Йов 7 - Хальмг келнд орчулсн Әрүн Бичлһс

¹ Күүг һазр деер күнд көдлмш эс күләҗәнү? Терүнә өдрмүднь – нәәмәдллһәр көдлдг күүнә өдрмүд эсий?

² Тер мухла мет сүүдр хәәҗ күсл кенә, Нәәмәдллһәр көдлдг күн мет өгх мөңгән күләнә.

³ Тиигҗ нанд хоосн цаг күртв, Мини хөв – муульта олн сө.

⁴ Әрә кевтн – кезә босхан күләнәв, Болв сө мел чилхш. Өр цәәтл нанд амрлт уга.

⁵ Мини цогц өтәр бүркгдв, Дардасн бальчг мини хувцн болв, Арсм хатурад хагзлва.

⁶ Мини өдрмүд эд некдг эрәснәс түргәр эрвлзнә, Чилгчдән күрәд, нәәлврин утцн кевтә тасрна.

⁷ О, Бурхн, ухалтн: мини җирһл – салькна үләлһн, Кишг нанд дәкҗ үзгдшго.

⁸ Эндр үзҗәх Бурхн намаг олшго: Хәләхлә – би уга болҗ одхв.

⁹ Үүлн тарна, уга болна, Үклин һазрт орснь – хәрү иршго;

¹⁰ Эврә герт дәкҗ иршго, Төрскнднь терүг дәкҗ үзшго.

¹¹ Тегәд би келх үгән бәршгов, Мини әмсхл түүрчҗәхиг келсв, Мини седкл һашудҗахиг зарһ бәрсв.

¹² Би теңгс болвзав, эс гихлә теңгсин әәмшгтә адусмб? Та нан деер яһад харул тәввт?

¹³ Би ухалсув: «Нөр намаг тогтнах, Орнд орхла, мини һундл уга болх».

¹⁴ Болв Та намаг Нөөртм чигн әәлһҗәнәт, Үзгдл үзүләд чочаһад бәәнәт.

¹⁵ Мини әмсхл таслгдсн болхла, Сән болх билә: Тиим келкәтә ясн болсн дорхнь, үкл деер.

¹⁶ Җирһлдән дурго болҗанав, Болв би мөңк бәәшголм! Намаг үлдәтн! Мини өдрмүд салькна үләлһн.

¹⁷ Күн гисн юмб? Яһснднь күүг деегшән өргҗәхмбт? Юңгад терүнд оньган өгчәнәт?

¹⁸ Ю хәәҗ өрүн болһн терүн тал однат? Терүг мел агчм болһнд шалһад бәәнәт?

¹⁹ Кезә Та нанас хәрү эргнәт? Нег агчмд шүлсән зальгтл эс сулдхнат?

²⁰ Би килнц һарһв? Олна Харулч, Танд би ю кеҗ өгхмб? Та нан тал яһад төвлнәт? Танд би юңгад ацан болҗахмб?

²¹ Та мини килнц юңгад эс тәвҗ өгнәт, Нанас мини эндүһим эс авч хайнат? Удлго би һазр дор даргдхв; Та намаг хәәхит, би уга болхв!