Левит 14 - Хальмг келнд орчулсн Әрүн Бичлһс

Проказа гемәс эдгснә хөөн күцәх авъясмудын тускар

¹ Деед Эзн Мошед келнә:

² – Проказа гемәр гемнснә хөөн күн яһҗ бийән цеврлхин туск закан эн. Терүг гелң тал авч иртхә.

³ Гелң тер күн тал бәәрнәсн һарч ирх йоста. Кемр гелң гемтә күүнә гемнь эдгсинь үзхлә,

⁴ цеврдхәр седҗәх күүнә төлә 2 цевр шову, хошун модна зорһс, улавр күрң эдин тасрха болн хуссоп авч иртхә.

⁵ Нег шовуг цевр усар дүүргсн шавр буһш деер алтха гиҗ гелң зактха.

⁶ Әмд шовуг хошун модна зорһста, улавр күрң эдин тасрхата болн хуссопта хамднь цевр усар дүүргсн буһш деер алгдсн шовуна цуснд орулад норһтха.

⁷ Тер цусар гелң проказа гемәр гемнснә хөөн цеврлгдҗәх күүг цеврлхин төлә дола дәкҗ цацл цацх йоста. Әмд шовуг гелң сулднь тәвхмн.

⁸ Цеврлгдҗәх күн хувцан уһатха, үсән кевтнь хустха, бийән уһатха. Тегәд тер цевр болх. Терүнә хөөн тер олна бәәрнд орҗ чадҗана. Болв бас долан хонгтан эврәннь шатрт орлго бәәх.

⁹ Дола хонад тер күн үсән кевтнь хусх йоста – толһаһан хусх, сахлан болн күмсгән хусх. Үсән кевтнь хусад, бийиннь хувцан уһаһад, бийән уһасна хөөн цевр болх.

¹⁰ Нәәмдгч өдр 2 эрмдг уга хурһ, эрмдг уга нег җил күцсн хө болн өдмгин бәрц кехин төлә олив тоснд элдсн ефән арвна һурвдгч әңг буудян цаһан һуйр болн 1 лог олив тос авч иртхә.

¹¹ Цеврллһнә авъяс кеҗәх гелң цеврлҗәх күүг Деед Эзнә өмн Харһлтын Шатрин үүднд авч ирсн бәрцтәһинь зогсатха.

¹² Гелң 1 хурһиг һаруһинь даах бәрц гиҗ 1 лог олив тоснла хамднь авад, тедниг Деед Эзнә өмн өргтхә.

¹³ Хурһиг әрүн ормд алх кергтә. Цеврллһнә болн шаталһна бәрц бәрдг ормд кех. Һару даах бәрц цеврллһнә бәрцлә әдл гелңгин болҗана. Эннь әрүнәс әрүн юмн.

¹⁴ Һару дааҗах бәрцин цуснас авад гелң цеврлгдҗәх күүнә барун чикнә ашкднь, барун һарин ик хурһнднь, барун көлин ик хурһнднь түрктхә.

¹⁵ Авч ирсн тосиг гелң зүн һарин атхгдсн альхн деер кеһәд,

¹⁶ тер альхн деер кегдсн тоснд барун һарин хурһан норһад, Деед Эзнә өмн дола дәкҗ цацл цацтха.

¹⁷ Альхн дотр үлдсн тосар цеврлгдҗәх күүнә барун чикнә ашкднь, барун һарин ик хурһнднь, барун көлин ик хурһнднь түрктхә. Тер һару даалһна бәрцин цусн деерәһәр олив тос түркг.

¹⁸ Альхн дотр үлдсн тосиг гелң цеврлгдҗәх күүнә толһа деернь кетхә. Тиигҗ гелң Деед Эзнә өмн гем хәрүллһнә авъяс күцәх.

¹⁹ Гелң килнцәс цеврллһнә бәрц кетхә. Тегәд гелң эн күүнд гемән хәрүллһнә авъяс күцәх. Терүг тиигҗ цеврлх. Дарунь шатагдх бәрц алх кергтә.

²⁰ Шатагдх болн өдмгин бәрциг гелң тәклин орм деер тәвтхә. Тиигҗ гелң гемән хәрүллһнә авъяс күцәх. Тер күн тегәд цевр болх.

²¹ Кемр күн угатя болад мөңгн уга болхла, һаруһинь даах бәрцд орулх 1 хурһ автха. Гемән хәрүллһнә авъяс күцәхин төлә Деед Эзнд терүг өргтхә. Дәкәд олив тоснд элдсн буудян һуйрин арвна хүвин 1 хүв ефә өдмгин бәрцд орулх болн 1 лог олив тос автха.

²² Дәкәд бас 2 көглҗрһн шову эс гиҗ 2 баахн көглҗрһн шову (терүнә чидләр) авч иртхә. Нег шовуһинь килнцәс цеврллһнә бәрц гиһәд, хойрдгч шовуһинь шаталһна төлә гиһәд авч иртхә.

²³ Эврәннь цеврллһнә нәәмдгч өдр бел кесн тоотан авад гелң тал ирәд, Харһлтын Шатрин үүднд Деед Эзнә өмн зогстха.

²⁴ Һаруһинь даах бәрцд орулх хурһиг болн олив тосиг гелң Деед Эзнә өмн өргтхә.

²⁵ Тер һаруһинь даах бәрцд орулҗах хурһиг алад, цусинь авад цеврлгдҗәх күүнә барун чикнә ашкднь, барун һарин ик хурһнд, барун көлин ик хурһнд гелң түрктхә.

²⁶ Олив тосиг гелң атхсн зүн альхн деерән асхад,

²⁷ Деед Эзнә өмн дола дәкҗ альхндан бәәх тоснас барун һарин хурһарн цацл цацтха.

²⁸ Альхндан бәәх тосар гелң цеврлгдҗәх күүнә барун чикнә ашкднь, барун һарин ик хурһнднь, барун көлин ик хурһнднь һаруһинь даах бәрцин цусн деерәһәр түркх йоста.

²⁹ Альхндан үлдсн тосиг гелң цеврлгдҗәх күүнә толһа деер кех йоста. Тиигҗ Деед Эзнә өмн гемән хәрүлҗәх күүнә авъяс гелң кеҗ күцәнә.

³⁰ Тегәд тер күн нег шову бәрцдән орултха (көглҗрһн эс гиҗ баахн көглҗрһн болну, эвәрн хәләтхә).

³¹ Цеврллһнә бәрц гиҗ өгсән өгтхә. Хойрдгч шовуг өдмгин бәрцтә хамднь шаталһна бәрцд орултха. Тиигҗ гелң Деед Эзнә өмн тер күүнә гемән хәрүллһнә авъясиг күцәх.

³² Проказа гемәр гемнәд зовҗасн угатя күн гемәсн яһҗ цеврлгдх закан эн болҗана.

Герин эрсмүд деерк проказа гемин тускар

³³ Деед Эзн Мошед болн Ахаронд келнә:

³⁴ – Таднд эзлтхә гиһәд Би Канана һазр өгчәнәв. Тадниг тиигәрән ирхлә, тер һазрт Би нег герт проказа гем хальданав.

³⁵ Тиигхлә герин эзн күн гелң тал ирәд келтхә: «Мини герт гем һарсмн бәәдлтә».

³⁶ Гелң хәләхәр ирхәсн өмн тер гер дотр бәәсн юмсинь цугтаһинь һарһтха гиҗ зактха. Эс гихлә гер дотрк кевтән бузр гиҗ келгдх. Терүнә хөөн гелң ирҗ гериг хәләҗ чадҗана.

³⁷ Кемр гелң эрс деер ноһан, эс гиҗ улавр толв үзхләрн, тенд хотхр ормс һарсн болхла,

³⁸ тиигхлә герин эркнәс һарад эн герт долан хонгтан күн бичә ортха гиҗ зактха.

³⁹ Кемр гелң доладгч өдртән ирәд, толвс эрс деегүр түгсиг үзхләрн,

⁴⁰ тиигхлә толвта чолудыг хамхлҗ авад, балһснас һарһад бузр һазрт хайтха.

⁴¹ Гер дотркиг кевтнь хусх кергтә. Хусгдсн шавриг балһснас һарһад бузр һазрт хайтха.

⁴² Чолуд хамхлҗ авсн ормиг шин чолуд тәвәд шалдтха.

⁴³ Кемр чолуд хамхлад авсна хөөн, гер кевтән хусгдад, шинәс шалдгдсна хөөн толв дәкн гер дотраһар түгсн болхла,

⁴⁴ гелң ирәд толв түгсиг үзнә. Эн герт хорта проказа бәәдг болҗана, гер цевр биш.

⁴⁵ Эн гериг хамхлх кергтә. Терүнә чолудыг, бахнсиг болн шалдвринь балһснас һарһад бузр һазрт хайхмн болҗана.

⁴⁶ Бичә ортха гиҗәсн цагт тер герт орсн күн асхн күртл цевр биш.

⁴⁷ Тер герт хонсн күн эврәннь хувцан уһах зөвтә. Тенд хот идсн күн бас хувцан уһах зөвтә.

⁴⁸ Кемр гелң ирәд шинәс шалдгдсн гер үзхләрн, толвс эс һарчахлаг тер гериг цевр гиҗ келх. Гем һарч одҗ.

⁴⁹ Гериг цеврлхин төлә гелң 2 шову, хошун модна зорһс, улавр күрң эдин тасрха болн хуссоп авх.

⁵⁰ Нег шовуг цевр усар дүүргсн шавр буһш деер алтха.

⁵¹ Дәкәд хошун модна зорһс, хуссоп, улавр күрң эдин тасрха болн әмд шовуг авад, цевр уснла холяд, алгдсн шовуна цуснд булхулад, дола дәкҗ цацл герт цацтха.

⁵² Шовуна цусар, урсхл усар, әмд шовуһар, хошун модна зорһсар, хуссопар болн улавр күрң эдин тасрхаһар гериг цеврлчкәд,

⁵³ гелң әмд шовуг балһснас һарһад сулднь тәвх йоста. Тиигҗ тер гемән хәрүллһнә авъяс күцәх, тиигхлә гер цевр болх.

⁵⁴ Ямаран чигн проказа гемин, цар гемин туск закан тиим.

⁵⁵ Проказа гем хувцн деер болн эрс деер, хавдр болну, бүрлдлһн болну, цаһан толв болну, эднә закан тиим.

⁵⁶ Цевр бишинь эс гиҗ цевринь тиигҗ йилһҗ авдг чигн. Проказа гемин закан тиим.