Левит 18 - Хальмг келнд орчулсн Әрүн Бичлһс

Зака эвдҗ цогц-махмударн ниилшгон тускар

¹ Деед Эзн Мошед келнә:

² – Израилин улст күргәд кел: «Би – Деед Эзн, тадна Бурхн.

³ Тадна бәәсн Египетин авъясиг бичә дуратн. Тадниг Мини дахулад авч йовх Канана һазра авъясиг бас бичә дуратн. Теднә йос бичә бәртн.

⁴ Мини закадыг бәртн, Мини зокалар кеһәд тедниг күцәтн. Би – Деед Эзн, тадна Бурхн болҗанав.

⁵ Мини зокалмудыг болн закадыг күцәтн. Терүг күцәсн күн әмд болх. Би – Деед Эзн.

⁶ Таднас кен чигн күн төрл күүкд күн тал бичә өөрдтхә, терүг бичә авлҗ ичәтхә: Би – Деед Эзн.

⁷ Эцк-экиннь ичртә йовдлынь бичә үзүл. Экиннь нүцкн бәәдл бичә үзүл, энчнь чини эк.

⁸ Эцкиннь талдан гергнә нүцкн бәәдл бичә үзүл, энчнь эцкиннь ичртә бәәдл үзүлснлә әдл.

⁹ Эгч-дүүһиннь ичртә бәәдл бичә үзүл. Тер күн чини эцкин күүкн болну, эс гиҗ экинчн күүкн болну, тер тана өрк-бүлд эс гиҗ талдан бүлд һарсн болну, бичә терүнә ичринь үзүл.

¹⁰ Чини көвүнә күүкнәннь эс гиҗ күүкнәннь күүкнә нүцкн бәәдл бичә үзүл. Эннь бийиннь нүцкн бәәдл үзүлснлә әдл болх.

¹¹ Чини эцкин гергнә күүкнә нүцкн бәәдл бичә үзүл, тер күүкн чини эцкәс һарсмн. Энчнь чини дү күүкн, нүцкн бәәдлинь бичә үзүл.

¹² Эцкиннь эгч болн дү күүкнә нүцкн бәәдл бичә үзүл. Энчнь чини эцкин махн-цусн.

¹³ Чини экин эгч болн дү күүкнә ичринь бичә илдк, яһад гихлә тер чини экин махн-цусн күн.

¹⁴ Чини эцкин ах-дүүһин ичртә бәәдлинь бичә үзүл. Терүнә гергн тал бичә өөрд, терчнь чини һаһа.

¹⁵ Бериннь нүцкн бәәдлинь бичә үзүл. Терчнь чини көвүнә гергн, бичә неринь һута.

¹⁶ Ах-дүүһиннь гергнә нүцкн бәәдл бичә илдк. Энчн чини ах-дүүһин ичринь үзүлснлә әдл.

¹⁷ Күүкд күүнә болн терүнә күүкнә ичринь бичә илдк. Терүнә көвүнә күүкәр бичә гергән ке. Эс гиҗ терүнә күүкнә күүк бичә ав. Тедн цугтан нег махн-цусн әмтн. Тиим йовдл һарһлһн килнц болҗана.

¹⁸ Гергнәннь эгч-дү күүг бичә мордулҗ ав. Гергән әмд деернь эгч-дү күүнә ичринь үзүләд, терүгәр гергнләһән дөрлддг кү бичә ке.

¹⁹ Сарин кир ирсн цагт гергн күн тал бичә өөрд. Терүнә ичртә бәәдлинь бичә үзүл.

²⁰ Талдан күүнә гергнлә бичә кевт, терүнд асаһан бичә орул, терүнлә бичә бийән һута.

²¹ Эврәннь үрдән күүнә Молох гидг бурхнд бичә тәклд бәр. Бурхнаннь нериг бичә һута. Би – Деед Эзн.

²² Залу күүнлә гергн күүнлә әдл бичә кевт. Энчн җигшүртә.

²³ Мал-адуснла бичә ниил. Тиигхләг чи бузр болхич. Күүкд күн бас бичә мал-адуснла ниилтхә. Эннь әмтә юмсин йирин бәәдл эвдлһн болҗана.

²⁴ Бийән тиим юмар бичә бузрдатн. Тиим юмар бийән келн-әмтн бузрдаҗав. Тедниг Би таднд орм һарһад көөҗәнәв.

²⁵ Теднәс көлтә эн һазр бузрдв. Би терүг килнц һарһснднь хәрүһинь некв. Тер һазр тенд бәәсн әмтиг өргәд шивв.

²⁶ Тадн Мини зокалмудыг болн Мини закадыг күцәх зөвтәт. Таднас бәәрн әмтн болну, эс гиҗ нүүҗ ирснь болну, тиим җигшүртә юм бичә һарһтха.

²⁷ Таднас урд эн һазрт бәәсн әмтн иим җигшүртә юм һарһҗасн бәәҗ. Тегәд һазр бузрдҗ.

²⁸ Таднас урд энд бәәсн әмтиг өргәд шивснлә әдл тиим юмн болшго. Эн һазр таднас көлтә бузрдшго юмн, тадниг тиигшго.

²⁹ Тиим җигшүртә юм һарһҗах әмтн эврәннь келн-улс дундас уга кегдх.

³⁰ Мини батлсн заавр бәртн: таднас өмн бәәсн әмтнә тиим җигшүртә авъясмуд бичә дуратн. Теднәр бийән бичә һутатн. Би – Деед Эзн, тадна Бурхнв».