Левит 11 - Хальмг келнд орчулсн Әрүн Бичлһс

Цевр болн бузр малмудын тускар

¹ Деед Эзн Моше Ахарон хойрт келв:

² – Израилин улст соңсхад келтн: «Һазр деер бәәх тадна идх бод малмуд эн.

³ Тадн салата турутнриг болн кевлһән кевдг малмудыг идҗ чадҗанат.

⁴ Тиим малмуд дундас темә бичә идтн (тедн кевлһән кевв чигн, болв сала турутнр биш, дәкәд тер таднд цевр биш),

⁵ дамаг (эн кевлһән кевдг болв чигн, сала турута биш, таднд цевр биш),

⁶ туулаг (эн кевлһән кевдг болв чигн, сала турута биш, дәкәд таднд цевр биш),

⁷ һаха (эн сала турута мал болв чигн, болв кевлһ кевхш, дәкәд таднд цевр биш).

⁸ Теднә мах бичә идтн, үксн юмна цогц бичә көндәтн. Таднд тедн бузр болҗана.

⁹ Усн дотр бәәх адусдас, теңгсин болн һолын уснд бәәдг әмтә адусдас сервәтә болн гилвснтә юмс идтн.

¹⁰ Сервә болн гилвсн уга теңгсин болн һолын уснд бигшҗәх үүрмг әмтә адусд болн уснд бәәдг талдан тоотс таднд җигшүртә болх.

¹¹ Эннь таднд җигшүртә: теднә махинь бичә идтн, үксн тиим юмст дурго болтн.

¹² Усн дотр бәәдг сервә болн гилвсн уга адусд таднд җигшүртә.

¹³ Тадна җигшх шовуд эн (тедниг идҗ болшго, эдн җигшүртә): һәрд, ик махсг шовун, скопа,

¹⁴ элә болн зүсн-зүүл начн,

¹⁵ зүсн-зүүл керәс,

¹⁶ шар шовун, сипуха, цах шовун болн зүсн-зүүл харцх шовуд,

¹⁷ неясыть, баклан, совка,

¹⁸ цаһан һурвлһ, көдә һазрин һурвлһ, гекс,

¹⁹ ханчилду шовун, зүсн-зүүл көк хутн шовуд, цоклур болн бавуха.

²⁰ Дөрвн көлтә нисдг үүрмг әмтә хорхас таднд җигшүртә болх.

²¹ Болв тадн дөрвн көлтә нисдг үүрмг әмтә адусдыг идҗ чадҗанат. Теднд иим көләс талдан һазр деегүр һәрәдхләрн нуһлгддг көлтә.

²² Тегәд тадн зүсн-зүүл царцахас, ямаран чигн ут көлтә царцахас, зүсн-зүүл мөрн царцахас болн ямаран чигн бичкн царцахас идҗ чадҗанат.

²³ Наадк дөрвн көлтә нисдг әмтә хорха-хотн таднд җигшүртә болх.

²⁴ Иим адусдас көлтә тадн бузрдхит, үксн юмна цогцинь көндәсн күн асхн күртл цевр биш болх.

²⁵ Тиим цогц өргсн күн хувцан уһах йоста. Тер күн асхн күртл бузр болх.

²⁶ Сала турутань биш, эс гиҗ кевлһән эс кевдг малмуд таднд бузр. Теднә үксн цогциг көндәсн күн цевр биш.

²⁷ Дөрвн көлтә тавгар ишкәд йовдг мал-адусд таднд цугтан бузр. Тиим үксн юмсин цогц көндәсн күн асхн күртл цевр биш.

²⁸ Кемр тиим малын күш өргхлә, хувцан уһах йоста, тер күн асхн күртл цевр биш. Тиим мал-адусн таднд бузр.

²⁹ Һазр деерәһүр бигшәд гүүдг үүрмг әмтә юмсудас таднд бузрнь сохр нумн, хулһн, зүсн-зүүл ик гүрвлдәс,

³⁰ геккон, толвң эрәтә гүрвлдә, йирин гүрвлдә, сцинк болн хамелеон.

³¹ Эдн бузр үүрмг әмтә адусд. Тиим үксн адусд көндәсн күн асхн күртл цевр биш.

³² Тиим үксн адусн юн деер болвчн унхла, тернь бузр болх. Модар кегдсн, эдәр, арсар, эс гиҗ шүрүн эдәр кегдсн юмн деер унхла, тернь цевр биш. Кемр тер юмн эзндән кергтә болхла, терүг уснд тәвх кергтә. Тегәд тер асхн күртл бузр болх, дәкәд цевр болх.

³³ Кемр тер үүрмг әмтә адусд шавр савд орхла, терүнә бәәсн юмн бузрдҗ одх. Тиим савиг хамхлх кергтә.

³⁴ Идтхә гисн хотд тер савас усн орхлаг, уутха гисн усн тер савас кегдхләг, тедн ямаран савд эс бәәв чигн цугтан бузр болҗана.

³⁵ Үксн эн үүрмг әмтә адусд юмн деер унв чигн цугтан цевр биш болҗана. Һулмт эс гиҗ беш болну, тедниг хамхлх кергтә. Тедн цевр биш, таднд тедн цевр биш.

³⁶ Ямаран чигн булгта һазр, эс гиҗ усн хурдг нүкн цевр болх, зуг терүн дотр чивҗәх үксн үүрмг адусиг көндәсн күн бузрдх.

³⁷ Кемр тиим үксн адусн тәргдх экн деер унхла, тернь цевр кевәрн үлдх.

³⁸ Болв кемр тер усн дотрк тәрәнә экн деер унхла, тер экн таднд цевр биш.

³⁹ Кемр хотд орулх мал үкҗ одхла, тиигхлә кен чигн күн терүнә цогц көндәхлә асхн күртл цевр биш болх.

⁴⁰ Эн махнас идсн күн эврәннь хувцан уһах йоста, тегәд асхн күртл цевр биш болх. Тиим малын күш өргсн күн асхн күртл хувцан уһах зөвтә. Тер күн асхн күртл цевр биш болх.

⁴¹ Һазр деерәһәр мөлкҗ йовх үүрмг әмтә адусдыг идҗ болшго, эннь җигшүртә.

⁴² Тиим үүрмг әмтә адусдыг бичә идтн: элкәрн һазр деерәһәр мөлкдг, дөрвн тавгарн йовдгиг, эс гиҗ олн көлтә юмсиг. Эннь цугтан җигшүртә.

⁴³ Ямаран чигн үүрмг әмтә юмсар бичә бийән бузрдатн, теднәс көлтә бичә бузр болтн, бичә цевр бәәдлән геетн.

⁴⁴ Яһад гихлә Би – Деед Эзн, тадна Бурхнв. Әрүн болтн, бийиннь әрүн бәәдлән хадһлтн, яһад гихлә Би әрүнв. Һазр деерәһәр гүүҗ йовх үүрмг әмтә юмсудас көлтә бичә бузрдтн.

⁴⁵ Би – Деед Эзн, тадна Бурхн болхар тадниг Египетәс һарһлав. Әрүн болтн, яһад гихлә Би әрүнв.

⁴⁶ Бод малын болн нисдг үүрмг әмтә адусдын, усн дотр эрвлзәд гүүҗәх зүсн-зүүл әмд юмсин, һазр деерәһәр мөлкҗәх үүрмг әмд адусдын туск закан эн.

⁴⁷ Эннь цевр бишиг цевр юмнас йилһх: идх әмд юмсиг идшго әмд юмсдас йилһх закан».