Левит 16 - Хальмг келнд орчулсн Әрүн Бичлһс

Гемән хәрүллһнә өдр. Гемән хәрүллһнд һарһҗах тек

¹ Ахарона хойр көвүн Деед Эзн тал өөрдснәс көлтә үкснә хөөн, Деед Эзн Мошелә күүндв.

² Деед Эзн Мошед келнә: – Эврәннь ах Ахаронд иигҗ кел: «Хамгин әрүн бәәрн дотр, көшгин ард, Бооцана хәәрцг деер бәәх бүркә тал дурндан ордмн биш. Эс гихлә тер үкх. Би тиигәрән бүркә деер үүлн дотр ирәд бәәхүв.

³ Хамгин әрүн бәәрнд орхар седҗәх Ахарон килнцәс цеврллһнә бәрцд орулх бүрү болн шаталһна бәрцд орулх хуц авч ирх зөвтә.

⁴ Бий махмудан хааһад, әрүслсн олсн эдәр уйсн киилг болн шалвр өмстхә. Олсн эдәр уйсн бүс бүслтхә, толһа деерән олсн тахъя өмстхә. Эднь әрүслгдсн хувцд, бийән кевтнь уһачкад өмстхә.

⁵ Израилин улсин хамцанас цеврллһнә бәрцд 2 тек болн шаталһна бәрцд орулх хуц тер авх зөвтә.

⁶ Ахарон бийәсн цеврллһнә бәрцд орулхар бүрү авч ирхмн болҗана. Терүгәрн бийиннь төлә болн гериннь төлә гемән хәрүллһнә авъяс күцәх.

⁷ Дәкәд 2 тек автха, теднән Деед Эзнә өмн Харһлтын Шатрин үүднд зогсатха.

⁸ Тегәд негнь Деед Эзнә төлә, хойрдгчнь Израилин улсин килнцинь авад йовулҗах тек. Кенд ямаран җирв туссинь заатха.

⁹ Деед Эзнд нерәдсн җирв туссн текиг Ахарон авад, килнцәс цеврллһнә авъяс күцәтхә.

¹⁰ Израилин улсин килнцинь авад йовулҗах җирв туссн текиг Деед Эзнә өмн әмдәр зогсатха. Гемән хәрүллһнә авъяс күцәһәд, тер тек көдә һазр тал йовулгдх.

¹¹ Килнцәс цеврллһнә бәрцд орулх бүрүг Ахарон авч ирәд, бийиннь болн гериннь төлә гемән хәрүллһнә авъяс күцәтхә. Бийиннь килнцәс цеврллһнә төлә тер бүрүг алтха.

¹² Дарунь Деед Эзнә өмн бәәх күҗ уңһдадг ширә деерәс шатчах һалта күҗин сав авад, дәкәд үүлсн атхм күҗ авад көшгин ард орултха.

¹³ Деед Эзнә өмн күҗиг һалын цог деер тәвтхә. Бооцана хәәрцгин бүркәг күҗәс һарчах утанд даргддгар кехмн болҗана. Эс гиҗ Ахарон үкх.

¹⁴ Терүнә дару бүрүһин цусиг тер автха. Цуснд хурһан норһад, бүркән зүн үзг тал цацтха. Дәкәд дола дәкҗ бүркән өмн бийднь цацтха.

¹⁵ Ахарон олн-әмтнә килнцәс цеврллһнә бәрц текиг алтха. Терүнә цусиг көшгин ард орулад, бүрүһин цуснла әдләр бүркәд цацтха. Бүркән өмн бас цацтха.

¹⁶ Тиигҗ тер әрүн бәәрнә дотркинь гемән хәрүллһнә авъяс күцәх, Израилин улсин бузр бәәдләс, хаҗһр йовдлас болн теднә цуг килнцәс цеврлх. Израилин улсин цевр биш бәәдл дунд бәәх Харһлтын Шатрт бас тиим юм күцәх кергтә.

¹⁷ (Ахарон хамгин әрүн бәәрнә дотр гемән хәрүллһнә авъяс күцәхәр орад ирснә хөөн болн һартлнь Харһлтын Шатрт күн уга болх зөвтә.) Тиигҗ тер гемән хәрүллһнә авъяс бийиннь төлә, эврәннь герин төлә болн Израилин цуг хамцана төлә күцәх.

¹⁸ Деед Эзнә өмн бәәх тәкл тәкдг орм тал һарад, терүн деер гемән хәрүллһнә авъяс күцәтхә. Бүрүһин болн текин цусар тәклин өвриг цугтаһинь будтха.

¹⁹ Тәкл тәкдг ормд хурһарн дола дәкҗ цус цацтха. Тиигҗ тер тәкл тәкдг ормиг Израилин улсин бузр бәәдләс цеврлх, терүг әрүслх.

²⁰ Хамгин әрүн бәәрнә дотрк, Харһлтын Шатрин болн тәкл тәкдг орм гемән хәрүллһнә авъяс күцәснә дарунь Ахарон әмд тек авч ирх.

²¹ Терүнә толһа деер хойр һаран тәвәд, Израилин улсин һарһсн хар саната йовдлмудын болн буру йовдлын тускар келәд, теднә һарһсн цуг килнцин тускар келәд, текин толһа деер овалх. Йилһҗ авсн күүһәр дахулад тер текиг көдә һазр тал йовултха.

²² Тегәд тек Израилин улсин гемиг күн күршго һазр тал авч одх. Текиг көдә һазр тал йовулчкад,

²³ Ахарон Харһлтын Шатр дотр орад, урднь хамгин әрүн бәәрнд тиигәрән орхиннь өмн өмссн олсн хувцан тәәләд Шатр дотр үлдәх зөвтә.

²⁴ Әрүн ормд бийән уһаһад, бийиннь йирдән өмсдг хувцан өмстхә. Дарунь һарад бийиннь болн олн-әмтнә төлә шаталһна авъяс күцәх бәрц бәртхә. Терүгәрн бийиннь ормд болн олн-әмтнә ормд гемән хәрүллһнә авъяс күцәлһн болҗана.

²⁵ Бас тәкл тәкдг ормд цеврллһнә бәрцин өөкинь шататха.

²⁶ Израилин улсин килнцинь авад йовулҗах текиг көдә һазрт күргсн күн хувцан уһах, бийән уһах зөвтә. Тиим йовдл күцәснә дару эврә бәәрндән ирҗ чадх.

²⁷ Цеврллһнә бәрц бәрхәр авч ирсн бүрүг болн текиг, теднә цусиг хамгин әрүн бәәрн дотр орулад, гемән хәрүллһнә авъяс күцәснә дару тер бәәрнәс һарһх кергтә. Теднә арсинь, махинь болн киртә юмсинь шатахмн болҗана.

²⁸ Шатасн күн хувцан уһах, бийән уһахмн болҗана. Тегәд хәрү бәәрндән ирҗ чадҗана.

²⁹ Мөңкинд тадна күцәх зокал иим: доладгч сарин арвдгч өдр мацг бәртн, таднас нег чигн күн бичә көдлмш кетхә – бәәрн күн чигн, тадн дунд бәәх нүүҗ ирсн күн чигн болтха.

³⁰ Яһад гихлә тадниг килнцәсн һарһхин төлә тадн деер эн өдр гемән хәрүллһнә авъяс күцәгдх. Терүнә хөөн тадн Деед Эзнә өмн цевр болхит.

³¹ Эн өдр таднд бүклдән төвкнүн бәәлһнә бемб өдрлә әдл болхмн, мацг бәртн. Мөңкинд күцәх зокал эн.

³² Гемән хәрүллһнә авъясиг гелң күцәдмн. Тер гелң эцкиннь хөөн тос түрклһнә авъяс авад гелң болв. Тиигәд олсн эдәр уйсн хувц, әрүслсн хувц тер өмстхә.

³³ Хамгин әрүн бәәрнә, Харһлтын Шатрин болн тәкл тәкдг ормин гемән хәрүллһнә авъяс күцәтхә. Гелңгүд болн хамцана цуг олн-әмтн деер гемән хәрүллһнә авъяс бас күцәтхә.

³⁴ Эн зокалыг мөңкинд күцәтн. Җилд нег дәкҗ Израилин улсин гемән хәрүллһнә авъяс күцәтн. Тиигҗ тедниг цуг килнцәс цеврлтн». Деед Эзн Мошед келсәр Ахарон тиигҗ кев.