Левит 23 - Хальмг келнд орчулсн Әрүн Бичлһс

Бемб өдр

¹ Деед Эзн Мошед келнә:

² – Израилин улст соңсхад келүл: «Деед Эзнә нерәдсн өдрмүд эн. Тер өдрмүдт тадн әрүн хург кех зөвтәт. Мини заасн өдрмүд эн.

³ Зурһан өдртән көдл, доладгч өдр – бемб өдр, төвкнүн бәәлһнә өдр, әрүн хургин өдр. Альд эс бәәв чигн, ямаран чигн көдлмш бичә кетн: эннь Деед Эзнә бемб өдр.

Песах болн Эс искәсн һуйрин нәр

⁴ Деед Эзнә заасн өдрмүд эн, нерәдсн цагтан зәңглх әрүн хург.

⁵ Түрүн сарин арвн дөрвдгч өдр бүрүл орхла Деед Эзнә Песах.

⁶ Тер сарин арвн тавдгч өдр Эс искәсн һуйрин нәр, Деед Эзнә нәр. Долан хонгтан эс искәсн һуйр идтн.

⁷ Түрүн өдр тадн әрүн хург кетн: ямаран чигн көдлмш бичә кетн.

⁸ Долан хонгтан Деед Эзнд һалын бәрцән авч ирцхәтн. Доладгч өдр бас әрүн хург: ямаран чигн көдлмш бичә кетн».

Буудян түрүн боодгин бәрц

⁹ Деед Эзн Мошед келнә:

¹⁰ – Израилин улст соңсхад келтн: «Тадн Мини өгчәх һазрт ирхләрн, тенд урһцан цуглулҗ авхларн, түрүн боодгинь гелңд авч иртн.

¹¹ Гелң тер боодгиг Деед Эзнә өмн таднас тааста бәрц гиҗ өргтхә. Бемб өдрин дарук өдртнь гелң терүг өргтхә.

¹² Буудян боодг өрглһнә өдр тадн нег җил күцсн хөөнә хурһ бәрцд орулх зөвтәт. Тер хурһн эрмдг уга болх йоста. Деед Эзнд шаталһна бәрцд орулгдҗана.

¹³ Олив тоснд элдсн өдмгин бәрц тегәд цаһан һуйрин ефән арвна хойр әңгнь болх зөвтә. Эннь Деед Эзнд һалын бәрц, каңкнсн үнр Терүнд таасмҗта. Деернь чаһр келһн гинә дөрвдгч әңгнь болх зөвтә.

¹⁴ Өдмг чигн, шарсн буудян эк чигн, эс гиҗ түүкә шин эк чигн тадна Бурхнд бәрцән бәрх өдр эс иртл бичә идтн. Эннь таднд мөңкинд, үйәс үйд, альд эс бәәв чигн күцәх зокал.

Долан хонгин нәр

¹⁵ Эн бемб өдрин дарук өдрәс – буудян тәрәнә боодг Деед Эзнд өргснә хөөн – бүкл долан хонг тоолад һарһтн.

¹⁶ Тәвдгч өдрлә, доладгч бемб өдрин дару, шин урһцин һуйрас өдмгин бәрц Деед Эзнд бәртн.

¹⁷ Эврәннь селәдәс бәрцин төлә 2 өдмг авч иртн. Өдмг болһнд ефән хойр арвнань буудян һуйрт орх йоста. Тедниг искәсн һуйрар болһх кергтә. Эннь Деед Эзнд түрүн урһцин бәрц болҗана.

¹⁸ Өдмгтә хамдан эрмдг уга нег җил болсн долан хурһ авч иртн. Бас 1 бүрү, 2 хуц авч иртн. Эннь Деед Эзнд өдмгин бәрц болн чаһр асхҗ шаталһн, һалын бәрц, каңкнсн үнр Деед Эзнд тааста.

¹⁹ Килнцәс цеврллһнә бәрц гиҗ тек мал бас авч иртн. Эвцлһнә бәрц гиҗ нег җил болсн 2 хурһ авч иртн.

²⁰ Тер 2 хурһиг болн деернь тәрәнә түрүн урһцас болһсн өдмгиг Деед Эзнд өргтхә. Эннь Деед Эзнә әрүн юмн. Цугтан гелңгин болҗана.

²¹ Эн өдр әрүн хург кетн. Ямаран чигн көдлмш бичә кетн. Эннь тадна альд эс бәәв чигн үйәс үйд, мөңкинд күцәх зокал.

²² Кемр тәрәһән эврә һазртан хурахларн, тер тәрәнәннь захд күргҗ бичә хад. Хадлһна хөөн үлдсн тәрәнә толһас бичә цуглулҗ ав. Энүг түрү-яду болн нүүҗ ирсн әмтнд үлдә. Би – Деед Эзн, тадна Бурхн».

Бүрә бүшкүрин нәр

²³ Деед Эзн Мошед келнә:

²⁴ – Израилин улст күргәд кел: «Доладгч сарин негдгч өдр тадна төвкнүн бәәлһнә өдр болх зөвтә, әрүн хург. Тер хургин тускар бүшкүрәр ә һарһад медүлтхә.

²⁵ Ямаран чигн көдлмш бичә кетн, Деед Эзнд һалын бәрц авч иртн».

Гемән хәрүллһнә Өдр

²⁶ Деед Эзн Мошед келнә:

²⁷ – Доладгч сарин арвдгч өдр – Гемән хәрүллһнә Өдр. Эн өдр таднд әрүн хург болх йоста. Мацг бәртн, Деед Эзнд һалын бәрц авч иртн.

²⁸ Эн өдр ямаран чигн көдлмш бичә кетн. Яһад гихлә эн өдр Гемән хәрүллһнә Өдр болҗана. Деед Эзнә өмн, тадна Бурхна өмн, гемән хәрүллһнә авъяс күцәгдҗәнә.

²⁹ Эн өдр мацг эс бәрҗәх күн эврәннь келн-улс дундас уга кегдх.

³⁰ Эн өдр көдлсн кен чигн күүг эврәннь келн-улс дундас Би уга кенәв.

³¹ Эн өдр ямаран чигн көдлмш бичә кетн – эннь таднд мөңкинд өгчәх зокал. Терүг альд эс бәәв чигн үйәс үйд күцәтн.

³² Эн өдр таднд кевтән төвкнүн бәәлһнә бемб өдр болх йоста – мацг бәртн. Эн сарин йисдгч өдрин асхнас авн маңһдурк асхн күртл тадн амр-таварн бәәх йостат.

Җолмин нәр

³³ Деед Эзн Мошед келнә:

³⁴ – Израилин улст соңсхад кел: «Доладгч сарин арвн тавдгч өдр Җолмин нәр, Деед Эзнә долан хонгтан кедг нәр.

³⁵ Терүнә түрүн өдртнь әрүн хург болх. Ямаран чигн көдлмш бичә кетн.

³⁶ Долан хонгтан Деед Эзнд һалын бәрц авч ирәд бәәтн. Нәәмдгч өдр таднд әрүн хургин өдр – Деед Эзнд һалын бәрц авч иртн. Эннь нәәрин төгсх өдр. Ямаран чигн көдлмш эн өдр бичә кетн.

³⁷ Деед Эзнә заасн өдрмүд тиим болҗана. Тадн тер өдрмүдиг әрүн хургиг гиҗ зарлад, Деед Эзнд һалын бәрц авч ирәд бәәхит: эврә өдрт авч ирдг бәәдләр шатагдх бәрц, өдмгин бәрц, эвцлһнә болн чаһрин бәрц.

³⁸ Эн цугтан бемб өдр Деед Эзнд авч ирдг тоотас, тадна белгәс болн андһарар авч ирдг бәрцәс, эврә дурар авч ирҗәхәс деернь немр болҗана. Тедниг тадн Деед Эзнд авч ирҗәнәт.

³⁹ Доладгч сарин арвн тавдгч өдр тадн тәрәһән хурахларн, Деед Эзнә нәр кетн. Тер нәр долан хонгтан болх йоста. Түрүн өдр таднд төвкнүн бәәлһнә өдр болтха, нәәмдгч өдр бас төвкнүн бәәлһнә өдр болтха.

⁴⁰ Түрүн өдр садын модна сән темсд автн, пальм модна хамтхасд, нигт хамтхаста модна болн һолын көвәһәр урһдг удн модна ацмуд авад Деед Эзнә, эврәннь Бурхна өмн, долан хонгтан байрлад нәәрлтн.

⁴¹ Эн Деед Эзнә нәәриг долан хонгтан җил болһн кеҗәтн. Эннь таднд мөңкинд өгчәх зокал. Үйәс үйд эн нәәриг доладгч сард кеҗәтн.

⁴² Долан хонгтан җолмудт бәәтн: Израилин бәәрн әмтн цугтан эн өдрмүдт җолмд бәәтхә.

⁴³ Египетәс һарһхларн Израилин улсиг Би җолмд бәәлһсиг тадна иргчин үйин улс цугтан медтхә. Би – Деед Эзн, тадна Бурхн».

⁴⁴ Тегәд Моше Израилин улст Деед Эзнә заасн өдриг зарлв.