Левит 22 - Хальмг келнд орчулсн Әрүн Бичлһс

Әрүн бәрциг кен идхмб?

¹ Деед Эзн Мошед келнә:

² – Ахаронд болн терүнә көвүдт соңсхад кел: «Израилин улсин авч ирҗәх тоотас саглтха. Нанд Израилин улс нерәдәд авч ирҗәх тоотас бас саглтха. Мини әрүн нериг бичә бузрдатха. Би – Деед Эзн».

³ Теднд кел: «Таднас кен чигн ямаран чигн үйдән бузрдсн цагтан, Израилин улс Деед Эзнд нерәдәд авч ирсн бәрц тал өөрдхлә, уга кегдх. Тегәд Мини нүүрт тер дәкҗ үзгдшго. Би – Деед Эзн.

⁴ Ахарона хөөт үйнр проказа гемтә эс гиҗ бий мөчәснь һардг юмта болхла, бәрцин әрүн хотас цевр болтлан идшго юмн. Өңгрсн күүнә бузрдсн хувц-хунр көндәсн кен чигн күн, асань асхрсн кен чигн залу күн,

⁵ үүрмг әмтә юмс көндәһәд бузрдснь, эс гиҗ бузрдах күүг көндәснь (цевр бишнь ямаран чигн учрта болвчн),

⁶ энүнә юуһинь чигн көндәсн кен чигн күн асхн күртл бузр болх. Тиим күн бийән эс уһатл әрүн бәрцәс идҗ чадшго.

⁷ Нарн суухла, тер цевр болх. Тегәд әрүн бәрцәс идҗ чадх. Яһад гихлә тернь терүнә теҗәл.

⁸ Тер күн үксн малын эс гиҗ зерлг аң шуучад алсн малын мах идшго болҗана. Яһад гихлә тер цевр биш болх. Би – Деед Эзн.

⁹ Тедн Мини неквриг күцәтхә, бийдән килнц бичә автха. Эс гиҗ неквр бузрдасндан үкцхәх. Би – Деед Эзн, теднә әрүн бәәдлин булг.

¹⁰ Талын күн әрүн бәрцәсн идшго болҗана. Гелңгин герт бәәх нәәмәдлгдсн ялч бас терүнәс идшго юмн.

¹¹ Болв тер ялчиг гелң хулдад авсмн болхла идҗ чадҗана. Гелңгин герт төрсн ялчнр гелңгин иддг хотас бас идҗ чадҗана.

¹² Гелң биш тохмта күүнд мордсн гелңгин күүкн бәрцин әрүн хотас идшго болҗана.

¹³ Зуг гелңгин күүкн белвсрсн эс гиҗ залуһасн салад үрн уга болхла, дәкн урдкларн әдл эцкиннь герт бәәхлә, тиигхлә эцкиннь идсн хот тер бас идҗ чадҗана. Болв талдан әмтн терүг идшго болҗана.

¹⁴ Кемр талдан күн медлго әрүн бәрцәс идхлә, гелңд тер әрүн бәрциг даңцах зөвтә. Терүн деер тавна нег хүвинь немәд өгх.

¹⁵ Израилин улсин Деед Эзнд авч ирҗәх әрүн бәрциг гелңгүд бичә бузрдатха.

¹⁶ Бичә терүнәс идтхә, бичә килнц һарһтха, эс гиҗ тедн һаруһинь өгх зөвтә. Яһад гихлә Би – Деед Эзн, теднә әрүн бәәдлин булг болҗанав».

Тәкл тәкх малмудын тускар

¹⁷ Деед Эзн Мошед келнә:

¹⁸ – Ахаронд, терүнә көвүдт болн Израилин улст цугтаднь келүл: «Кемр Израилин улсин кен-негнь, эс гиҗ тедн дунд бәәх нүүҗ ирсн әмтн Деед Эзнд шатах бәрц авч ирхләг – андһарар эс гиҗ седкләрн –

¹⁹ тиигхлә тааста бәрцнь бух, хуц, тек – эрмдг уга эр малмуд.

²⁰ Бәрц бәрхәр седхләрн, эрмдгтә мал бичә авч иртн. Тиим бәрц таасгдшго.

²¹ Кемр кен-негнь эвцлһнә бәрц гиҗ бод мал эс гиҗ үүрмг мал андһарар болну, седкләрн болну авч ирхлә, таасгдх зөвтә. Бәрцд орулҗах мал эрмдг уга болхмн болҗана. Терүнд нег чигн тату уга болх.

²² Деед Эзнә бәрцд сохр мал, хамхрсн мөчтә эс гиҗ цогцднь талдан тату бәәхлә, хавдрта, бүрлдлһтә, шархта болхла, тиим малыг Деед Эзнә тәкл тәкдг орм деер белглҗ бичә тәвтн.

²³ Кольчхр көлтә бух эс гиҗ хөн зуг эврә седкләр өгчәх бәрцд орулгдх. Болв андһарар орулҗах бәрцин тоод оршго юмн.

²⁴ Деед Эзнд бәрцд орулхар шавтасн, билцлсн, таслгдсн, керчгдсн бөөсгтә мал бичә авч иртн. Тадна һазрт тиим юм бичә кетн.

²⁵ Талын әмтнәс тиим мал бичә автн. Тиим малыг Бурхна бәрцд бичә орултн, тәкл тәкдг орм деер тедниг бичә тәвтн. Кемр мал эрмдгтә болхла, тадна бәрц Деед Эзнд таасгдшго юмн».

²⁶ Деед Эзн Мошед келнә:

²⁷ – Кемр үкрәс туһл, хөөнәс хурһн эс гиҗ яманас ишк һархла, тедн долан хонгтан экиннь хаҗуд бәәх зөвтә. Нәәмдгч өдртнь болн хөөннь терүгәр Деед Эзнд тааста һалын бәрц бәрҗ болҗана.

²⁸ Үкриг, хөөг болн ямаг төлләнь хамднь нег өдр бәрцд орулхар бичә алтн.

²⁹ Кемр Деед Эзнд ханлтан өргҗ бәрц авч ирхләрн, тертн таасгддгар чикәр кетн.

³⁰ Тер бәрциг нег өдртән идтн, өрүн күртл юм бичә үлдәтн. Би – Деед Эзн.

³¹ Мини заавриг бәрҗ күцәтн: Би – Деед Эзн.

³² Мини әрүн нериг бичә һутатн. Тегәд Би әрүн бәәсинь Израилин улс медх. Би – Деед Эзн, тадна әрүн бәәдлин булг.

³³ Би тадна Бурхн болхар тадниг Египетәс һарһув. Би – Деед Эзн.