Йов 5 - Хальмг келнд орчулсн Әрүн Бичлһс

¹ Дууд, кен чамд хәрү өгх? Бурхна элчнрәс кенинь сурхмбч?

² Һәргиг тесвр уга бәәдл алх. Йирин күүг үлү үзлһн үкәрт орулх.

³ Би үзләв: һәргтәнь уңгарн батртл, Генткн терүнә гер харагдв.

⁴ Терүнә үрд дөң күләҗ чадшго. Тедниг балһсна үүднд – олна нүүрт – цокх. Тедниг күн харсҗ авшго.

⁵ Терүнә тәрәһинь харһнҗах күн идх, Нам буг өвсн дотр урһҗахинь таслад авх, Авлһч күн теднә зөөринь булаһад авх.

⁶ Тегәд му йовдл һазрас һарчахш, Зовлң тәрәнд урһҗахш –

⁷ Күн зовлңгин төлә төрсмн, Тегәд һалын очн мет деегшән өсрнә.

⁸ Би болхла – Бурхнд келх биләв, Бурхнд эврәннь кергән бәрүлх биләв.

⁹ Терүнә кергнь алдр, күцәҗ болшго. Терүнә өвәрц юмнд тотоомҗ уга.

¹⁰ Һазрт Тер хур белглнә, Тәрәнд ус илгәнә.

¹¹ Дорацулгдсн әмтиг деегшән өргнә, Уульҗасинь харсад авна.

¹² Хар саната әмтнә седвәриг эвднә, Тегәд теднә һарнь күцәмҗд күрхш.

¹³ Му ухатаһинь мекднь бәрҗ авна, Шулуншудрмгин тооцаһинь эвднә:

¹⁴ Һал өдрәр тедниг харңһу бүслх, Һал үдлә, сөөһәр мет, темтрәд йовцхах.

¹⁵ Түрүзүдү күүг Тер үлдәс, хорта келнәс, чаңһ һарас аврх.

¹⁶ Тегәд угатя күүнд нәәлвр бәәнә, Хар санатань аман хаах.

¹⁷ Бурхна сурһсн күн буйнкишгтә, Хамгин Күчтәһин засглһинь бичә һол:

¹⁸ Шавтав чигн Тер Эврән боох, Цокв чигн Терүнә һар эдгәх.

¹⁹ Зурһан мууляс Тер харсх, Болв доладгчнь чамаг көндәшго:

²⁰ Харһнсн цагт чамаг үкләс хулдҗ авх, Дәәнә цагт – үлдәс татҗ авх.

²¹ Чи хорта келнәс алдрхич, Иргчдән хоосрх бәәдләс әәшгоч;

²² Зуг хоосрад тарснд болн харһнлһнд инәхич, Чамд зерлг аңгуд әәмшгтә болшго;

²³ Чи тәрәнд бәәх чолудта бооцатач, Чамта көдән аңгуд эвтә бәәх;

²⁴ Чини бәәрнд тогтун җирһл бәәсиг медхич, Герән шинҗләд хәләхләг, цугтан ормдан.

²⁵ Чи тооһарн олн үрдән үзхич, Хөөт үйнрнь тәрәнә өвсн мет олн болх.

²⁶ Цагтан хадгдх буудян толһа мет, Күцх насндан үкәрт күрхич.

²⁷ Иим юм бидн илднь цәәлһвидн – Тернь тиим болҗана! Терүг соңсад, кевтнь тодлҗ ав.