Левит 2 - Хальмг келнд орчулсн Әрүн Бичлһс

Өдмгин бәрцин тускар

¹ Кемр кен-негнь Деед Эзнд өдмгәр бәрц бәрхәр седҗәхлә, тернь цаһан буудян һуйрар кегдх йоста. Тер күн һуйрт олив тос кеһәд, ладан тәвх.

² Гелңгүд болҗах Ахарона хөөт үйнрт авч иртхә. Гелң терүнәс атхм һуйр тостаһинь авад, бас ладаниг кевтнь авад тәкл тәкдг орм деер бәрцин дееҗинь гиҗ шататха. Эннь Деед Эзнд һалын бәрц, каңкнсн үнр Терүнд тааста.

³ Наадк әңгнь Ахарона болн терүнә көвүдин болҗана: әрүнәс әрүн юмн, тедн Деед Эзнә һалын бәрцәс авгдҗана.

⁴ Кемр чини өдмгин бәрц бешт болһгдсн болхла, тиигхлә тернь цаһан буудян һуйрар болһгдх йоста: эс искәсн һуйрар болһсн өдмгиг олив тоснд элдәд эс гиҗ олив тос түрксн һуйр болх йоста.

⁵ Кемр өдмгәр кеҗәх чини бәрц дөрвлҗн таавад болһгдсн болхла, тиигхлә эннь эс искәсн цаһан буудян һуйрар олив тоснд элдәд болһгдх йоста.

⁶ Тер өдмгиг әңг-әңгәр хамхлад олив тос деерәснь ке. Эннь өдмгәр кеҗәх бәрц.

⁷ Кемр өдмгәр кеҗәх чини бәрц төгрг таавад болһгдсн болхла, тиигхлә олив тоснд цаһан буудян һуйрар болһгдх йоста.

⁸ Деед Эзнд өдмгин бәрц гиһәд авч одад терүгән гелңд өг. Гелң терүг тәклин ормд тәвтхә.

⁹ Бәрцин дееҗинь авад тәклин һалд шататха. Эннь Деед Эзнд һалын бәрц, каңкнсн үнр Терүнд тааста.

¹⁰ Наадк әңгнь Ахарона болн терүнә көвүдт: әрүнәс әрүн юмн, тернь Деед Эзнә һалын бәрцәс авгдҗана.

¹¹ Деед Эзнд өргҗәх тадна өдмгин бәрц эс искәсн һуйрар болһгдх йоста. Искәд болһсн өдмг, бал Деед Эзнд өгчәх һалын бәрц гиҗ шатагдшго юмн.

¹² Деед Эзнд теднән шин тәрәнә түрүн урһцин дееҗнь гиһәд авч иртн. Болв теднь Деед Эзнд каңкнсн үнр һарһад таасгддгар тәклин һалд бичә теднән шататн.

¹³ Тиим бәрцсиг давслхан бичә март. Давсн Бурхна болн чини хоорндк бооцана темдг. Авч ирх бәрц болһндан давс нем.

¹⁴ Кемр Деед Эзнд тәрәнә түрүн урһцас өдмгәр бәрц бәрҗәхлә, шин буудян толһасин үүлсн экинь һалд хуурад авч ирх кергтә.

¹⁵ Терүнд олив тос нем, деерәснь ладан асх. Эннь өдмгәр кеҗәх бәрц.

¹⁶ Тегәд гелң эн бәрцин дееҗинь Деед Эзнд һалын бәрц гиһәд шататха. Тернь буудян экнәс зәрм әңгинь болн ладаниг кевтнь.