Бемб өдр эдгәх йосн бәәнү аль угай? – гиҗ сурв.

⁴ Цуһар тагчг бәәв. Тиигхлә Исус гемтә күүг дуудад, эдгәһәд йовулв.

⁵ Цааранднь Исус: – Кемр тана көвүн эс гиҗ цар бемб өдр худгт унхла, тадн тер дарунь йовад, терүг худгас һарһҗ авхит, тиим эсий? – гиҗ сурв.

⁶ Тедн хәрүднь ю келхән медҗ чадсн уга.

Гиичнрин болн эзнә тускар

⁷ Әмтиг ширән өөр күндтә орм эзлхәр шунҗасинь үзәд, Исус теднд үлгүрләд иигҗ келв:

⁸ – Кемр чамаг хүрмин нәәрт дуудхла, күндтә орм эзлхәр бичә зүтк, тер юңгад гихлә, чамас деер күндтә күн тер хүрмд дуудгдсн болх.

⁹ Тиигхлә чамаг болн тер күүг дуудсн эзн өөрдәд иигҗ келх: «Эн күүнд зә һарһ» гих. Тиигхлә чи ичәд хамгин му ормд суух зөвтә болхич.

¹⁰ Хүрмд дуудсн цагла хамгин ардк ормд су, чамаг дуудсн эзн ирәд: «Үүр минь, одад күндтә ормд су», – гиҗ келх. Тиигхлә чи әмтнә чирәд ачта күн болҗ үзгдхич.

¹¹ Кен чигн бийән деегшлхлә – дорацулгдх, болв кен чигн бийән дорацулхла – деегшлх.

¹² Дәкәд Исус Терүг дуудсн паршд иигҗ келв: – Чи үдин эс гиҗ асхни хотд үүрмүдән, ахнран, элгн-садан эс гиҗ хам-хоша бәәдг байн әмтиг бичә дууд. Яһад гихлә, тедн чамаг бас дуудад, тадн хоорндан өрн уга болхит.

¹³ Чи нәәрән кехләрн угатя, эрмдгтә, доһлң болн сохр әмтиг дууд.

¹⁴ Тиигхлә чи буйн кишгтә болхич. Тедн чамаг хәрү дуудҗ чадшго, зуг чик седклтә әмтнә әмдрллһнә өдрт чини өгсн юмн чамд хәрү ирх.

Алдр ик нәәрин тускар

¹⁵ Цуг энүг соңссн гиичнрин дундас нег күн Исуст: – Бурхна орн-нутга нәәрт орхнь буйн кишгтә! – гив.

¹⁶ Исус хәрүднь келв: – Нег күн ик нәр кеһәд кесг гиичнр дуудв.

¹⁷ Нәәрин цаг өөрдхлә, тер эврәннь зарцан илгәһәд дуудгдсн улст: «Манад иртн. Цугтан белн», – гинә.

¹⁸ Тиигхлә цуһар негдсн кевтәһәр гемән сурцхав. Түрүңкнь: «Би шиңкән һазр хулдҗ авув. Йовад хәләх зөвтәв. Буйн болтха, буруһм тәвтн», гинә.

¹⁹ Дарукнь: «Би арвн цар хулдҗ авв, тедниг яһҗ көдлдгинь хәләхәр йовҗанав. Буйн болтха! Гемм тәвтн!» гинә.

²⁰ Һурвдгчинь: «Би шиңкән гер авв, ирҗ чадшгов» гинә.

²¹ Зарц герүрн ирәд, цугинь эзндән келҗ өгв. Тиигхлә герин эзн уурлад зарцдан: «Хотна уульнц, һудмҗ болһнар йовад угатя, эрмдгтә, сохр, доһлң әмтиг дууд», гиҗ келв.

²² «Эзн минь, тана келсәр бидн цугинь күцәввидн, зуг бас чигн орм бәәнә», гиҗ зарц келв.

²³ Тиигхлә эзн зарцд: «Чи хаалһ болн хотна зах болһнар йовад, харһсн әмтиг герүрм дуудад авч ир! Мини герм гиичнрәр дүүртхә!» гиҗ закв.

²⁴ Урднь дуудгдсн әмтнәс нег чигн күн Нанла төрүц нәәрлҗ чадшго, Би таднд келҗәнәв, – гив.

Исусин сурһульч гисн кемб?

²⁵ Исусла хамдан кесг әмтн йовла, тегәд теднүр хәләһәд Тер иигҗ келв:

²⁶ – Кен Нан тал ирәд, зуг эк-эцкәсн, гергнәсн, үрдәсн, ахнр-эгчнрәсн, әмн-җирһләсн үлү деер Нанд дурта эс болхла, тер Мини сурһульч болҗ чадшго.

²⁷ Күн болһн эврәннь кирсән авч йовад Намаг эс даххла, Мини сурһульч болҗ чадшго.

²⁸ Кемр тадна негнь гер бәрхәр седхлә, түрүләд тер сууһад тосхлтыг дуусх мөңгнь күрх угаһинь тоолх биший?

²⁹ Кемр оңданар кехлә, тер герин ул тәвәд, герән тосхҗ дуусҗ чадшго болҗ һарх. Энүг үзсн улс терүг наад бәрх.

³⁰ «Эн күн герән экләд тосхҗаһад, дуусҗ чадсн уга», гиҗ тедн келх.

³¹ Эс гиҗ нег хан талдан хаанас бийән харсхар седхлә, түрүләд тер сууһад, арвн миңһн цергәрн хөрн миңһн хортна цергиг диилҗ чадхий гиҗ ухалх. Тиим эсий?

³² Кемр тер бийән харсҗ чадшгоһинь медхлә, хортн эс өөрдтл эвин тускар сурхар элчнрән илгәх.

³³ Цуг эн тадна туст бас ирлцҗәнә. Кемр тадн эн бәәсн зөөрм нанд керго гиҗ эс келхлә, Мини сурһульчнр болҗ чадшгот, – гив.

Амтн уга давсн

³⁴ – Давсн – сән юмн, зуг кемр давсн эврәннь амтан геехлә, юуһар амтынь орулхмт?

³⁵ Тиим давсн юмнд керго болна, һазр ясруллһнд чигн тер тус болшго. Энүг күн авад хайчкна. Соңсхар седснь соңстн! – гив.