Левит 4 - Хальмг келнд орчулсн Әрүн Бичлһс

Килнцәс цеврллһнә бәрц

¹ Деед Эзн Мошед келнә:

² – Израилин улст соңсх: Деед Эзнә зааврин негинь кен чигн күн медлго эвдхлә, һарһшго юм һарһхла, иигҗ кех кергтә.

³ Кемр тос түркүлсн ах гелң нег йовдл һарһад, терүнднь цуг әмтн гемшәгдҗәхлә, тиигхлә тер гелң Деед Эзнд килнцәс цеврллһнә бәрц гиһәд эрмдг уга бүрү мал авч иртхә.

⁴ Бүрүг авч ирәд Харһлтын Шатрин үүднд Деед Эзнә өмн зогсатха. Дәкәд һаран бүрүһин толһа деер тәвәд Деед Эзнә өмн алтха.

⁵ Тос түркүлсн ах гелң бүрүһин цусиг кеҗ авад Харһлтын Шатрт орултха.

⁶ Тер цуснд хурһан норһад Деед Эзнә өмн, әрүн бәәрнә көшгин өмн дола дәкҗ цацл цацтха.

⁷ Харһлтын Шатр дотр Деед Эзнә өмн бәәх күҗ уңһдадг тәклин ширән өвртнь бас цус түрктхә. Үлдсн цусинь Харһлтын Шатрин үүднд бәәх тәкл шатадг ормин улд асхтха.

⁸ Цеврллһнә бәрц бәрҗәх бүрүһин өөкинь кевтнь – дотркинь ораҗах болн хаҗуднь бәәх өөкиг – автха.

⁹ Хойр бөөринь болн терүн деернь ташан хаҗуд бәәх терүн деерк өөкинь, элкнә семҗиг керчҗ авх кергтә (терүг бөөртә хамднь суһлҗ авх).

¹⁰ Эвцлһнә бәрц бәрҗәх бухиг тиигҗ эвтәлх кергтә болҗана. Тегәд гелң эн тоотыг цугтаһинь тәкл шатадг ормд шататха.

¹¹ Бүрүһин арсинь болн терүнә бүкл махинь толһатаһинь, көлтә-шииртәһинь, дотрктаһинь болн киртә кевтнь –

¹² бүрүһәс үлдсинь цугтаһинь – бәәрнәс һазаран үмс асхдг цевр ормд һарһад модн түлән деер тәвәд шатах кергтә. Эдниг цугтаһинь үмс асхдг ормд шатахмн болҗана.

¹³ Израилин улсин хамцан ямаран чигн йовдл эндүһәр һарһсмн болхла, терүг эс медсн болхла – кемр тедн Деед Эзнә ямаран чигн заквр эвдхлә, буру йовдлыг хамцан даахмн болҗана.

¹⁴ Теднд буру йовдл һарһсинь заагдх. Тегәд хамцан килнцәс цеврллһнә бәрц бәрхин төлә бүрү мал авч ирәд Харһлтын Шатрин өмн зогсатха.

¹⁵ Хамцана ахлачнр Деед Эзнә өмн бүрүһин толһа деер һаран тәвәд Терүнә өмн алтха.

¹⁶ Тос түркүлсн ах гелң бүрүһин цусиг Харһлтын Шатрт орулад,

¹⁷ хурһан цусар норһад, дола дәкҗ Деед Эзнә өмн, көшгин өмн цацл цацтха.

¹⁸ Харһлтын Шатрт Деед Эзнә өмн бәәх күҗ уңһдах ширән өвринь цусар будтха. Үлдсн цусиг Шатрин үүднд бәәх тәкл шатадг ормин улд асхтха.

¹⁹ Бүрүһәс бәәсн өөкинь кевтнь һарһҗ авад терүг тәклин ормд шатах кергтә.

²⁰ Цеврллһнә бәрцд орулҗах бүрү малын бәрциг күцднь күцәхмн болҗана. Тиигҗ гелң терүн деер гемән хәрүллһнә авъяс кеҗәнә. Тегәд цуг хамцана килнцнь тәвгдҗәнә.

²¹ Бүрүһин бүкл махинь күүнә бәәрнәс һарһад, өмнкләһән әдләр шатах кергтә. Эннь хамцана төлә кеҗәх килнцәс цеврллһнә бәрц.

²² Кемр һардач килнц һарһхла, кемр тер зөрц биш Деед Эзнә заавр эвдхлә, тер гемтә болхла,

²³ эс гиҗ терүнә һарһсн буруһинь заахла – тиигхлә тер күн эрмдг уга тек авч иртхә.

²⁴ Текин толһа деер тер һардач һаран тәвәд, Деед Эзнә өмн шаталһна тәкл тәкдг ормин хаҗуд алтха. Эннь килнцәс цеврллһнә бәрц болҗана.

²⁵ Тегәд гелң хурһан эн бәрцин цуснд норһад шатадг тәклин өвринь цусар будтха. Үлдсн цусинь тәклин ормин улд асхтха.

²⁶ Текин өөкинь кевтнь тәклин орм деер эвцлһнә бәрц кевтә шатах кергтә. Тиигҗ гелң терүн деер гемән хәрүллһнә авъяс кеҗәнә. Һардач гемән хәрүллһнә авъяс күцәһәд буруһас тәвгднә.

²⁷ Кемр эгл әмтнәс кен-негнь зөрц биш йовдл һарһхла – Деед Эзнә ямаран чигн заавр эвдхлә – тер бурута болад,

²⁸ эс гиҗ терүнд буру йовдл һарһсинь заахла, тиигхлә эрмдг уга яма авч иртхә.

²⁹ Тегәд тер килнцәс цеврллһнә бәрцин толһа деер һаран тәвәд шишлң бәрц шатадг тәклин ормд алтха.

³⁰ Дарунь гелң хурһан цуснд норһад шатадг тәклин өвринь цусар будтха. Үлдсн цусинь тәклин ормин улд асхтха.

³¹ Эвцлһнә бәрцәс авчах кевтә өөкинь цугтаһинь автха. Тер өөкиг гелң тәклин ормд шататха. Эннь Деед Эзнд таасгдх каңкнсн үнр болх. Тиигҗ гелң килнцтә күн деер гемән хәрүллһнә авъяс кеҗәнә. Эн күүнә килнцнь тәвгдҗәнә.

³² Кемр эн күн килнцәс цеврллһнә бәрцән хөөнә сүргәс бәрхәр седҗәхлә, тиигхлә эрмдг уга хө авч иртхә.

³³ Тегәд цеврллһнә бәрцин толһа деернь һаран тәвәд шатадг тәклин ормд алтха.

³⁴ Гелң хурһан бәрцин цуснд норһад шатадг тәклин өвринь будтха. Үлдсн цусинь тәклин ормин улд асхтха.

³⁵ Өөкинь кевтнь, эвцлһнә бәрцд орулҗах хөөнәс авчах кевтә, һарһҗ авх кергтә. Тегәд гелң тер өөкиг тәклин бәәрнд Деед Эзнд нерәдсн һалын бәрцлә хамднь шататха. Тиигҗ гелң гемән хәрүллһнә авъяс тер күн деер кех. Иигҗ күүнә килнцнь тәвгдҗәнә.