Левит 26 - Хальмг келнд орчулсн Әрүн Бичлһс

Зааврмуд күцәснә ачлврмуд

¹ «Бичә бийдән шүтә кетн, бичә бийдән көшә кетн, әрүслсн чолу. Терүнә хаҗуд ирҗ мөргдгоһар эврә һазр деер дүрс һарһсн чолуд бичә тәвтн. Яһад гихлә Би – Деед Эзн, тадна Бурхн.

² Мини бемб өдриг бәртн. Мини әрүн бәәриг күндлтн. Би – Деед Эзн.

³ Кемр тадн Мини зокалмудыг күцәхлә, Мини зааврмудыг күцц бәрхлә,

⁴ тиигхлә Би цагтнь таднд хур орулхув, һазр урһц өгх, көдәд бәәх модд темс өгх.

⁵ Буудяһан хураһад автл, уста үзм цуглулх саам ирх. Уста үзмән цуглулҗ автл, тәрәһән тәрх цаг ирх. Тадн цадхлң бәәхит, эврә һазртан әәмшг уга җирһхит.

⁶ Би тадна орн-нутгт төвкнүн бәәдл өгнәв. Тадн орндан орад унтхла, кен чигн тадниг көндәшго. Тадна һазрас Би зерлг аңгудыг уга кенәв, тана орн-нутгиг дәврҗ күн хоосрулшго.

⁷ Таднас хортн зулад гүүх, тедн тана үлдәс үкх.

⁸ Таднас тавнь 100 кү зулҗ гүүлгүлх. Тана 100 күн 10 000 күүг гүүлгүлх. Тадна хортн тана үлдәс үкх.

⁹ Би тадниг хәләхүв. Тадниг Би өнр-өсклң кехүв. Би Эврәннь бооцаһан таднла күцәнәв.

¹⁰ Тадн хуучн хот-хоолын көрңгән идҗ чиләлго бәәтл терүгән һарһҗ хаяд, шин урһцд орм һарһх кергтә болх.

¹¹ Би таднла бәәхүв. Би таднд дурго болшгов.

¹² Би тадн дунд бәәхүв. Би тадна Бурхн болхув, тадн Мини олн-әмтн болхит.

¹³ Би – Деед Эзн, тадна Бурхн. Тадниг Би Египетин улст мухла бичә болтха гиһәд, тендәс дахулҗ һарһлав. Би тадниг дүңгәһәд һоодан йовтха гиһәд, күчр-күнд мухлан җирһләс һарһҗ авлав.

Зааврмуд эс күцәснә засгврмуд

¹⁴ Кемр тадн намаг эс соңсхла, эн заквриг цугтаһинь эс күцәхлә,

¹⁵ кемр тадн Мини зокалмудыг бурушахла, Мини закадт дурго болҗахла, Мини зааврмудыг һазалхла, кемр Нанла кесн бооцаг эвдхлә,

¹⁶ тегәд таднла Би ю кехиг медхит. Би тадниг әәмшгтә бәәдлд орулхув. Тадниг ханядна болн безг гемд орулнав, нүднәнтн харан буух, тана седкл муурх. Тадн тәрәнә эк тәрхит, болв тус уга болх. Тер өдмгиг тана хортн идх.

¹⁷ Би Эврәннь ууран таднд һарһнав. Хортн тадниг диилх, дурго әмтн таднд нойрхх. Тегәд тадниг күн эс көөлдв чигн ардан хәләлго зулад гүүхит.

¹⁸ Кемр тадн энүнә хөөн Намаг эс соңсхла, Би тадниг килнц һарһснд дола дәкҗ засглнав.

¹⁹ Тадна соңсхвр уга деерклһиг Би таранав. Тадна деерк теңгриг төмрт Би хүврәнәв. Тана дор бәәх һазр улан мөңгн болх.

²⁰ Тадн чидлән хара зөңдән чиләхит. Тадна һазр урһц өгшго, модд болхла темс өгшго.

²¹ Тегәд энүнә дару Мини өмнәс сөрәд бәәхләг, Намаг соңсшгоһар седхлә, килнц һарһад бәәсндтн Би дола дәкҗ Эврәннь засган икдүлхүв.

²² Би тадна өмнәс зерлг аңгуд илгәнәв. Тедн тадна үрдиг алх, тадна малыг алх. Тегәд тадн тооһарн мел баһрад бәәхит, тадна хаалһ эҗгәрәд одх.

²³ Болв кемр энүнә хөөн тадн эс чикрхлә, урдкларн әдл Мини хортн болад үлдхлә,

²⁴ Би бас тадна хортн болнав. Тадна һарһҗах килнцд Би тадниг дола дәкҗ засглнав.

²⁵ Бооца эвдснәс көлтә Би таднас өшәһән авад, үлдән өргнәв! Кемр тадн эврәннь балһсдт бултхла, Би тадниг хальдврта күнд гемд орулнав. Тегәд тадн хортна һарт орхит!

²⁶ Би тадниг өдмг уга үлдәхүв. Өдмг болһхин төлә 10 гергн негхн бештә болх. Өдмгиг чиңнүрдәд таднд өгх. Идв чигн өлсәд бәәхит.

²⁷ Болв энүнә хөөн тадн Намаг соңслго бәәхлә, урдк кевтән Мини өмнәс бурушаһад бәәхлә,

²⁸ тиигхлә Би тадна өмнәс цухлан һарһхув, дола дәкҗ тадниг килцн һарһснд засглхув!

²⁹ Тадн көвүдиннь болн күүкдиннь цогц-махмудынь идхит.

³⁰ Би тадна мөргүлин өндр ормиг хамхлхув, тадна күҗ уңһдадг ормиг уга кехүв. Тадна цогциг хамхрсн шүтәс дунд хайхув. Тадн Нанд җигшүртә болхит!

³¹ Тадна балһсдыг Би хамхлад эҗго һазрт хүврәхүв, әрүн бәәритн хоосрулхув, тадна авч ирсн бәрцин каңкнсн үнр киилшгов.

³² Тадна эн һазриг Би хоосрулхув. Тегәд энд бәәрлхәр ирсн тадна хортн үзснәсн сүрдх.

³³ Би тадниг олн-әмтн дунд тараһад бәәлһнәв, тадниг көөхин төлә үлдән һарһнав. Тадна орн-нутг эҗгәрх, тадна балһсд хамхрсн чолуд болх.

³⁴ Тегәд һазр эврәннь төвкнүн бәәлһнә җилмүдән хәрү тогтах. Цагин эргцд һазр эҗго болснд тадн хортна орн-нутгт бәәхит. Тана болсн һазр амрад, бийиннь төвкнүн бәәлһнә җилмүдән хәрү тогтах.

³⁵ Эн эҗго бәәдл эзлтл, давсн төвкнүн бәәлһнә җилмүдт эс амрсн һазр ода амрх. Төвкнүн бәәлһнә җилмүдин эргцд тадниг тенд бәәхд, һазр амрчасмн уга.

³⁶ Таднас зәрмнь әмд үлдхлә, тедн хортна һазрт бәәх. Теднә зүркнд Би әәмшг орулнав. Хамтхасн көндрв чигн тедн һарад гүүцхәх. Үлдәс зулад гүүҗ йовх мет гүүцхәх, тедниг күн эс көөлдв чигн унцхах.

³⁷ Тедн нег-негән дәврәд үлдәс зулҗ йовх мет гүүцхәх. Теднә ардас күн көөлдҗ йовхмн уга. Тадн хортнд сөрлт кеҗ чадшгот.

³⁸ Тегәд талын улс дунд үкхит, хортна һазр тадниг зальгх.

³⁹ Әмд үлдсн тадна нег цөөкнь хортна орнд килнцәсн көлтә әмдәр илҗрәд үкцхәх. Өвкнриннь килнцәс көлтә әмдәр илҗрәд үкцхәх.

⁴⁰ Болв кемр тедн бийиннь болн өвкнриннь килнц медхлә, тиигхлә тедн Нанд буру йовдл һарһҗав, Нанла өшәркҗәв.

⁴¹ Би терүнәс көлтә теднд дурго болад, хортна орнд тедниг көөҗ һарһув. Кемр теднә догшн зүркн зөвшәрәд эврәннь гемән хәрүлхлә,

⁴² тегәд Би Яковла кесн бооцаһан сергәхүв, Би Ицхакла кесн бооцаһан сергәхүв болн Абрахамла кесн бооцаһан Би сергәхүв. Эн һазрин тускар тодлхув.

⁴³ Эн һазриг теднд үлдәхлә, эҗго болв чигн төвкнүн бәәлһнә җилмүдән хәрү тогтах. Тернь килнцәсн һартл тиим болх. Тедн Мини закадыг бурушав, Мини зокалмудыг һолҗав.

⁴⁴ Болв тиим болв чигн тедн хортна орнд бәәхлә, Би тедниг бурушахшув, тедниг һолшгов. Би тедниг алшгов, теднлә кесн бооцаһан сольшгов. Яһад гихлә Би – Деед Эзн, теднә Бурхн.

⁴⁵ Би теднә өвкнрлә кесн бооцаһан тодлхув. Тедниг Би Бурхнь болхар талдан әмтнә нүүрт Египетәс дахулҗ һарһлав. Би – Деед Эзн».

⁴⁶ Синай уул деер Мошеһәр дамҗад Израилин улст Деед Эзнә өгсн зокалмуд, закад болн диг-даран иим болҗана.