Йов 42 - Хальмг келнд орчулсн Әрүн Бичлһс

Йов бийән гемшәҗәнә

¹ Йов Деед Эзнд иигҗ хәрү өгнә:

² – Би меднәв: цугтаһинь кеҗ чадхит, Та ю эс седв чигн, Танд төрүц юмн харшлшго.

³ Тана седвәриг медлго му келх би кемб? Би эс медҗәсн юмна тускар келләв, Мини эс медҗ чадшго өвәрц юмна тускар.

⁴ Намаг ю келхинь тегәд соңстн; Би сурсув, Та нанд цәәлһәд өгтн.

⁵ Урднь Тана тускар зуг чикәрн соңслав, Ода болхла эврәннь нүдәр үзҗәнәв.

⁶ Тегәд би урднь келсән керг уга гиҗәнәв, Тоосн болн үмсн дунд би бийән гемшәҗәнәв.

Деед Эзнд Йовин нәәҗнр таасгдҗахш

⁷ Деед Эзн Йовала күүндснә хөөн Теманас ирсн Элипазд келнә: – Би чамд болн чини хойр нәәҗд йир икәр уурлҗанав, юңгад гихлә тадн Мини тускар, Мини ялч Йовла әдл, мел чикәр келсн угат.

⁸ Тегәд тадн долан бух болн долан хө авад мини ялч Йов тал одтн. Бийиннь ормд тәкл тәкәд, тедниг цугтаһинь шататн, Мини ялч Йов тадна төлә зальврх. Би зуг терүнә зальврлһ соңсхв – Мини тускар мини ялч Йовла әдләр мел чикәр эс келсн бийнь Би тадниг засглшгов.

⁹ Тегәд Темана Элипаз, Шуахас ирсн Билдад болн Наамин Цофар йовад Деед Эзнә келсәр кеһәд күцәв, Деед Эзн Йовин зальврлһ авв.

Чилгч

¹⁰ Йов нәәҗнрин төлә мөргхлә, Деед Эзн терүнә һаруһинь даав: Деед Эзн Йовд урднь бәәснәснь хойр дам икәр өгв.

¹¹ Терүн тал ахнрдүүнр, эгчнр, урднь үүрлҗ йовсн таньдг әмтн – цугтан хурад ирцхәв: терүнә герт нәәрләд, Деед Эзнә Йовд илгәсн цуг зовлңгин хөөн терүг хармнна, эвлнә. Күн болһн Йовд мөңг өгнә, күн болһн неҗәһәд алтн сиик белглнә.

¹² Деед Эзн Йовин җирһлин үлдсн насинь урдкаснь үлүһәр йөрәв. Ода тер 14000 ямата болн хөөтә, 6000 темәтә, 2000 бухта болн 1000 элҗгнтә болв.

¹³ Терүнәс долан көвүн болн һурвн күүкн һарв:

¹⁴ негнднь тер – Йемима гидг нер өгв, хойрдгчднь – Кассия, һурвдгчднь – Керена-Гаппух.

¹⁵ Делкә деер Йовин күүкдлә әдл сәәхләс олдшго билә. Эцкнь теднд зөөрәсн ахнрлань зергләд һарһҗ өгв.

¹⁶ Терүнә хөөн Йов 140 җил бәәв, үрдән үзв, теднә бичкдиг дөрвдгч үйднь күрәд үзв.

¹⁷ Йов көгшрәд җирһлиг кевтнь үзәд өңгрв.