Левит 8 - Хальмг келнд орчулсн Әрүн Бичлһс

Ахаронд болн терүнә көвүдт гелң гисн нер зүүлһлһн

¹ Деед Эзн Мошед келнә:

² – Ахарониг көвүдтәһинь дахулад авч ир. Хувцдынь ав, түркх олив тосинь ав, килнцәс цеврллһнә бәрц гиҗ бүрү, 2 хуц болн эс искәсн һуйрар болһсн өдмгтә зембль авч ир.

³ Харһлтын Шатрин үүднд хамцана әмтиг цугтаһинь цуглул.

⁴ Моше Деед Эзнә келсиг күцәв. Олн-әмтн Харһлтын Шатрин үүднд цуглрхла,

⁵ «Деед Эзнә заксиг таднд келҗ өгнәв», – гиҗ Моше келв.

⁶ Ахарониг көвүдтәһинь тер өмәрән һарһад усар уһав.

⁷ Ахарон деер киилгинь өмскв, бүсинь бүслв, деерк хувцинь болн заппуһинь өмскв. Терүг заппун сиилвртә бүсәр боов.

⁸ Ахарона чееҗд тер түңгрцг өлгв, терүнднь урим болн туммим тәвв.

⁹ Ахарона толһаднь тахъя өмскв. Тер тахъян өмн бийднь Деед Эзнә келсәр алтн темдг, әрүн титм, өлгв.

¹⁰ Дәкәд Моше түркх тос авад өргә герт болн дотрнь бәәсн тоотд түркәд әрүслв.

¹¹ Тәклин ормд дола дәкҗ тос цацад, терүн дотр бәәсн юмсинь, уһадг ик савиг болн терүн дор тәвдг тулгиг Моше әрүслв.

¹² Ахарона толһа деер түркдг тос кеһәд, Моше түркәд терүг әрүслв.

¹³ Дарунь Ахарона көвүдиг өмәрән һарһад Деед Эзнә келсәр киилгүдинь өмскәд, бүсинь бүсләд, толһаднь боодһас боов.

¹⁴ Дәкәд тер килнцәс цеврллһнә бәрц бәрхәр бүрү авч ирв. Ахарон болн терүнә көвүд бүрүһин толһа деер һаран тәвцхәв.

¹⁵ Дарунь бүрүг алв. Моше хурһан цуснд норһад, тәклин ормиг цеврлхин төлә дөрвн өвртнь цус түркв. Үлдсн цусиг тәклин ормин улд асхв. Тиигҗ Моше тәклин орм деер гемән хәрүллһнә авъяс күцәһәд, терүг әрүслв.

¹⁶ Бүрүһин дотркинь орасн өөкиг кевтнь, элкнә семҗиг керчҗ авад, 2 бөөринь болн теднә өөкинь кевтнь Моше тәклин ормд шатав.

¹⁷ Наадк әңгинь – бүрүһин арсинь, махинь болн киртә юмсинь – хамцана бәәрнәс холд Деед Эзнә заксар шатав.

¹⁸ Хөөннь шатагдх хуц авч ирв. Ахарон болн терүнә көвүд хуцин толһа деер һаран тәвв.

¹⁹ Хуциг ална. Моше тәклин орм эргүләд цусинь цацна.

²⁰ Хуцин махиг әңгләд чавчна, Моше толһаһинь, чавчсн махинь болн өөкинь шатана.

²¹ Хуцин дотринь болн көлинь уснд уһана. Моше хуциг бүклднь тәклин ормд юм үлдәлго шатана. Эннь бүклдән шатагдх бәрц болҗана. Каңкнсн үнр Деед Эзнд тааста, Терүнд нерәдсн һалын бәрц. Мошед Деед Эзнә заксн заавр.

²² Дарунь хойрдгч хуц авч ирнә. Эннь нерәдлһнә бәрц. Ахарон болн терүнә көвүд хуцин толһа деер һаран тәвнә.

²³ Хуциг ална. Моше хуцин цус Ахарона барун чикнә ашкднь, барун һарин эркәд болн барун көлин эркәд түркнә.

²⁴ Дәкәд Ахарона көвүдиг өмәрән һарһад, Моше көвүн болһна барун чикнә ашкднь, барун һарин эркәд болн барун көлин эркәд хуцин цус түркнә. Тәклин ормд дөрвн үзгәснь цус цацна.

²⁵ Дәкәд хуцин өөктә сүл, дотркинь ораҗасн өөкинь кевтнь, элкнә семҗинь, 2 бөөринь болн деернь бәәх өөкинь, бас хуцин барун ташаһинь авна.

²⁶ Деед Эзнә өмн зогсҗасн зембләс эс искәсн һуйрар болһсн өдмг, олив тосар элдсн нег һуйр болн нимгн һуйр авад, хуцин өөкн деер болн барун таша деернь тәвнә.

²⁷ Эдниг цугтаһинь Ахарона болн терүнә көвүдин һар деер тәвәд Деед Эзнә өмн Моше өргнә.

²⁸ Дәкәд Моше теднә һар деер бәәсн тоотыг авад тәклин ормд шатагдх тоотла хамднь шатана. Эннь нерәдлһнә бәрц бәәсмн. Каңкнсн үнр Деед Эзнд тааста, Терүнд һалын бәрц болҗана.

²⁹ Моше хуцин өрчинь авад Деед Эзнә өмн өргв. Деед Эзнә заксар эннь нерәдлһнә бәрцд орулҗах Мошен хүвнь болҗана.

³⁰ Дәкәд Моше түрклһнә тос авад, тәклин ормас цус авад, Ахаронд болн хувцнднь цацл цацна. Ахарона көвүдт болн теднә хувцдтнь бас цацл цацна. Тиигҗ Ахарониг көвүдтәһинь болн теднә хувцдынь Моше әрүслнә.

³¹ Моше Ахаронд болн көвүдтнь келнә: – Харһлтын Шатрин үүднд эн махиг чанад тер ормднь идтн. Нерәдлһнә бәрцин зембльд бәәх өдмглә хамднь тер махиг идтн. Тиигҗ нанд Бурхн закла: «Энүг Ахарон болн терүнә көвүд идх йоста».

³² Үлдсн махиг болн өдмгиг шататн.

³³ Тадниг гелңд нерәдлһн эс күцтл долан хонгтан Харһлтын Шатрас бичә һартн. Тер керг долан хонгтан кегдх.

³⁴ Эндр кегдсн тоотыг Деед Эзн тадна гемән хәрүллһнә авъяс күцәгдх гиҗ кесмн.

³⁵ Долан хонгтан Харһлтын Шатрин үүднд өдр сө уга бәәтн. Деед Эзнд нерәдәд көдлтн, тиигхлә тадн үкшгот. Тиигҗ нанд закла.

³⁶ Мошеһәр дамҗад Деед Эзнә өгсн заавриг Ахарон болн терүнә көвүднь цугтаһинь күцәв.