Левит 9 - Хальмг келнд орчулсн Әрүн Бичлһс

Ахарон бийиннь төлә болн олн-әмтнә төлә бәрц бәрнә

¹ Нер зүүлһнә долан хонгин хөөн нәәмдгч өдртнь Моше Ахарониг көвүдтәһинь болн Израилин медәтнриг дуудад,

² Ахаронд келнә: – Килнцәс цеврллһнә бәрц бәрхин төлә туһл авч ир. Шаталһна авъяс күцәхин төлә хуц авч ир. Хоюрн эрмдг уга болх йоста. Тедниг Деед Эзнә өмн зогса.

³ Израилин улс килнцәс цеврллһнә бәрц бәрхин төлә тек, шатахин төлә эрмдг уга нег җилә туһл болн хурһ авч иртхә гиҗ кел.

⁴ Деед Эзнә өмн эвцлһнә бәрц бәрхин төлә бух болн хуц авч иртхә. Бас олив тоснд элдсн өдмгин бәрц авч иртхә. Яһад гихлә эндр Деед Эзн таднд үзгдәд ирх!

⁵ Израилин улс Мошен келсиг цугтаһинь Харһлтын Шатрт авч ирәд Деед Эзнә өмн хамцан кевтән зогсцхав.

⁶ Моше келв: – Таднд Деед Эзнә туурмҗ буухин төлә Деед Эзн эн юм тадн кетхә гив.

⁷ Моше Ахаронд келв: – Тәкл тәкдг орм тал өөрд, эврәннь цеврллһнә болн шатах бәрцән авч ир. Теднәр бийиннь болн олн-әмтнә төлә гемән хәрүллһнә авъяс күцә. Дәкәд Деед Эзнә заасар олн-әмтнәс гемән хәрүллһнә бәрц өг.

⁸ Ахарон тәкл тәкдг орм тал өөрдәд, бийиннь төлә цеврллһнә авъяс күцәҗ туһл малыг алв.

⁹ Көвүднь терүнд туһлын цус авч өгв. Ахарон тер цуснд хурһан норһад, тәклин ормин өврмүдтнь түркв. Үлдсн цусиг тәклин ормин улд асхв.

¹⁰ Цеврллһнә бәрцин өөкинь, бөөринь болн элкнә семҗинь Деед Эзн Мошед заасар тиигҗ Ахарон тәклин ормд шатав.

¹¹ Туһлын махнь болн арснь бәәрнәс һазаран һарһгдад шатагдв.

¹² Дәкәд Ахарон шатагдх бәрциг алв. Көвүднь терүнд бәрцин цусинь авч өгв. Ахарон тәклин ормиг дөрвн үзгәснь цус цацад әрүслв.

¹³ Көвүднь чавчсн махиг болн толһаһинь авад Ахаронд өгв. Тедниг цугтаһинь тер тәклин ормд шатав.

¹⁴ Бәрцин дотринь болн көлмүдинь уснд уһаһад, тәклин ормд шатагдх бәрцлә хамднь шатав.

¹⁵ Дарунь тер олн-әмтнә авч ирсн малмудыг бәрцд орулв. Теднә цеврллһнә төлә авч ирсн текиг алад, өмнкләрн әдл цеврллһнә авъяс күцәв.

¹⁶ Дәкәд шатагдх малыг һарһад, кех диг-дараһар тәкл тәкв.

¹⁷ Дарунь тер өдмгин бәрцәс нег атхм авад тәклин ормд шатав. Тернь өрүн шатасн бәрцст немр болв.

¹⁸ Олн-әмтнә эвцлһнә бәрц гиһәд Ахарон бухиг болн хуциг алв. Көвүднь терүнд бәрцин цусиг авч өгв. Ахарон тәклин ормин эргнднь цацл цацв.

¹⁹ Тедн Ахаронд бухин болн хуцин өөкинь авч өгв. Эннь өөктә сүл, дотр өөкн, бөөр, элкнә семҗн.

²⁰ Өөктә тоотынь малын өрч деернь тәвв. Өөкинь Ахарон тәклин ормд шатав.

²¹ Малын өрчинь болн барун ташаһинь Мошен келсәр Деед Эзнә өмн өргв.

²² Ахарон олн-әмтн тал һаран өргәд тедниг әдслв. Цеврллһнә, шаталһна болн эвцлһнә бәрцсәр тәкл тәкәд, тер ормасн хооран һарв.

²³ Моше Ахарон хойр Харһлтын Шатрт орв. Тендәс һарад олн-әмтиг тедн әдслв. Олн-әмтнд Деед Эзнә туурмҗ буув.

²⁴ Деед Эзнәс ирсн һал шаталһна бәрциг болн тәклин ормд бәәсн өөкиг сорад зальгчкв. Терүг үзсн әмтн байрлҗ хәәкрәд, һазр элкдәд унцхав.