Лука 13 - Хальмг келнд орчулсн Әрүн Бичлһс

Үкш уган төлә килнцтә җирһлән үлдәтн

¹ Тер цагт Исус тал әмтн ирәд Һалилья улсла ю учрсиг келҗ өгсмн. Пилат тедниг сүмд тәкл тәксн цагт тер әмтнә цусиг сетрә малын цуснла холяд ниилүлҗ.

² Исус хәрүднь иигҗ келв: – Эн Һалилья улс наадк Һалилья әмтнәс хамгин килнцтә болад тиигҗ зовагдҗ гиҗ тадн санҗадг болвзат?

³ Уга, зуг кемр тадн килнцтә җирһлән эс үлдәхлә, тадн бас үкхит! – гиҗ Би таднд келҗәнәв.

⁴ Шилоахин бәәшңгин дора даргдад үксн арвн нәәмн күүнә тускар ю келҗ болхмб? Тедн Ерусалимин наадк әмтнәс үлү килнцтә бәәсмн гиҗ санҗадг болвзат?

⁵ Уга. Зуг Би таднд келҗәнәв, кемр тадн килнцтә җирһлән эс үлдәхлә, тадн бас үкллә харһхит! – гив.

Урһц өгдго инҗр модна тускар

⁶ Цааранднь Исус үлгүрләд иигҗ келв: – Нег күүнә уста үзм урһдг һазрт инҗр гидг модн урһҗ. Нег дәкҗ эзн инҗр модна темс хәләхәр йовв, зуг олҗ чадсн уга.

⁷ Тиигхлә тер күн көдләчдән: «Би һурвн җилдән инҗр темс өгнү угай гиҗ хәләхәр нааран ирнәв, болв темсн уга болна. Чавчад хайчк энүг, эн модн ю хәәҗ өңгәр энд орм эзлхмб?» – гиҗ келнә. «

⁸ Эзн минь, дәкәд нег җилд энүгән үлдәтн. Би эн һазриг шеегәр бордад малтнав,

⁹ дарук җилд модн темс өгхн болвза, кемр темсн уга болхла, энүг чавчад хайчкхмн», – гиҗ көдләч хәрү өгв.

Бемб өдр күүкд күүг эдгәлһн

¹⁰ Бемб өдр Исус нег хурлд әмтиг сурһла.

¹¹ Тенд нег күүкд күн бәәҗ. Тер арвн нәәмн җилд гемин сәкүснд эзлгдсн бәәҗ. Күүкд күн йосндан нурһан һооднь тинилһҗ чаддго, бөгдһр нурһта бәәҗ.

¹² Исус терүг үзәд, дуудҗ авад: – Эгч минь! Чи эврәннь өвчнәсн сулдвч! – гиҗ келв.

¹³ Исус күүкд күүнә толһа деернь һаран тәвв, тернь дарунь нурһан тинилһәд, Бурхнд магтал өргв.

¹⁴ Хурлын һардач Исусиг бемб өдр кү эдгәв гиһәд уурлв. Тер ирсн әмтнүр хәләһәд: – Көдлмш кехин төлә зурһан өдр бәәнәлм! Бийән эмнүлхин төлә бемб өдрлә биш, наадк өдрмүдт ирцхәтн! – гиҗ келв.

¹⁵ Хәрүднь Исус терүнд: – Хойр чирәтә әмтн! Бемб өдр тадн царан эс гиҗ элҗгнән хашаһасн һарһад, услхар һолур туунат. Тиим эсий?

¹⁶ Энтн Абрахамин бүләс һарсн күүкн, эрлг энүг арвн нәәмн җилдән күлчксн бәрҗ. Тегәд эн күүкд күүг бемб өдр сулдххмн биш билү? – гиҗ сурв.

¹⁷ Исусиг келснә хөөн Терүнлә өшәркҗәсн әмтн ичәд эмәв, наадк улс цугтан кесн өвәрцднь икәр байрлцхав.

Горчсин экнә тускар

¹⁸ Цааранднь Исус: – Бурхна йосиг юунла дүңцүлҗ болхмб? Тер ямаран гиҗ санҗанат?

¹⁹ Бурхна йосиг эврәннь герин һаза тәрсн горчсин экнлә дүңцүлҗ болхмн. Тер экн нигтәр урһад, ик гидг моднд хүврв, теңгрин шовуд нисҗ ирәд, терүнә ац деернь үүрән ясдг болв, – гиҗ келв.

Өдмгин экнә тускар

²⁰ – Бурхна йосиг бас юунла дүңцүлҗ болх? – гиҗ Исус дәкәд сурв.

²¹ – Тертн һуйрт искәчксн экнлә әдл, күүкд күн терүг авад дөчн килограмм һуйрт тәвнә. Тер һуйр өсҗ одна, – гив.

Уутьхн үүдн

²² Исус балһсд, селәд эргәд, әмтиг сурһҗ йовсмн. Исус Ерусалимур темцәд йовҗ.

²³ Нег күн Терүнәс: – Тана зергәс! Цөн улс авргдхий? – гиҗ сурв. Исус иим хәрү өгв:

²⁴ – Уутьхн үүдәр орхар зүтктн, тер юңгад гихлә, кесг әмтн орхар седх, зуг орҗ чадшго.

²⁵ Герин Эзн босад үүдән хаахла, тадн үүднә ца зогсад, үүдинь цокад келхит: «Деед Эзн, буйн болтха, үүдән маднд сектн!» Зуг «Би тадниг чигн медхшв, альдас тадн ирситн чигн медхшв!» – гиҗ Тер келх.

²⁶ Тиигхлә тадн келхит: «Бидн Танла хамдан сууҗ хот уулавидн, Та мана уульнц болһнд сурһлат».

²⁷ «Би тадниг чигн, альдас тадн ирситн чигн медхшв. Му үүл кесн әмтн Нанас хооран һартн», – гиҗ Тер хәрүднь келх.

²⁸ Абрахамиг, Ицхакиг, Яковиг болн цуг әәлдәчнриг Бурхна орн-нутгт үзхләрн, зуг тадн тендәс көөгдсән медәд уульхит, шүдән хәврхит.

²⁹ Кесг әмтн зүн, барун, ар, өмн үзгәс ирәд, Бурхна орн-нутга нәәрт орман эзлх.

³⁰ Тодлҗ автн: зәрм сүүлңкнь түрүңкнь болх. Түрүңкнь сүүлңкнь болх, – гив.

Исус Ерусалимин тускар харм төрҗ уульв

³¹ Тер цагт нег цөөкн паршмуд Исус тал өөрдәд: – Эн һазрас әрл, талдан һазрур йов, тер юңгад гихлә, Херод чамаг алхар седҗәнә, – гиҗ келв.

³² Исус иим хәрү өгв: – Тер алач аратур йовад, иим үг келтн: Би хар сәкүсдиг эндр-маңһдур чигн көөһәд, әмтиг эдгәхв, болв һурвдгч өдртнь кергән дуусхв.

³³ Юн учрв чигн Би эндр, маңһдур, нөкәдүр, цааранднь чигн эврәннь үүлән күцәх зөвтәв, юңгад гихлә, Ерусалимас даву талдан үкх һазр әәлдәчд уга!

³⁴ Хәәрн Ерусалим, Ерусалим! Чи әәлдәчнриг уга кенәч! Чам тал илгәсн әмтиг чолуһар цокҗ алнач! Кедү дәкҗ Би чини үрдүдиг, һууҗмулмудан җивр доран цуглулсн така мет цуглулхар седләв. Тедн тиигхәр седсн уга!

³⁵ Тер учрар тана гер хоосн болтха! Би таднд келҗәнәв: «Деед Эзнә нерн деерәс ирснь әдстә!» гиҗ келтл Намаг үзшгот! – гив.