Левит 1 - Хальмг келнд орчулсн Әрүн Бичлһс

Шаталһна бәрцин тускар

¹ Харһлтын Шатрас Деед Эзн Мошег дуудад иигҗ терүнд келнә:

² – Кемр кен-негнь Деед Эзнд бәрц бәрхәр седхлә, тиигхлә гертән бәәсн бод малар чигн, үүрмг малар чигн кеҗ чадҗана. Энүнә тускар Израилин көвүдт соңсхад кел.

³ Кемр тер шаталһна бәрцән бод малар кеҗәхлә, тиигхлә эрмдг уга бүрү авх йоста. Терүг Деед Эзнд таасгддгар Харһлтын Шатрин өмн зогсатха.

⁴ Бәрц бәрҗәх күн гемән хәрүлдгәр, тер бәрцнь Деед Эзнд таасгддгар бүрүһин толһад һаран тәвтхә.

⁵ Бүрүг Деед Эзнә өмн алтха. Гелңгүд болҗах Ахарона хөөт үйнр, бәрцин цусиг Харһлтын Шатрин үүднд бәәх тәкл тәкдг ормд эргүләд цацтха.

⁶ Шатагдх бәрцин арсинь шувтлад, махинь әңгләд чавчх кергтә.

⁷ Ахарон гелңгин хөөт үйнр тәклин ормд һал шатаһад түлә тәвтхә.

⁸ Гелңгүд болҗах Ахарона хөөт үйнр, бәрцин зәрм әңгинь, толһатаһинь болн өөктәһинь, тәклин ормд, шатчах түләнә модн деер тәвтхә.

⁹ Бүрүһин дотринь болн көл-туруһинь уснд уһах кергтә. Эдниг гелң цугтаһинь тәкл тәкдг орм деер шататха. Эннь цугтан шаталһна бәрц болҗана, Деед Эзнд һалын бәрц, каңкнсн үнр Терүнд таасгдна.

¹⁰ Кемр кен-негнь үүрмг малар – хөөһәр эс гиҗ ямаһар – бәрц бәрхәр авч ирхлә, тиигхлә тер хуциг эс гиҗ текиг эрмдг угаһаснь авх йоста.

¹¹ Терүг Деед Эзнә өмн тәклин ормин ар үзг талнь алтха. Гелңгүд болҗах Ахарона хөөт үйнр тәклин ормд эргүләд бәрцин цусиг цацтха.

¹² Алгдсн малыг әңгләд, чавчад, толһаһинь болн өөкинь салһх кергтә. Эдниг цугтаһинь гелң тәклин ормд, шатҗах түләнә модн деер тәвтхә.

¹³ Бәрцин дотринь болн көл-туруһинь уснд уһах кергтә. Тегәд гелң бәрцән бәрәд цугтаһинь тәклин ормд шататха. Эн цугтаһинь шаталһн Деед Эзнд һалын бәрц, каңкнсн үнр Терүнд таасгдна.

¹⁴ Кемр кен-негнь Деед Эзнд шаталһна бәрцд шову авч ирхлә, тиигхлә бәрцән көглҗрһн эс гиҗ баахн көглҗрһн шовудар кехмн болҗана.

¹⁵ Гелң шовуг тәкл тәкдг орм тал авч ирәд, күзүһинь мошкад, толһаһинь тенд шатах йоста. Шовуна цусинь тәклин эрс деернь шахад һарһтха.

¹⁶ Терүг өрвлгәснь бәрәд, цогцаснь киртә ар бийинь таслҗ уга кеһәд, тәклин үмс асхдг зүн үзг тал хайтха.

¹⁷ Далвагаснь бәрәд цогцинь әрә шуулг (болв әңгләд шуулхмн биш). Терүг гелң тәкл тәкдг ормд шатчах модн деер шататха. Эннь цугтаһинь шаталһн Деед Эзнд һалын бәрц, каңкнсн үнр Терүнд таасгдна.