Левит 3 - Хальмг келнд орчулсн Әрүн Бичлһс

Эвцлһнә бәрц

¹ Кемр кен-негнь эвцлһнә бәрцән бод малар авч ирхлә – бух эс гиҗ үкр болну – тиигхлә эрмдг уга мал авч ирәд, терүг Деед Эзнә өмн зогсатха.

² Бәрцин толһа деернь һаран тәвәд, терүг Харһлтын Шатрин өмн алтха. Гелңгүд болҗах Ахарона хөөт үйнр тәклин ормиг эргүләд цус цацтха.

³ Эвцлһнә бәрцәс Деед Эзнд дотркинь ораҗах өөкиг кевтнь өгх кергтә, хаҗуднь бәәх өөкиг бас өгх.

⁴ Хойр бөөринь болн терүн деернь ташан хаҗуд бәәх өөкиг, элкнә семҗнәснь керчҗ өгтхә (терүг бөөртәһинь суһлҗ авх кергтә).

⁵ Тегәд Ахарона хөөт үйнр тедниг цугтаһинь тәклин һалд шатчах модн деер кевтх шатагдх бәрцлә хамднь шататха. Эннь Деед Эзнд һалын бәрц, каңкнсн үнр Терүнд тааста.

⁶ Кемр күн Деед Эзнд үүрмг малар эвцлһнә бәрц авч ирхлә – эр эс гиҗ эм болхла – тиигхлә эрмдг уга мал авч иртхә.

⁷ Кемр тер хө авч ирхлә, терүгән Деед Эзнә өмн зогсатха.

⁸ Бәрцин толһа деернь һаран тәвәд Харһлтын Шатрин өмн алтха. Ахарона хөөт үйнр тәклин ормиг эргүләд бәрцин цус цацтха.

⁹ Эвцлһнә бәрцәс Деед Эзнд һалын бәрц гиҗ белгләд өөк өгх кергтә: өөктә сүүлинь (терүг үзүр күртлнь керчҗ авх), дотркинь ораҗах өөк, хаҗуднь бәәх өөкиг кевтнь авх,

¹⁰ хойр бөөринь болн терүн деернь ташан хаҗуд бәәх өөкиг, дәкәд элкнә семҗинь өгтхә (терүг бөөртәһинь суһлҗ авх кергтә).

¹¹ Тедниг цугтаһинь гелң тәклин һалд шататха. Эннь Деед Эзнд һалын бәрц, Терүнд нерәдсн хот болҗана.

¹² Кемр кен-негнь бәрц бәрхәр яма авч ирхлә, терүг Деед Эзнә өмн зогсатха,

¹³ дәкәд терүнә толһа деер һаран тәвәд Харһлтын Шатрин өмн терүгән алтха. Тегәд Ахарона хөөт үйнр тәклин ормиг эргүләд бәрцин цус цацтха.

¹⁴ Деед Эзнд һалын бәрц белгләд, дотркинь ораҗах өөкиг болн хаҗуднь бәәх өөкиг,

¹⁵ хойр бөөринь болн терүн деернь ташан хаҗуд бәәх өөкиг, дәкәд элкнә семҗиг өгтхә (терүг бөөртәһинь хамднь суһлҗ авх кергтә).

¹⁶ Тедниг цугтаһинь гелң тәклин һалд шататха. Эннь Деед Эзнд һалын бәрц, Терүнд нерәдсн хот болх. Терүнд каңкнсн үнр таасгдна. Бәрцин өөкн кевтән Деед Эзнә болҗана.

¹⁷ Таднд эннь мөңк зокал, альд эс бәәв чигн терүг үйәс үйд бәрҗ йовтн: хотдан өөк чигн, цус чигн бичә орултн.