Йов 8 - Хальмг келнд орчулсн Әрүн Бичлһс

Билдадын келсн үг

¹ Шуахас ирсн Билдад иигҗ хәрү өгнә:

² – Кедү цагтан тиигҗ келхмбч? Чини үгмүд – шуугата хү салькн.

³ Бурхн үнн юмиг муурулдви, Хамгин Күчтә үнниг муурулдви?

⁴ Кемр чини үрд Терүнә өмн килнц һарһсн болхла, Тедниг Тер бийиннь йосн угаднь орулҗ.

⁵ Кемр чи Бурхиг хәәхлә, Хамгин Күчтәг ээрхлә,

⁶ Кемр чи цевр болн чик седклтә болхла, Чам тал Тер агчмд өөрдәд, Чини йоста гериг шинәс босхх.

⁷ Эклцәсн ямаран күчн уга болсн бийнь, Болв аштнь алдр болхич.

⁸ Давсн өвкнрәс сурад хәләлч, Теднә эцкнрт юн үзгдсинь медҗ авлч;

⁹ Бидн өцклдүр төрсндән юм медхшвидн, Һазр деегәр сүүдр мет давнавидн.

¹⁰ Маһд уга тедн чамаг сурһх, келҗ өгх, Келәрн зүркән секх.

¹¹ Улм уга һазрт папирус урһдви? Усн угаһар бура урһмл өсдви?

¹² Тер шимтә, керчгдәд уга Болв талдан өвснәс эрт хагсх.

¹³ Бурхиг мартсн цуг әмтнә хаалһнь тиим; Эс шүтдг күүнә нәәлвр унтрх.

¹⁴ Терүнә итклнь аралҗна гүлмнәс бат биш; Терүнә әмнь үснә үзүрт торчана.

¹⁵ Эврә герән түшхләрн, зогсҗ чадшго. Кедү татлдад бәәсн бийнь босҗ чадшго.

¹⁶ Тер эврән нарн дор шүүсәр дүүрәд, Сад дотраһар терүнә ацнь өстхә;

¹⁷ Терүнә уңгнь овалһата чолун дор ортха, Чолун эрс оратха, –

¹⁸ Болв кемр урдк ормаснь таслад авхла, Тер ормнь терүг һәәлх. Келх: «Би чамаг мел үзсн уга биләв!»

¹⁹ Терүнә җирһлин цуг байрнь эн! Зуг һазр деер талдан хар саната күн һарна.

²⁰ Болв Бурхн цеврцер күүг һазалшго, Хар саната күүнә һар бәршго.

²¹ Бурхн чамаг дәкн байрар дүүргх, чи хәәкрәд байрлад бәәхич.

²² Чини дәәсдт му нерн ирх, Хар саната әмтнә бәәсн сегнь уга болх.