Левит 7 - Хальмг келнд орчулсн Әрүн Бичлһс

Һару даалһна бәрцин туск закан

¹ Һару даалһна бәрцин туск диг-даран эн, әрүнәс әрүнә туск юмн.

² Һару даалһна бәрциг шаталһна бәрцлә әдл нег бәәрнд алдмн. Тәклин ормд үзг болһнаснь цусар цацл цацх кергтә.

³ Тәклин ормд өөкинь кевтнь тәвдмн: өөктә сүүлинь, дотр бәәх өөкинь,

⁴ бас 2 бөөринь болн терүн деернь ташан хаҗуд бәәх өөкинь, элкнә семҗ керчҗ авх (терүг бөөртәһинь суһлҗ авх кергтә).

⁵ Деед Эзнд һалын бәрц гиһәд гелң тедниг тәклин ормд шатахмн болҗана. Эннь һару даах бәрц.

⁶ Гелңгин отгин залу улс терүг идҗ чадх. Терүг әрүн ормд идх кергтә. Эннь әрүнәс әрүн юмн.

Гелңгин хүв

⁷ Һару даалһна чигн, килнцәс цеврллһнә чигн бәрцд нег диг-даран: гемән хәрүллһнә тәкл тәкҗәх бәрц гелңгин болҗана.

⁸ Талдан күүнә ормд шаталһна бәрц күцәсн гелң бәрц бәрсн малын арсинь авх.

⁹ Бешт болһсн, дөрвлҗн таавад болһсн эс гиҗ төгрг таавад болһсн өдмгәр нерәдлһнә бәрц өглһнә авъяс күцәсн гелңгин болҗана.

¹⁰ Олив тоснд элдсн эс гиҗ хүүрә ямаран чигн өдмгәр нерәдлһнә бәрц Ахарона цуг хөөт үйнрт әдләр күртнә.

Эвцлһнә бәрцин тускар

¹¹ Деед Эзнд авч ирдг күүнә эвцлһнә бәрцин закан эн.

¹² Кемр терүг ханлт өргәд авч ирдг болхла, тиигхлә ханлтын бәрциг дахулад олив тоснд элдәд, эс искәсн һуйрар болһсн өдмг, тос түркәд, һуйр болн буудян цаһан һуйриг тостаһар сәәнәр элдәд болһх йоста.

¹³ Деернь искәсн һуйрар болһсн өдмг эн нерәдлһнд немгдх. Ханлтын эвцлһнә бәрцин тоод тедн орх.

¹⁴ Деед Эзнд нерәдхин төлә зүсн болһнаснь неҗәһәд өдмг авгдна. Эвцлһнә бәрцин цусар цацл цацсн гелңгин хүвнь эн болҗана.

¹⁵ Эвцлһнә бәрцин ханлтан өргҗәх махиг тер өдртән идх кергтә. Терүнәс нег чигн умш өрүн күртл үлдәҗ болшго.

¹⁶ Андһарар эс гиҗ эврә дурар авч ирсн бәрцән тер өдртән идх кергтә, үлдсинь маңһдуртнь идҗ болх.

¹⁷ Һурвдгч өдрт үлдсн махиг шатах.

¹⁸ Кемр эвцлһнә бәрцин махиг һурвдгч өдрт идхлә, тер бәрц авч ирсн күүнд кергтәд тоолгдшго юмн. Эннь үрҗ одсн махн. Терүг идсн күн гемтәд тоолгдх.

¹⁹ Цевр биш юмнла харһсн махиг идҗ болшго. Терүг шатах кергтә. Цевр күн мах идҗ чадҗана.

²⁰ Кемр бузрдсн күн Деед Эзнд авч ирсн эвцлһнә бәрцин мах идхлә, тер күн эврәннь келн-улс дундас уга кегдх.

²¹ Кемр кен чигн күн бузр юм көндәхлә, күүнә бузрнь чигн болтха, эс гиҗ бузр мал, эс гиҗ җигшүртә юмс болтха, дәкәд Деед Эзнд авч ирсн эвцлһнә бәрцин мах идхлә, тер күн эврәннь келн-улс дундас уга кегдх.

Өөк болн цус идшго закан

²² Деед Эзн Мошед келнә:

²³ – Израилин улст соңсхад кел: үкрин, хөөнә болн ямана өөк бичә идтн.

²⁴ Үксн эс гиҗ аңгудын шуучад алсн малын өөкиг талдан юмнд орултн, зуг бичә идтн.

²⁵ Деед Эзнд һалын бәрц гиһәд авч ирсн малын өөкинь идсн күн эврәннь келн-улс дундас уга кегдх.

²⁶ Альд эс бәәв чигн, хотдан шовудын болн малын цус бичә орулҗ идтн.

²⁷ Хотдан цус орулад идсн күн эврәннь келн-улс дундас уга кегдх.

Эвцлһнә бәрцд гелңгүдин хүвнь

²⁸ Деед Эзн Мошед келнә:

²⁹ – Деед Эзнд авч ирсн эвцлһнә бәрцәсн нег хүвинь Деед Эзнд өгтхә гиҗ Израилин улст кел.

³⁰ Эврәннь һарарн Деед Эзнд һалын бәрц гиһәд белгән өгх йоста: малын өөкинь болн өрчинь өгтхә – эн өрчнь Деед Эзнә өмн белг кевтә өрггдх йоста.

³¹ Гелң өөкиг тәклин ормд шататха. Өрчнь Ахарона болн терүнә хөөт үйнрин болҗана.

³² Тадна эвцлһнә бәрцин барун ташаһинь гелңд белг гиһәд өгтн,

³³ барун ташань Ахарона хөөт үйнрин хүвнь. Тер күн тәклин ормд эвцлһнә бәрцин цусинь болн өөкинь тәвсмн.

³⁴ Израилин улсин авч ирсн эвцлһнә бәрцәс белг гиҗ өргҗәх өрчинь болн белг гиҗ өргҗәх ташаһинь Би авнав. Тедниг Би Ахарон гелңд болн терүнә хөөт үйнрт өгчәнәв. Эннь Израилин улсас мөңкинд теднд өггдх хүвнь болҗана.

³⁵ Деед Эзнд авч ирсн һалын бәрцәс тиим әңгинь Ахарон болн терүнә хөөт үйнр Деед Эзнә гелңгүд гисн нер зүүснә хөөн авчана.

³⁶ Деед Эзн теднд тос түркснә хөөн Израилин улс эднд эн әңгиг мөңкинд – үйәс үйд – өгтхә гиҗ заксмн.

³⁷ Шаталһна закан болн өдмгин, килнцәс цеврллһнә, һаруһинь даалһна, нерәдлһнә болн эвцлһнә бәрцин закан тиим.

³⁸ Энүг цугтаһинь Деед Эзн Синай уул деер Мошед соңсхад келсмн. Синайин көдә һазрт Израилин улс Деед Эзнд бәрц бәртхә гиҗ заксна цагт тиим болҗана.