Левит 27 - Хальмг келнд орчулсн Әрүн Бичлһс

Андһар өглһнә закан

¹ Деед Эзн Мошед келнә:

² – Израилин улст кел: «Кемр нег күн андһаран күцәҗәһәд күүнә бәәдл-җирһлин үнинь өгх йоста болхла,

³ тиигхлә залусин үннь 20 настаһас 60 нас наслтл 50 цаһан мөңгн шекель, әрүн бәәрнә шекеләр,

⁴ күүкд улс – 30 шекель болх.

⁵ Кемр 5 настаһас 20 нас күртл залусин үннь 20 шекель, күүкд улсин – 10 шекель болх.

⁶ Кемр 1 сарас авн 5 насн күртл көвүдин үнн 5 цаһан мөңгн шекель, күүкдин – цаһан мөңгн 3 шекель болх.

⁷ Кемр күн 60, терүнәс даву наста болхла, тиигхлә залу күүнә үннь 15 шекель болх. Күүкд күүнә үннь – 10 шекель.

⁸ Кемр андһар өгсн күн зарлсн үниг дегд угатя болад эс өгч чадҗахла, терүг гелң тал авч ирх кергтә. Гелң терүнә бәәдл үнләд, кедү юм өгч чадхинь келх.

⁹ Кемр андһарар маласн Деед Эзнд бәрц бәрҗ болх негинь өгхлә, Деед Эзнд нерәдсн тер мал әрүн чинртә болх.

¹⁰ Терүг талдан малар сольҗ болшго, сәәниг мууһин ормд өгшго, мууг сәәнә ормд өгшго. Болв кемр андһар өгсн күн нег малыг талдан малар сольхла, тиигхлә өгх болсн мал болн сольгдсн мал әрүн болцхах.

¹¹ Кемр андһарар цевр биш мал өгчәхлә, терүг гелңд авч ирх зөвтә. Тиим малар Деед Эзнд бәрц бәрдмн биш.

¹² Сән мууһинь йилһәд, терүнә үнинь гелң келх. Тегәд үннь гелңгин келсәр болх.

¹³ Кемр андһар өгсн күн малыг хулдҗ авхар седхлә, терүнә үн деер бас тавдгч әңгинь немх йоста.

¹⁴ Кемр кен-негнь эврәннь герән Деед Эзнд нерәдсн болхлаг, тиигхлә гелң герин үниг келх йоста. Гер сән мууһинь тер йилһәд келх. Гелң ямаран үн заана, герин үннь тиим мөңгн болх.

¹⁵ Кемр кен-негнь эврәннь нерәдсн герән хулдҗ авхар седхлә, тиигхлә терүнә үнн деерәс тавдгч әңгинь немхмн болҗана. Тегәд гер хәрү эзнәннь болх.

¹⁶ Кемр кен чигн Деед Эзнд эврәннь уңг-тохминнь әңгәс тәрәнә һазр нерәдсн болхла, тернь терүнд тәрх буудян экнә тооһар үнлгдх йоста. Тенд тәргдх ичмәнә хомер болһнь 50 шекель цаһан мөңгн болх.

¹⁷ Кемр кен чигн күн эврәннь тәрәнә һазран Деед Эзнд өөнин җилд нерәдҗәхлә, тиигхлә үнинь күцц тоолхмн болҗана.

¹⁸ Кемр тер күн тәрәнә һазран өөнин байрин хөөн Деед Эзнд нерәдҗәхлә, тиигхлә гелң өөнин җил күртл кедү цаг үлдсиг тоолад үнинь йилһәд, үнинь баһрулх йоста.

¹⁹ Кемр кен негнь нерәдсн тәрәнә һазран хулдҗ авхар седхлә, терүнә үн деер бас тавдгч әңгинь немхмн болҗана. Тегәд тернь хәрү эзндән күртх.

²⁰ Болв эзнь тәрәнә һазриг хулдҗ авлго, талдан күүнд хулдгдсн болхла, тиигхлә терүг хулдҗ авч болшго.

²¹ Өөнин җилд тиим тәрәнә һазр Деед Эзнд нерәдгдсндән әрүн болх. Тегәд тер һазр мөңкинд гелңгин зөөрнь болх.

²² Кемр кен-негнь хулдҗ авсн тәрәнә һазран эврәннь уңг-тохминнь гиҗ эс тоолҗасндан Деед Эзнд нерәдхлә,

²³ тиигхлә гелң терүнә үниг өөнин байр күртл җилмүдәр тоолтха. Тер нерәдҗәх күн тәрәнә һазрин үниг өдрин бийднь гелңд өгх йоста. Эннь Деед Эзнд бәрҗәх әрүн бәрц.

²⁴ Тегәд өөнин байрин җилд һазр урднь хулдсн күүнд хәрү өггдх. Эннь терүнә уңг-тохмин һазр бәәсмн.

²⁵ Эн үниг цугтан әрүн бәәрнә шекеләр йилһнә. Нег шекель 20 гера болдг.

²⁶ Малын түрүңк төлнь Деед Эзнд нерәдгддмн биш. Энүг угаһар Деед Эзнә болҗана. Үкрин, хөөнә түрүн һарсн төлнь Деед Эзнә болҗана.

²⁷ Кемр тер түрүңк төл цевр биш малын болхла, терүнә үн деер бас тавдгч әңгинь немәд хулдҗ авч болҗана. Болв тер малыг эс хулдҗ авсмн болхла, келсн үнәрнь хулдх.

²⁸ Зуг Деед Эзнд нерәдәд өгсн күүг, малыг эс гиҗ уңг-тохмин һазрин әңгиг хулдҗ болшго, хәрү хулдҗ авч болшго. Тернь Деед Эзнд нерәдсн әрүнәс әрүн бәрц.

²⁹ Алгдх йоста күүг хулдҗ авч болшго. Терүг алх кергтә болҗана.

Урһцин арвна әңгнь

³⁰ Һазрин өгчәх урһцин, моддын темсдин арвна хүвнь Деед Эзнә. Эннь Деед Эзнд нерәдсн әрүн бәрц.

³¹ Кемр кен-негнь эврәннь арвна әңгән хулдҗ авхар седхлә, тиигхлә тогтасн үн деер тавдгч әңгинь өгх йоста.

³² Малчнрин тоолҗах бод малын, үүрмг малын арвдгч малнь Деед Эзнд нерәдсн әрүнәс әрүн бәрц.

³³ Сән малмудыг му малмудас йилһх керг уга. Тедниг талдан малд сольх бас керг уга. Болв нег малыг талдан малд сольсн болхла, тиигхлә хоюрн әрүн болцхах. Тедн хулдгдшго».

³⁴ Израилин улсин төлә Деед Эзнә Синай уул деер Мошед өгсн зааврмуд иим болҗана.