Левит 10 - Хальмг келнд орчулсн Әрүн Бичлһс

Авиуд Надав хойрин килнц болн үкл

¹ Ахарона Надав Авиуд хойр көвүн эврәннь күҗин савд шатчах һал болн күҗ авад, Деед Эзнд харш болх һал авч ирнә. Тиим юм кетхә гиҗ теднд Деед Эзн келсн уга бәәҗ.

² Деед Эзнәс һал һарад тедниг шатана. Тедн Деед Эзнә өмн үкҗ одна.

³ Моше Ахаронд келнә: – Энүнә тускар Деед Эзн келләлм: «Нанд өөрхн әмтнд Би Эврәннь әрүн бәәдлән һарһхув, олн-әмтнә өмн Эврәннь туурмҗан үзүлхүв». Ахарон тагчг бәәв.

⁴ Моше Мисаилиг болн Элцафаниг, Ахарона авһ Узиелин көвүдиг дуудад теднд келнә: – Нааран иртн. Төрлиннь цогцсинь әрүн ормас һарһад, бәәрнәс холд авад йовтн.

⁵ Мошен келсәр тедн одад үксн улсиг хувцнаснь өргәд, хамцана бәәрнәс һарһна.

⁶ Тегәд Моше Ахаронд болн Элеазар Итамар хойр көвүнднь келнә: – Үсән бичә сарсалһтн, хувцан бичә шуултн, эс гиҗ тадн үкхит, тегәд цуг хамцанд цухл буух. Болв тадна өөрхн улс, Израилин улс цугтан, Деед Эзнә кесн эн шаталһнд һундлан һарһҗ уультха.

⁷ Үкшгон төлә Харһлтын Шатрин үүднәс тадн бичә һархар седтн. Тадн деер Деед Эзнә түрксн тосн бәәнм. Тедн Мошег соңсв.

Мөрглһнә цагт чаһр болн искәсн әрк уушгон тускар

⁸ Деед Эзн Ахаронд келнә:

⁹ – Чи чигн, чини хөөт үйнр чигн Харһлтын Шатрт орхар седҗәхләрн чаһр болн искәсн әрк бичә уутха, эс гиҗ тадн үкхит. Эннь таднд кеҗәх мөңк зокалыг цуг үйнр күцәтхә.

¹⁰ Тадн әрүн юмиг әрүн бишәснь, цевр юмиг цевр бишәснь йилһх йостат.

¹¹ Деед Эзн Мошеһәр дамҗад өгсн зокалмудыг Израилин улст цугтаһинь дасхх йостат.

Тәкл тәксн цагт гелңгүдин хүвин тускар

¹² Моше Ахаронд болн терүнә үлдсн Элеазар болн Итамар хойр көвүнд келнә: – Деед Эзнд нерәдснәс үлдсн һалын бәрц һуйрас авад, эс искәсн өдмг болһад, тәклин ормин хаҗуд идтн. Эннь әрүнәс әрүн бәрц өглһн.

¹³ Терүг әрүн ормд идтн. Эннь Деед Эзнд авч ирҗәх һалын бәрцин хүвнь чини болн чини хөөт үйнрин болҗана. Тиигҗ нанд закла.

¹⁴ Белг гиһәд бәрцд орулсн малын өрчинь болн ташаһинь чи, чини көвүд-күүкд чини хөөн ямаран чигн цевр һазрт идҗ чадҗана. Израилин улсин авч ирсн эвцлһнә бәрцсин цугтаһаснь эн хүвнь чини болн чини хөөт үйнрин.

¹⁵ Деед Эзнә өмн белг гиһәд өргх өөктә ташаг, белг гиһәд өгчәх өрчиг чамд өгх йоста. Эннь чамд болн чини хөөт үйнрт мөңкинд өггдх хүв. Деед Эзн тиигтхә гисмн.

¹⁶ Килнцәс цеврллһнә бәрцд авч ирсн тек яһла гиҗ Моше сурв. Тернь шатагдсн болҗ һарв. Моше Ахарона үлдсн Элеазар Итамар хойр көвүдт уурлна. Теднд келнә:

¹⁷ – Тадн яһад цеврллһнә малын махиг әрүн ормд эс идвт? Энтн әрүнәс әрүн. Тадниг Деед Эзнә өмн хамцананнь геминь хәрүллһнә авъяс күцәһәд, хамцана гемәс цеврлтхә гиҗәнә!

¹⁸ Кемр эн бәрцин цусинь әрүн бәәрнд эс орулсмн болхла, тадн мини келсәр бәрциг идх йоста биләт.

¹⁹ Ахарон Мошед келнә: – Эндр Деед Эзнд цеврллһнә бәрц болн шатагдх бәрц авч ирлә. Болв маднла иим йовдл учрв. Кемр би эндр цеврллһнә бәрцин махиг идсн болхла, Деед Эзн зөвшәрх билү?

²⁰ Терүнә келсиг Моше соңсад, зөвтә гив.