Левит 19 - Хальмг келнд орчулсн Әрүн Бичлһс

Бийән бәрлһнә кемҗән болн авъясмудын туск зааврмуд

¹ Деед Эзн Мошед келнә:

² – Израилин хамцана цуг әмтнд күргәд кел: «Цугтан әрүн бәәдләр бәәтн. Яһад гихлә Би әрүнв, Деед Эзн, тадна Бурхн.

³ Эк эцк хойран күндлтн. Мини бемб өдр күцәтн. Би – Деед Эзн, тадна Бурхн.

⁴ Худл шүтәнд бичә шүттн, бийдән бурхиг бичә цутхҗ кетн. Би – Деед Эзн, тадна Бурхн.

⁵ Кемр Деед Эзнд эвцлһнә бәрц бәрҗәхлә, терүгән таасгддгар кетн:

⁶ тер бәрциг авч ирсн өдртнь эс гиҗ маңһдуртнь идтн. Һурвдгч өдртнь үлдсинь шатах кергтә.

⁷ Кемр тер бәрцәс үлдсинь һурвдгч өдртнь идхлә, тернь тааста болшго – махн үрҗ одх.

⁸ Тиим мах идсн күн бурута болх. Тер күн Деед Эзнә әрүн юмиг бузрдаҗана. Тегәд тер эврәннь келн-улс дундас уга кегдх.

⁹ Тадна һазрт тәрсн буудяһан хурахларн, тәрәнә захднь бичә күр. Хадлһна хөөн үлдсн буудян тәрәнә толһа бичә түүҗ ав.

¹⁰ Уста үзм урһдг һазрт үзмиг умш күртлнь бичә цуглул, унсинь чигн бичә ав. Тедниг угатя болн нүүҗ ирсн әмтнд үлдә. Би – Деед Эзн, тадна Бурхн.

¹¹ Бичә хулха кетн, бичә худл келтн, бичә нег-негән меклтн.

¹² Мини нерәр батлҗ худл андһар бичә өгтн. Эврәннь Бурхна нериг бичә һутатн. Би – Деед Эзн.

¹³ Өөрхн күүһән бичә шахҗ зова, бичә терүг тон. Нәәмәдлҗ авсн күүнә җалвинь өрүн күртл бичә бәр.

¹⁴ Таңх күүг бичә наад бәр, сохр күүнд боомтг бичә ке. Би – Деед Эзн.

¹⁵ Зарһ кехләрн, чикәр ке. Зарһд угатяһинь харсад, байн күүһинь өөдлүләд, бичә тиигҗ чирә хәләҗ ке. Өөрхн күүнә зарһинь чикәр ке.

¹⁶ Эврәннь нутгин әмтн дунд бичә хов зө. Кемр өөрхн күн зеткртә йовдлла харһулгдҗахла, тиим йовдлд бичә орлц. Би – Деед Эзн.

¹⁷ Эврәннь хамцана улст нуувчар бичә дурго бол. Өөрхн күүнәннь килнц даадгоһар терүнд илднь келҗә.

¹⁸ Хамдан бәәх нег нутга кен чигн күүнәс бичә өшә көөлд, бичә терүнд уурлад бә. Өөрхн күүнд бийләһән әдләр дурл. Би – Деед Эзн.

¹⁹ Мини зокалмудыг күцәҗә. Талдан хойр зүсн мал бичә ниилүлтн, нег тәрәнә һазрт хойр зүсн эк бичә тәртн, хойр зүсн утцар гүрсн хувц бичә өмстн.

²⁰ Кемр залу күн ялч күүкд күүнлә нииләд кевтсн болхла, тер күүкд күн талдан күүнд одх бәәсн болхла, терүг хулдҗ авад уга, сулдхгдад уга бәәсн болхла, тиигхлә мөшклһ кех кергтә. Тедниг бичә алтн, яһад гихлә тер күүкд күн сул күн биш.

²¹ Тер залу Деед Эзнд, Харһлтын Шатрин үүднд, һаруһинь даалһна бәрц гиҗ хуц авч иртхә.

²² Деед Эзнә өмн гелң гемән хәрүллһнә авъяс күцәтхә. Тер күүнә һарһсн гемин һаруһинь даах бәрц гиҗ хуц авч иртхә. Тегәд эн гемнь тәвгдх.

²³ Таднд Деед Эзнә өгчәх тер һазрт ирәд темснә модд тәрхләрн, теднә темсинь идҗ болшго гиҗ тоолтн. Һурвн җилдән теднә темсинь бичә идтн.

²⁴ Дөрвдгч җилдән тер темсд цугтан әрүн болх, Деед Эзнд нәәрин бәрц болх.

²⁵ Тавдгч җилдән эн темсдиг идтн. Тегәд тадна урһц йир элвг болх. Би – Деед Эзн, тадна Бурхн.

²⁶ Махиг цустаһинь бичә идтн. Бичә белг бәртн, бичә илв кетн.

²⁷ Толһа деерк үсиг төгрглҗ бичә хәәчлтн. Сахлыннь үзүриг бичә хәәчл.

²⁸ Үксн күүнә төлә махмудтан керчҗ сөрв бичә һарһтн, бичә эврәннь махмудтан темдгүд зуртн. Би – Деед Эзн.

²⁹ Эврәннь күүкнд аля йовдл бичә һарһул – бийән хулддг гергн бичә болтха. Эс гиҗ һазр аля бәәдләр дүүрх, җигшүртә йовдл икдх.

³⁰ Мини бемб өдр бәртн, Мини әрүн бәәр хәәрлтн. Би – Деед Эзн.

³¹ Өңгрсн күүг дууддг, сәкүсн-сүмсиг дууддг күн тал бичә одтн. Терүнәс тадн бузрдхит. Би – Деед Эзн, тадна Бурхн.

³² Буурл үстәг тевч, көгшдин өмн босад зогс. Эврәннь Бурхиг икәр күндл. Би – Деед Эзн.

³³ Тадна һазрт бүүрлхәр нүүҗ ирсн әмтиг бичә бастн.

³⁴ Танад бәәх нүүҗ ирсн әмтиг бәәрн улсла әдл тоолтн. Теднд бийләһән әдл дурл. Тадн бас Египетд нүүҗ ирсн әмтн болҗ бәәләт. Би – Деед Эзн, тадна Бурхн.

³⁵ Кергән күцәхләрн чикәр күцә: юм кемҗәлхләрн, чиңнүрдхләрн эс гиҗ тоолхларн.

³⁶ Тадна чиңнүр чик болн гиир чик болтха, чик ефә болн чик гин болтха. Би – Деед Эзн, тадна Бурхн. Тадниг Египетәс Би һарһлав.

³⁷ Мини зокалмудыг болн закадыг бәртн, тедниг күцәтн. Би – Деед Эзн».