Левит 21 - Хальмг келнд орчулсн Әрүн Бичлһс

Гелңгүдин шишлң диг-даран

¹ Деед Эзн Мошед келнә: – Гелңгүд болҗах Ахарона көвүдт соңсхад кел: «Өңгрсн төрл талан өөрдҗ гелң бийән бузрдашго болҗана.

² Зуг кемр хамгин өөрхн улс болхлаг – эк, эцк, көвүн, күүкн, ах-дү,

³ эс гиҗ терүнлә бәәх мордад уга күүкнә эгч-дүнь болхла өөрдҗ болҗана.

⁴ Гелң бийән талдан төрл-саднас көлтә бузрдаһад цевр биш болшго юмн.

⁵ Үксн күүнд һундлан һарһҗ гелңгүд бичә толһаннь үсән хәәчлтхә, сахлыннь үзүринь бичә керчтхә, махмудтан сөрв бичә һарһтха.

⁶ Тедн эврәннь Бурхна әрүн улс болх зөвтә, эврәннь Бурхна нериг бичә һутатха. Тедн Деед Эзнд тәклин ормд бәрцән авч ирцхәнә, Бурхндан хотынь авч ирцхәнә. Тедн әрүн болх зөвтә.

⁷ Тедн эврәннь Бурхна әрүн улс. Тегәд тедн гер авхларн, аля күүкд кү эс гиҗ му нертә гергиг, залуһасн салсн гергиг авх зөв уга.

⁸ Гелңгин әрүниг бәрҗ хәлә. Тер чини Бурхна төлә тәкл тәкдг ормд бәрц авч ирнм. Чамд тер әрүн болтха, яһад гихлә Би әрүнв, Деед Эзн – тадна әрүн бәәдлин булг.

⁹ Кемр гелңгин күүкн аля һарһад, бийән бузрдахла, эцкдән тер му нер өгчәнә. Тиим күүкиг шатах кергтә.

Ах гелңгин диг-даран

¹⁰ Ахнр-дүүнр дундас толһадан тос түркүлсн, гелңгин нер зүүсн ахнь әрүн хувц өмсҗ чадҗана. Тиим күн үксн төрлдән һундлан һарһҗ арзасн үстә йовшго, деерк хувцан шуулшго болҗана.

¹¹ Өңгрсн күн кевтх орм тал гелң оршго болҗана. Нам эцк-экин төлә чигн бийән бузрдашго юмн.

¹² Әрүн бәәрнәс һарх зөв уга. Эврә Бурхна әрүн орм бузрдашго болҗана. Яһад гихлә терүнд нерәдлһ кесмн болҗана – терүнә Бурхнас тосн түркгдсмн. Би – Деед Эзн.

¹³ Тиим гелң зуг гиҗгтә күүк авх.

¹⁴ Белвсн герг авч чадшго. Салсн, му нертә эс гиҗ аля герг мордулҗ авшго. Зуг тер эврәннь тохмас гиҗгтә күүк буулһҗ авч чадҗана.

¹⁵ Тегәд тиим гелң эврәннь хөөт үйнрән бузрдашго, эврәннь тохман бузрдашго болҗана. Яһад гихлә Би – Деед Эзн, терүнә әрүн булг».

Гелңгүдин цогц-махмудт эрмдг уга болх зөвтә

¹⁶ Деед Эзн Мошед келнә:

¹⁷ – Ахаронд кел: «Терүнә хөөт үйнр кемр цогц-махмудтан альк чигн цагтан эрмдгтә болхла, тәкл тәкдг орм тал эврәннь Бурхнд нерәдҗ хот авч ирҗ чадшго юмн.

¹⁸ Цогц-махмудтан сөрвтә күн: кемр сохр, доһлң, чирәнь коочисн, кольчхр көлтә, кольчхр һарта болхла бәрц бәршго болҗана.

¹⁹ Хамхрха көлтә эс гиҗ хамхрха һарта,

²⁰ бөгчхр нурһта, маштг күн, нүдндән хорһта күн, цогцдан бүрлдлһтә эс гиҗ шархта, бөөсгтән эрмдгтә күн Нанд гелңлә әдл көдлшго болҗана.

²¹ Ахарона хөөт үйнр цогц-махмудтан сөрвтә болхла, Деед Эзнд һалын бәрц гиҗ белг авч иршго юмн. Эрмдгтә күн тәклин ормд эврәннь Бурхнд гиҗ хот авч ирх зөв уга.

²² Зуг тиим күн эврәннь Бурхнд нерәдсн хот идҗ чадҗана – әрүнәс әрүнинь болн әрүн бәәрнә хот.

²³ Болв тиим күн көшг тал болн тәклин орм тал өөрдшго болҗана. Терүнә цогц-махмудтнь сөрв бәәнә. Мини әрүн ормиг бичә тер бузрдатха. Яһад гихлә Би – Деед Эзн, теднә әрүн бәәдлин булгнь болҗанав».

²⁴ Моше энүг Ахаронд болн терүнә көвүдт, Израилин улст цугтаднь келүлв.