Левит 25 - Хальмг келнд орчулсн Әрүн Бичлһс

Деед Эзнд нерәдсн төвкнүн бәәлһнә җил

¹ Синай уул деер бәәхд Деед Эзн Мошед келҗ:

² – Израилин улст кел: «Мини өгчәх һазр тал ирхләрн, тенд һазр доладгч җил болһн Деед Эзнә җил гиҗ төвкнүн бәәтхә.

³ Зурһан җилдән эврәннь тәрәһән тәр, зурһан җилдән эврәннь уста үзмин ацинь керчҗә. Тәрәнә темсинь цуглулҗ авча.

⁴ Доладгч җилднь тәрәнә һазр амртха – Деед Эзнәд нерәдсн кевтән төвкнүн бәәлһнә җил болх. Тәрәһән бичә тәр, эврәннь уста үзмин һазрт ацинь бичә керч.

⁵ Чини тәрәнә һазрт урһсн тоотыг бичә хураҗ ав. Эс керчсн уста үзмин һазрт уста үзм бичә цуглулҗ ав. Эн җил тер һазр бүклдән амртха.

⁶ Төвкнүн бәәлһнә җилд амрсн һазр таднд теҗәл өгх – таднд, тадна мухла залу улст болн мухла күүкд улст, чамла бәәсн нәәмәдлҗ авсн көдләчнрт,

⁷ чини малд, чини орн-нутгин зерлг аңгудт. Терүнә эврән урһсн темсд цуг таднд теҗәл болх».

Өөнин байрин җил

⁸ «Долан төвкнүн бәәлһнә җил тоолад авчк – дола дәкҗ долаһад җил. Тедн давхлаг – 49 җил –

⁹ доладгч сарин арвдгч өдр бүрә тат. Гемән хәрүллһнә Өдр тадна цуг орн-нутгар бүрә таттн.

¹⁰ Тәвдгч җил әрүн болтха: орн-нутгтан цуг әмтн сулдан бәәхиг зарлтн. Эннь тадна өөнин байр болх. Таднас кен чигн күн эврәннь хүв һазр талан хәрү одх, эврәннь төрл-садн талан одх.

¹¹ Тәвдгч җил таднд өөнин байрин җил. Тадн тәрә тәршгот, тәрәнә һазрт эврән урһсиг хадшгот. Уста үзмин эс керчгдсн ацмудта һазрт уста үзм цуглулҗ авшгот.

¹² Эн өөнин байрин җил таднд әрүн болтха. Зуг һазрт эврән урһсиг идтн.

¹³ Эн өөнин байрин җил тадна кен чигн күн эврәннь отгин хүв һазртан хәрү ирх.

¹⁴ Кемр чи өөрхн әмтндән эврәннь хүв һазран хулдҗахла, эс гиҗ хулдҗ авчахла, бичә нег-негән меклтн.

¹⁵ Өөрхн күүнәсн эврә һазринь хулдҗ авхларн, өөнин байрин хөөн кедү җил давсинь тоол. Чамд эврәннь һазран хулдҗах күн ирх өөнин байр күртл кедү җилдән терүнәс урһц цуглулҗ авч чадхан тоолтха.

¹⁶ Олн җил үлдхлә, үннь икдәд бәәх, олн эс болхла, үннь баһрх. Яһад гихлә тер күн чамд тоота урһц хулдҗана.

¹⁷ Нег-негән бичә меклтн, эврәннь Бурхнас әәтн. Би – Деед Эзн, тана Бурхн».

Төвкнүн бәәлһнә җилин теҗәл

¹⁸ «Мини зокалмудыг күцәтн, Мини закадыг бәртн. Тегәд тадн һазр деер әәмшг уга бәәхит.

¹⁹ Һазр урһц, темс өгәд бәәх. Тадн цадтлан идхит, һазр деер әәмшг уга бәәхит.

²⁰ Тадн сурхит: „Кемр бидн тәрә тәрлго, тәрә хуралго бәәхлә, доладгч җилдән бидн ю идхмб?“

²¹ Зурһадгч җилд Би таднд Эврәннь әдсән илгәнәв, тегәд һазр һурвн җилә урһц өгх!

²² Нәәмдгч җилдән тадн тәрәһән тәрхит, болв хуучн урһцан тер кевтән идәд бәәхит. Терүгән йисдгч җил күртл шин урһц болтл идхит».

Хулдсн һазриг хәрү хулдҗ авлһна тускар

²³ Һазриг мөңкинд хулдҗ болшго. Яһад гихлә һазр Мини, тадн болхлаг Мини бәәр өгсн нүүҗ ирсн улст.

²⁴ Тадна эзлҗәх цуг һазрар уңг-тохминнь хүв һазриг хәрү хулдҗ авх зөв батлҗ автн.

²⁵ Кемр чини ахнр-дүүнр угатя болад бийиннь уңг-тохмин һазрас хүвән хулдхла, тиигхлә терүнә өөрхн төрлнь ирәд терүгинь хулдҗ автха.

²⁶ Кемр тиим төрл уга болхла, тер күн эврән байҗхларн, хулдсн һазран эврән хәрү хулдҗ авч чадҗана.

²⁷ Хулдсн цагасн кедү җил давсинь тоолад, үлдсн җилмүдин һаруһинь өгәд эврәннь һазран автха.

²⁸ Кемр һаруһинь эс өгч чадхла, тер һазр өөнин байр күртл хулдҗ авсн күүнә болад үлдх. Өөнин байрин җилд хулдҗ авсн күн тер һазриг сулдхх. Тегәд хулдсн күн хәрү эврәннь һазран эзлх.

²⁹ Эрсәр хашалсн балһснд кен чигн герән хулдхла, эн гериг хулдхар бәәх өдрәснь җилин эргцд хәрү хулдҗ авч болҗана. Эн кемәс авн хулдҗ авч болҗана.

³⁰ Кемр тер гериг эрсәр хашалсн балһснд хәрү эс хулдҗ авсн болхла, тиигхлә тер мөңкинд хулдҗ авхар бәәсн күүнә болн хөөт үйнрин болх. Тедн тер гериг өөнин байрла сулдхшго.

³¹ Болв эрсәр эс хашалсн селәдт бәәх гермүд һазрин әңг болҗ тоолгдна. Тедниг хәрү хулдҗ авч болҗана. Болв өөнин байрин җилд тедниг сулдхх кергтә.

³² Левитмүдин балһсдар левитмүд бәәсн герән кезә чигн хулдҗ авч чадҗана.

³³ Тер мет талдан левит әмтнәс хулдҗ авч болх. Левитин балһснд хулдгдсн гер өөнин җилд хәрү өгх зөвтә. Яһад гихлә тиим балһсдт гермүд Израилин улс дунд левитмүдин уңг-тохмин әңгнь болҗана.

³⁴ Теднә балһсдын шидр бәәх малын идг бас хулдгдшго: эннь мөңкинд левитмүдин уңг-тохмин әңгнь.

Мөңгәр арсм бичә кетн

³⁵ Кемр чини ахнр-дүүнр угатя-яду болад муурад ирхлә, терүнд дөң бол, бийләһән бәәлһ. Чини герт тер нүүҗ ирсн күн кевтә бәәтхә.

³⁶ Терүнә мөңгәр бичә байҗхар сед, бичә үлү юм ав. Бурхнасн ә, чини төрл чамта бүүрләд бәг.

³⁷ Өгйәһәр мөңг өгхләрн, өгснәсн үлүһәр бичә ав, өгсн хотын үнәс үлү мөңг бичә ав.

³⁸ Би – Деед Эзн, тадна Бурхн. Таднд Канана һазр өгхин төлә, тадна Бурхн болхин төлә Би Египетәс тадниг һарһҗ авлав.

Израилин мухла күүг хулдҗ авлһн

³⁹ Кемр чини төрл угатя болад чамд хулдгдхла, терүг ялч күн кевтә бичә зар.

⁴⁰ Тер күн чини герт нәәмәдлҗ авсн күүнлә әдл эс гиҗ нүүҗ ирсн күүнлә әдл бәәтхә. Тер чамд өөнин байр күртл көдлх.

⁴¹ Хөөннь тер чамас үрдән авад йовх. Эврәннь төрл-садн талан, эврәннь уңг-тохмин әңг талан хәрү одх.

⁴² Тедн цугтан – Мини мухлас. Тедниг Би Египетәс һарһҗ авлав. Тедниг мухласла әдл хулдҗ болшго.

⁴³ Теднд аврлт уга эзн бичә бол, эврәннь Бурхиг икәр күндл.

⁴⁴ Чини орулҗ авчах мухла залус болн мухла күүкд улс эргн шидр бәәх әмтн болх зөвтә.

⁴⁵ Тадн дунд бәәх нүүҗ ирсн әмтиг бас хулдҗ авч чадҗанат. Тана һазрт төрсн теднә өрк-бүлин әмтиг хулдҗ авч болҗана. Тадн теднә эзн болхит.

⁴⁶ Тедниг тадн хөөт үйнртән мөңк өнч кеҗ өгч чадҗанат. Тедн таднд мухласла әдл болҗ бәәтхә. Болв бичә Израилин улст догшн заңган һарһтн. Тедн тадна ах-дү әмтн.

⁴⁷ Кемр чамла бәәх нүүҗ ирсн күн байҗхла, чини төрл күн угатя болад терүнд бийән мухла болхар хулдхла, эс гиҗ терүнә тохма күүнд хулдхлаг,

⁴⁸ тиигхлә хулдгдсн чини төрл хәрү хулдҗ авгдх. Терүг мухла болтха гиҗ хулдсн күүнә ах-дүүһин нег төрлнь хулдҗ авч чадҗана,

⁴⁹ тернь авһнь, авһин көвүн эс гиҗ өөрхн төрлнь. Байҗхларн нам эврән бийән хулдҗ авч чадҗана.

⁵⁰ Эврәннь эзнләһән хамдан тер хулдсн цагасн авн өөнин байрин җил күртл кедү җил давсинь тоолтха. Нәәмәдлҗ авсн көдлмшчин җалвар терүнә сулдхврин үннь йилһгдх зөвтә.

⁵¹ Кемр хулдҗ авчах цагт олн җил үлдҗәхлә, бийиннь сулдхврт тер хулдсн үннә икнкинь хәрү өгх зөвтә.

⁵² Кемр өөнин байр күртл цөөкн җилмүд үлдсн болхла, бәрүлсн мөңгиг җилмүдәр хуваһад, тоолад бийиннь сулдхврт өгтхә.

⁵³ Эзндән тер нег җилд нәәмәдлҗ авсн көдлмшч күүнлә әдл болх. Эзн күн терүнлә догшар бийән бәршго болҗана.

⁵⁴ Болв кемр чини төрлиг эс хулдҗ авхла, тиигхлә өөнин байрин җилд тер эврәннь үрдтәһән сулдхгдх.

⁵⁵ Яһад гихлә Израилин улс Мини мухлас. Тедн Мини мухлас. Тедниг Би Египетәс дахулҗ һарһлав. Би – Деед Эзн, тадна Бурхн».