Левит 17 - Хальмг келнд орчулсн Әрүн Бичлһс

Израилин улсин бәәрнәс талдан һазрт мал алгдшго

¹ Деед Эзн Мошед келнә:

² – Ахаронд, терүнә көвүдт болн Израилин улст цугтаднь Деед Эзнә заавр иим гиһәд кел:

³ «Кемр кен чигн күн Израилин әмтн дундас бухиг, хөөг эс гиҗ ямаг бәәх бәәрн дотр, эс гиҗ һазань алхлаг,

⁴ һарсн малын цусн эн күүг гемшәх. Эн цус асхв, тегәд эн эврәннь келн-улс дундас уга кегдх. Яһад гихлә тер малыг Харһлтын Шатрин үүднд, Деед Эзнә өргә герин өмн, Деед Эзнд бәрц бәрхмн билә.

⁵ Теегт ода алҗах малмудыг Израилин улс Деед Эзн тал Харһлтын Шатрин үүднд гелңд авч иртхә. Тегәд тенд Деед Эзнд бәрҗәх эвцлһнә бәрц гиҗ алтха.

⁶ Харһлтын Шатрин үүднд бәәх тәкл тәкдг ормд малын цусиг гелң цацтха. Өөкинь шататха. Эннь каңкнсн үнр болх, Деед Эзнд таасгдх.

⁷ Дәкҗ текин бәәдлтә кегдлмүдт бичә бәрц бәртхә, теднд бичә шүттхә! Израилин улст мөңкинд өгчәх зокал эн. Үйәс үй һатлад терүг күцәтхә».

^8-9 Бас теднд кел: «Израилин улсин кен-негнь, эс гиҗ тедн дунд бәәх нүүҗ ирсн әмтн Харһлтын Шатрин үүднд Деед Эзнд өргдг бәрцин ормд биш, талдан һазрт шаталһна авъяс кеһәд, эс гиҗ эвцлһнә бәрц бәрхлә, тиигхлә тер күн эврәннь келн-улс дундас уга кегдх.

Цусн хотд орулҗ идгдшго

¹⁰ Кемр Израилин улсин кен чигн, эс гиҗ тедн дунд нүүҗ ирсн әмтн цусар хот кеҗ идхлә, тиигхлә Би эврәннь цухлыг тиим күүнд һарһхув. Терүг эврә келн-улс дундас уга кехүв.

¹¹ Яһад гихлә әмд юмна җирһлнь цуснднь бәәнә. Гемән хәрүллһнә авъяс күцәхләрн, малын цусиг тәкл тәкдг ормд авч иртхә гиҗ заалав. Ямаран чигн әмд юмна җирһл – цуснд, тернь күүнә һарһсн гем хәрүлнә.

¹² Тегәд Би Израилин улст келләв: „Таднас нег чигн күн болн тедн дунд бәәх нүүҗ ирсн әмтн цусиг хотдан орулҗ идшго юмн“.

¹³ Кемр Израилин улсин кен чигн, эс гиҗ тедн дунд бәәх нүүҗ ирсн әмтн аңһучлҗ йовад иддг аң, аль шову хаҗ авсмн болхла, тиигхлә теднәннь цусинь асхад элсәр булхмн болҗана.

¹⁴ Ямаран чигн әмд юмна җирһлнь цуснднь бәәнә. Цусар әмд йовҗана. Тегәд чигн Би Израилин улст келләв: „Әмд юмсин цус бичә хотдан орултн. Цусн ямаран чигн әмд юмсин җирһлнь болҗана. Хотдан цус орулад идҗәх күн алгдх“.

¹⁵ Ямаран чигн күн – бәәрн болну, нүүҗ ирсн болну – үксн малын мах, эс гиҗ зерлг аңгудт шуучгдад алгдсн малын мах идсн болхла, тер күн хувцан уһах зөвтә, бийән уһах зөвтә. Тер күн асхн күртл бузр болх, дәкәд цеврдх.

¹⁶ Болв кемр тер хувцан болн бийән эс уһахла, тер күн бурута болх».