Левит 24 - Хальмг келнд орчулсн Әрүн Бичлһс

Герлин гегәнә тосна тускар

¹ Деед Эзн Мошед келнә:

² – Һарар кесн оливин цевр тос герлин гегән зогсл угаһар шатхин төлә, чамд авч иртхә гиҗ Израилин улст закад кел.

³ Деед Эзнә өмн терүгәр зогсл угаһар Харһлтын Шатрт көшгин өмн зул өргәд бәәх. Асхнас өрүн күртл шатчах зул бәәдгәр, терүг Ахарон хәләһәд бәәтхә. Эннь таднд өгчәх зокал, үйәс үйд күцәх кергтә.

⁴ Деед Эзнә өмн бәәх цевр алтар кесн герлин гегән деерк зулыг тер оньдин хәләһәд бәәтхә.

Өдмгин тәвцин тускар

⁵ Буудян цаһан һуйр авад 12 хавтха өдмг болһ. Өдмг болһнд ефән арвна хойрнь орх зөвтә.

⁶ Хавтха өдмгиг хойр баг кеһәд тәв. Баг болһнд зурһаһад өдмг Деед Эзнә өмн алтар кесн ширә деер орк.

⁷ Баг болһна хаҗуд цевр ладан тәв. Эннь Деед Эзнд белг гиҗ авч ирҗәх өдмгин дееҗ болх.

⁸ Бемб өдр болһн Израилин улсас зогсл угаһар эн өдмгиг Деед Эзнә өмн тәвтхә. Тегәд эннь Израилин улс мөңк бооцаг күцәҗәх бәрц болҗана.

⁹ Эн өдмг Ахарона болн терүнә көвүдин. Тер өдмгиг тедн әрүн ормд идтхә. Эннь әрүнәс әрүн юмн. Деед Эзнд авч ирҗәх һалын бәрцәс мөңкинд Ахаронд болн хөөт үйнртнь нерәдгдҗәнә.

Бурхиг му келсн күүг цааҗллһн

¹⁰ Израилин улс дунд нег күн бәәҗ. Терүнә экнь Израилин күн, эцкнь Египетин бәәҗ. Бәәрн һазрт тер Израилин улсин негнләнь ноолдна.

¹¹ Израилин күүкд күүнә тер көвүн Деед Эзнә нериг муурулад му келнә. Терүг Моше тал авч одна. Терүнә экин нерн Шеломит, тер Дан гидг отгин Диврин күүкн бәәҗ.

¹² Му келсн күүг бәрәнд авад, Деед Эзнә шиидвр күләнә.

¹³ Деед Эзн Мошед келнә:

¹⁴ – Му келсн күүг бәәрнәс һарһ. Терүнә келсиг соңссн әмтн толһа деернь һаран тәвәд, хамцанд бәәсн әмтн цугтан терүг чолуһар икәр шивтхә.

¹⁵ Израилин улст кел: «Кемр кен-негнь эврәннь Бурхиг му келхлә, тер килнц һарһсндан засглгдх.

¹⁶ Деед Эзнә нериг му келсн күн алгдх. Хамцанд бәәх әмтн цугтан терүг чолуһар икәр шивтхә. Нүүҗ ирсн әмтн болн бәәрн әмтн болну, Деед Эзнә нериг му келснь алгдх зөвтә.

¹⁷ Кү алснь алгдх зөвтә.

¹⁸ Мал алсн күн ормднь ялынь өгх йоста. Әмнә ормд әм даах.

¹⁹ Өөрхн күүндән эрмдг һарһснднь бас тиим эрмдг терүнд һарһх кергтә:

²⁰ хамхлснд хамхлх, нүднә ормд нүдән, шүднә ормд шүдән өгх. Ямаран эрмдг күүнд һарһсинь, тиим эрмдг терүнд һарһх кергтә.

²¹ Мал алсн болхла, тер күн ялынь даах йоста. Кемр кү алсн болхла, терүг бийинь алх кергтә.

²² Нүүҗ ирсн әмтнд болн бәәрн әмтнд нег закан бәәтхә. Яһад гихлә Би – Деед Эзн, тадна Бурхн».

²³ Моше энүнә тускар Израилин улст келв. Му келсн күүг бәәсн ормаснь һарһад чолуһар икәр шивв. Израилин улс Мошед Деед Эзнә келсәр кеһәд күцәв.